ନୟାଗଡ଼ କଲେଜରେ ନବନିର୍ବାଚିତ ଛାତ୍ର ପ୍ରତିନିଧିଙ୍କ ଶପଥ ଗ୍ରହଣ ଉତ୍ସବ: ଛାତ୍ରଛାତ୍ରୀଙ୍କ ସମସ୍ୟା ସମାଧାନ ଓ ମହାବିଦ୍ୟାଳୟର ବିକାଶ ପାଇଁ ନେଲେ ଶପଥ

ନୟାଗଡ଼, (ଓଡ଼ିଶା ଲେଖା): ନୟାଗଡ଼ ସ୍ୱୟଂଶାସିତ ମହାବିଦ୍ୟାଳୟର ନବନିର୍ବାଚିତ ଛାତ୍ର ସଂସଦ ପ୍ରତିନିଧିମାନଙ୍କ ଶପଥ ଗ୍ରହଣ ଉତ୍ସବ ମହାବିଦ୍ୟାଳୟର ସୁବର୍ଣ୍ଣ ଜୟନ୍ତୀ ସମ୍ମିଳନୀ ଗୃହରେ ଅନୁଷ୍ଠିତ ହୋଇଯାଇଛି। ମହାବିଦ୍ୟାଳୟର ଅଧ୍ୟକ୍ଷ ପ୍ରକାଶ କୁମାର ରାଉତଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ନିର୍ବାଚନ ଅଧିକାରୀ ଡ଼ ଦିଲ୍ଲୀପ କୁମାର ମିଶ୍ର ଏବଂ ରିଟର୍ଣ୍ଣିଂ ଅଫିସର ବ୍ରଜବନ୍ଧୁ ବେହେରା ମଞ୍ଚାସୀନ ଥିଲେ। ଉତ୍ସବ ପ୍ରାରମ୍ଭରେ ମହାବିଦ୍ୟାଳୟ ପକ୍ଷରୁ ନବନିର୍ବାଚିତ ପ୍ରତିନିଧିମାନଙ୍କୁ ପୁଷ୍ପଗୁଚ୍ଛ ପ୍ରଦାନ କରାଯାଇ ସ୍ୱାଗତ ଜଣାଇବା ସହ ଶୁଭେଚ୍ଛା ଜଣାଯାଇଥିଲା। ଛାତ୍ର ସଂସଦ ନିର୍ବାଚନକୁ ସୁରୁଖୁରୁରେ ସମାପନ କରିବାରେ ସହଯୋଗ କରିଥିବା ନବନିର୍ବାଚିତ ପ୍ରତିନିଧି, ଛାତ୍ରଛାତ୍ରୀ, ଅଧ୍ୟାପକ, ଅଧ୍ୟାପିକା ଓ ସମସ୍ତ କର୍ମଚାରୀଙ୍କୁ ଅଧ୍ୟକ୍ଷ ଶ୍ରୀ ରାଉତ ଧନ୍ୟବାଦ ଜଣାଇବା ସହ କୃତଜ୍ଞତା ପ୍ରକାଶ କରିଥିଲେ। ଏହି ଅବସରରେ ସେ ମହାବିଦ୍ୟାଳୟର ପ୍ରଶାସନକୁ ସହଯୋଗ କରିବା ସହ କ୍ୟାମ୍ପସରେ ଶାନ୍ତି ଓ ଶୃଙ୍ଖଳା ବଜାୟ ରଖିବାକୁ ନବନିର୍ବାଚିତ ପ୍ରତିନିଧିମାନଙ୍କୁ ଆହ୍ୱାନ ଦେଇଥିଲେ।ପରେ ସମସ୍ତ ନବନିର୍ବାଚିତ ପ୍ରତିନିଧି ଛାତ୍ର ସଂସଦର ସଭାପତି ଭାବେ କାର୍ତ୍ତିକ ମହାନ୍ତି, ଉପସଭାପତି ସୁନନ୍ଦା ଲେଙ୍କା, ସମ୍ପାଦକ ସୁଭମ ପ୍ରକାଶ ପଣ୍ଡା, ସହକାରୀ ସମ୍ପାଦକ ଜିତୁ ସାହୁ, ଶ୍ରେଣୀ ପ୍ରତିନିଧି ସୁଶାନ୍ତ ସିଂହ, ବିଷ୍ଣୁପ୍ରିୟା ବେହେରା, ସାୟନ ସାନ୍ଧା, ରାଜେନ୍ଦ୍ର ଜେନା, ନାଟ୍ୟ ସମାଜର ସମ୍ପାଦିକା ସାବିତ୍ରୀ ସାହୁ, ସହକାରୀ ସମ୍ପାଦକ ପ୍ରଭୁଦ ପ୍ରତାପ ପ୍ରଧାନ, ଆଥଲେଟିକ୍ କ୍ଲବର ସମ୍ପାଦିକା ମନସ୍ୱିନୀ ମହାପାତ୍ର, ସହକାରୀ ସମ୍ପାଦକ ଅକ୍ଷୟ କୁମାର ଜେନା ନିର୍ବାଚିତ, ବିଜ୍ଞାନ ସଂଘର ସମ୍ପାଦକ ବିକାଶ କୁମାର ସାହୁ ଓ ସହକାରୀ ସମ୍ପାଦକ ଶିବାନୀ ସାହୁ ନିଜ ନିଜ ପଦର ଦାୟିତ୍ୱ ସୁଚାରୁରୂପେ ସମ୍ପାଦନ କରିବା, ମହାବିଦ୍ୟାଳୟର ବିକାଶରେ ସହଯୋଗ କରିବା ଏବଂ ଛାତ୍ରଛାତ୍ରୀଙ୍କ ବିଭିନ୍ନ ସମସ୍ୟାର ସମାଧାନ ଦିଗରେ କାର୍ଯ୍ୟ କରିବାକୁ ଶପଥ ଗ୍ରହଣ କରିଥିଲେ। ଶେଷରେ ନବନିର୍ବାଚିତ ଛାତ୍ର ସଂସଦ ସଭାପତି କାର୍ତ୍ତିକ ନାୟକ ସମସ୍ତ ଛାତ୍ରଛାତ୍ରୀଙ୍କ ସହଯୋଗ ପାଇଁ କୃତଜ୍ଞତା ଜଣାଇବା ସହ ଉତ୍ସବରେ ଯୋଗଦେଇଥିବା ସମସ୍ତଙ୍କୁ ଧନ୍ୟବାଦ ଦେଇଥିଲେ। ଏଥିସହ ଶପଥ ଗ୍ରହଣ ଉତ୍ସବର ସମାପନ ହୋଇଥିଲା।