ଜୁଆ ଆଡ୍ଡା ଉପରେ ଚଢ଼ଉ:ଅଧ୍ୟାପକଙ୍କ ସହ ୪ଗିରଫ: ଲକ୍ଷାଧିକ ଟଙ୍କା ଓ ଗାଡ଼ି ଜବତ

ନୟାଗଡ଼, (ଓଡ଼ିଶା ଲେଖା): ନୟାଗଡ଼ ସଦର ପୋଲିସକୁ ମିଳିଛି ବଡ଼ ସଫଳତା। ଜୁଆ ଆଡ୍ଡା ଉପରେ ଚଢ଼ଉ କରି ଜଣେ ଅଧ୍ୟାପକଙ୍କ ସହ ୪ଜଣ ଯୁଆଡ଼ିଙ୍କୁ ଗିରଫ କରି କୋର୍ଟ ଚାଲାଣ କରିଛି ସଦର ପୋଲିସ। ଗିରଫ ହୋଇଥିବା ଜୁଆଡି ମାନେ ହେଲେ ଶରଣକୁଳ ଥାନା ମଗରବନ୍ଧ ଗାଁର ରାଜିବ ପ୍ରଧାନ, ଇଟାମାଟି ଥାନା କୃଷ୍ଣପ୍ରସାଦ ଗାଁର ଦିଲ୍ଲିପ କୁମାର ନାୟକ, ହିଞ୍ଜଳଗାଡିଆ ଗାଁର ଧ୍ରୁବ ବରାଡ଼, ନୟାଗଡ଼ ଟାଉନ୍ ଥାନା ସିନ୍ଦୂରିଆ ଗାଁର ତୟବୁଦ୍ଦିନ ମଲ୍ଲିକ୍ ଓ ବଢ଼ିଆସାହିର କୁନା ସ୍ଵାଇଁ। ସୂଚନାନୁସାରେ, ନୟାଗଡ଼ ସଦର ଥାନା ପୋଲିସ ପାଟ୍ରୋଲିଂ କରୁଥିବା ବେଳେ ସଦର ଥାନା ଅଧୀନରେ ଥିବା ହିଞ୍ଜଳଗାଡ଼ିଆ ଗାଁ ନିକଟରେ ଥିବା ଆଇଟିଆଇ ଟ୍ରେନିଂ ସ୍କୁଲ ପାଖରେ ଜୁଆ ଆଡ୍ଡା ଜମାଇଥିବା ଦେଖିବାକୁ ପାଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ଜୁଆ ଆଡ୍ଡା ଉପରେ ଅତର୍କିତ ଚଢ଼ାଉ କରିବା ସହ ଜୁଆଡ଼ି ମାନଙ୍କୁ କାବୁ କରିବାରେ ସଫଳ ହୋଇଥିଲେ। ଜୁଆ ଆଡ୍ଡା ସ୍ଥଳରୁ ପୋଲିସ୍ ୫ଜଣଙ୍କୁ ଗିରଫ କରିବା ସହ ଲକ୍ଷାଧିକ ଟଙ୍କା, ୫ଟି ମଟର ସାଇକେଲ ଓ ୩ଟି ମୋବାଇଲ ଫୋନ୍ ଜବତ୍ କରିଛି ସଦର ପୋଲିସ। ପୋଲିସ ଛାନ୍ ଭିନ କରିବା ସମୟରେ ସେହି ଜୁଆଡି ମାନଙ୍କ ମଧ୍ୟରେ ଜଣେ ଅଧ୍ୟାପକ ଥିବା ଜଣାପଡିଛି। ତେବେ ସେମାନଙ୍କୁ ସଦର ପୋଲିସ୍ ଥାନାରେ କେସ ନଂ ୪୭/୨୦୨୬ ରେ ମାମଲା ରୁଜୁ କରି କୋର୍ଟ ଚାଲାଣ କରିଛନ୍ତି ତଦନ୍ତକାରୀ ଅଫିସର ଏସଆଇ ଏମଡି ଜଫୁର୍ଲା। ଏ ନେଇ ଅତିରିକ୍ତ ଆରକ୍ଷୀ ଅଧିକ୍ଷକ ଜ୍ୟୋତି ରଞ୍ଜନ ସାମନ୍ତରାୟ ସୂଚନା ପ୍ରକାଶ କରିଛନ୍ତି।