ନୟାଗଡ଼, (ଓଡ଼ିଶା ଲେଖା): ନୟାଗଡ଼ ସ୍ୱୟଂଶାସିତ ମହାବିଦ୍ୟାଳୟର ୨୦୨୬-୨୭ ଶିକ୍ଷାବର୍ଷ ପାଇଁ ଛାତ୍ର ସଂସଦ ନିର୍ବାଚନର ଫଳାଫଳ ଗୁରୁବାର ସନ୍ଧ୍ୟାରେ ପ୍ରକାଶ ପାଇଛି। ପ୍ରକାଶିତ ଫଳାଫଳ ଅନୁଯାୟୀ, ଛାତ୍ର ସଂସଦର ପ୍ରମୁଖ ପଦବୀଗୁଡ଼ିକରେ ବିଜୁ ଛାତ୍ର ଜନତା ଦଳ ବାଜି ମାରିଥିବା ଜଣାପଡ଼ିଛି। ନିର୍ବାଚନରେ ସଭାପତି ଭାବେ କାର୍ତ୍ତିକ ମହାନ୍ତି, ଉପସଭାପତି ଭାବେ ସୁନନ୍ଦା ଲେଙ୍କା, ସମ୍ପାଦକ ଭାବେ ସୁଭମ ପ୍ରକାଶ ପଣ୍ଡା ଏବଂ ସହକାରୀ ସମ୍ପାଦକ ଭାବେ ଜିତୁ ସାହୁ ନିର୍ବାଚିତ ହୋଇଛନ୍ତି। ଶ୍ରେଣୀ ପ୍ରତିନିଧି ଭାବେ ସୁଶାନ୍ତ ସିଂହ ନିର୍ବାଚିତ ହୋଇଥିବାବେଳେ ବିଷ୍ଣୁପ୍ରିୟା ବେହେରା, ସାୟନ ସାନ୍ଧା ଓ ରାଜେନ୍ଦ୍ର ଜେନା ଅପ୍ରତିଦ୍ୱନ୍ଦ୍ୱୀ ଭାବେ ମନୋନୀତ ହୋଇଛନ୍ତି। ସେହିପରି ମହାବିଦ୍ୟାଳୟର ନାଟ୍ୟ ସମାଜର ସମ୍ପାଦିକା ଭାବେ ସାବିତ୍ରୀ ସାହୁ ଏବଂ ସହକାରୀ ସମ୍ପାଦକ ଭାବେ ପ୍ରଭୁଦ ପ୍ରତାପ ପ୍ରଧାନ ନିର୍ବାଚିତ ହୋଇଛନ୍ତି। ଆଥଲେଟିକ୍ କ୍ଲବର ସମ୍ପାଦିକା ଭାବେ ମନସ୍ୱିନୀ ମହାପାତ୍ର ଓ ସହକାରୀ ସମ୍ପାଦକ ଭାବେ ଅକ୍ଷୟ କୁମାର ଜେନା ନିର୍ବାଚିତ ହୋଇଛନ୍ତି।
ବିଜ୍ଞାନ ସଂଘର ସମ୍ପାଦକ ଭାବେ ବିକାଶ କୁମାର ସାହୁ ନିର୍ବାଚିତ ହୋଇଥିବାବେଳେ ସହକାରୀ ସମ୍ପାଦକ ଭାବେ ଶିବାନୀ ସାହୁ ଅପ୍ରତିଦ୍ୱନ୍ଦ୍ୱୀ ଭାବେ ମନୋନୀତ ହୋଇଛନ୍ତି।ମହାବିଦ୍ୟାଳୟର ଅଧ୍ୟକ୍ଷ ପ୍ରକାଶ କୁମାର ରାଉତଙ୍କ ପକ୍ଷରୁ ଅକ୍ଟୋବର ୧୫ ତାରିଖରେ ଫଳାଫଳ ସମ୍ପର୍କିତ ବିଜ୍ଞପ୍ତି ପ୍ରକାଶ କରାଯାଇଥିଲା। ଛାତ୍ର ସଂସଦ ନିର୍ବାଚନ ଅଧିକାରୀ ଡ଼ ଦିଲ୍ଲୀପ କୁମାର ମିଶ୍ରଙ୍କ ତତ୍ତ୍ୱାବଧାନରେ ନିର୍ବାଚନ ପ୍ରକ୍ରିୟା ସୁରୁଖୁରୁରେ ସମ୍ପନ୍ନ ହୋଇଥିଲା। ଏଥିରେ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ସହଯୋଗ କରିଥିଲେ।ନିର୍ବାଚନ ସମୟରେ ଆଇନଶୃଙ୍ଖଳା ରକ୍ଷା ପାଇଁ ନୟାଗଡ଼ ତହସିଲଦାର ରାଜେଶ କେଶରୀ ସ୍ୱାଇଁ, ଅତିରିକ୍ତ ଆରକ୍ଷୀ ଅଧୀକ୍ଷକ ସୁବାଷ ଚନ୍ଦ୍ର ପଣ୍ଡା, ଜ୍ୟୋତି ରଞ୍ଜନ ସାମନ୍ତରାୟ, ଏସ୍ଡିପିଓ ସୃଷ୍ଟି ପ୍ରଧାନ ଏବଂ ଆଇଆଇସି ରଶ୍ମିରଞ୍ଜନ ପ୍ରଧାନଙ୍କ ସମେତ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।ନବନିର୍ବାଚିତ ଛାତ୍ର ପ୍ରତିନିଧିମାନେ ଆଗାମୀ ଶିକ୍ଷାବର୍ଷରେ ଛାତ୍ରଛାତ୍ରୀଙ୍କ ସମସ୍ୟାର ସମାଧାନ ଏବଂ ମହାବିଦ୍ୟାଳୟର ଶିକ୍ଷା, ସାଂସ୍କୃତିକ ଓ କ୍ରୀଡ଼ା କାର୍ଯ୍ୟକ୍ରମରେ ସକ୍ରିୟ ଭୂମିକା ନିର୍ବାହ କରିବେ ବୋଲି ଆଶା ପ୍ରକାଶ ପାଇଛି।
