ନୟାଗଡ଼, (ଓଡ଼ିଶା ଲେଖା): ମଦ ଧରିବାକୁ ଯାଇ ଆକ୍ରମଣର ଶିକାର ହେଲେ ନୟାଗଡ ଅବକାରୀ କର୍ମଚାରୀ । ସଦରଥାନା ବୋଦାପଡା ଗାଁରେ ଘଟିଛି ଘଟଣା । ଜଗବନ୍ଧୁ ଷଣ୍ଢ ନାମକ ଜଣେ ବ୍ଯକ୍ତି ରାସ୍ତାକଡରେ ମଦ ବିକୁଥିବା ଖବର ପାଇ ଚଢ଼ାଉ ପାଇଁ ଯାଇଥିବା ଅବକାରୀ ଟିମ୍ କୁ ୪ଜଣ ଗ୍ରାମବାସୀ ଆକ୍ରମଣ କରିଥିବା ସଦର ଥାନାରେ ଅଭିଯୋଗ ହୋଇଛି । ଆକ୍ରମଣରେ ୩ କନେଷ୍ଟବଳ ଆହତ ହୋଇଛନ୍ତି । ଆହତ ୩ କର୍ମଚାରୀମାନେ ହେଲେ ନିଳ ଲୋହିତ ମଲ୍ଲିକ , ଦେବୀପ୍ରସାଦ ପାଣି ଏବଂ କୈବଲ୍ୟ ସ୍ବାଇଁ ।
ଜଗବନ୍ଧୁ ଗାଁ ପାଖ ରାସ୍ତାକଡରେ ମଦ ବିକୁଥିବା ଖବରପାଇ ୫ଜଣିଆ ଅବକାରୀ ଟିମ୍ ଚଢାଉ କରିବାକୁ ଯାଇଥିଲେ । ଜଗବନ୍ଧୁଙ୍କୁ ଧରିବା ସମୟରେ ଜଗବନ୍ଧୁ , ତାଙ୍କ ଭାଇ ଗୋପିନାଥ ଷଣ୍ଢ ଏବଂ ଅନ୍ଯ ଦୁଇଜଣ ମିଳିତ ହୋଇ ଅବକାରୀ କର୍ମଚାରୀମାନଙ୍କୁ ଆକ୍ରମଣ କରିଥିଲେ । ଆକ୍ରମଣରେ କର୍ମଚାରୀଙ୍କ ନାକ , ମୁହଁ ଫାଟିଥିବା ଦେଖାଯାଇଛି । ସେହିରାସ୍ତାରେ ଯାଉଥିବା ଅନ୍ଯ ଏକ ସ୍କ୍ବାର୍ଡ ଟିମ୍ ଆକ୍ରମଣକାରୀଙ୍କ କବଳରୁ କର୍ମଚାରୀଙ୍କୁ ଉଦ୍ଧାର କରିବା ସହ ଜଗବନ୍ଧୁଙ୍କୁ ସଦରଥାନାକୁ ଆଣିଥିଲେ । ଥାନାରେ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି ।
