ସାମ୍ବାଦିକ ପ୍ରଭାତ ବରାଡ଼ଙ୍କୁ ମରଣାନ୍ତକ ଆକ୍ରମଣ:ଥାନାରେ ଅଭିଯୋଗ

ନୟାଗଡ଼, (ଓଡ଼ିଶା ଲେଖା): ଭାପୁର ବ୍ଲକର ଧରିତ୍ରୀ ସାମ୍ବାଦିକଙ୍କୁ ମରଣାନ୍ତକ ଆକ୍ରମଣ କରାଯାଇଛି। ୪୮-ରାଜ୍ୟ ରାଜପଥର ଫତେଗଡ଼-ବିଜିପୁର ରାସ୍ତାରେ ଏକ ସଡ଼କ ଦୁର୍ଘଟଣା ଘଟିଥିଲା । ଭାପୁର ବ୍ଲକର ଧରିତ୍ରୀ ସାମ୍ବାଦିକ ପ୍ରଭାତ ବରାଡ଼ ଖବର ପାଇ ଖବର ସଂଗ୍ରହ କରିବାକୁ ଯାଇଥିଲେ । ଘଟଣାସ୍ଥଳରେ ପହଞ୍ଚି ଦୁର୍ଘଟଣାର ଫଟୋ ଉଠାଇ ଖବର ସଂଗ୍ରହ କରୁଥିବା ସମୟରେ ବିଜିପୁର ଲହଙ୍ଗାସାହିର ଲକ୍ଷ୍ମୀଧର ନାୟକ ହଠାତ୍ ଆସି ସାମ୍ୱାଦିକ ପ୍ରଭାତଙ୍କୁ ମାଡ଼ ମାରିବା ସହ ଅଶ୍ଳୀଳ ଭାଷାରେ ଗାଳି ଗୁଲଜ କରି ଜୀବନରୁ ମାରିଦେବା ଉଦ୍ୟମ କରିଥିଲେ । ଏବଂ ପ୍ରଭାତ ପିନ୍ଧିଥିବା ସୁନା ଚେନ୍ ଦୃବୁତ ଜଣଙ୍କ ଛିଣ୍ଡାଇ ନେଇଥିବା ନେଇ ସାଙ୍ଘାତିକ ଅଭିଯୋଗ କରିଛନ୍ତି । କାର୍ଯ୍ୟରତ ସାମ୍ବାଦିକଙ୍କୁ ସର୍ବ ସମ୍ମୁଖରେ ମରଣାନ୍ତକ ଆକ୍ରମଣ କରିବା ଓ ଅଶ୍ଳୀଳ ଭାଷାରେ ଗାଳି ଗୁଲଜ କରିବା ଫଳରେ ଜଣେ ଦକ୍ଷ ସାମ୍ବାଦିକଙ୍କ ମାନ ସମ୍ମାନ ହାନି ହେବା ସହ ଏତେ ବଡ ଗଣମାଧ୍ୟମ ସଂସ୍ଥାର ସମ୍ମାନ ହାନି ହୋଇଥିବା ନେଇ ସାମ୍ବାଦିକ ପ୍ରଭାତ ବରାଡ଼ ଫତେଗଡ ଥାନାରେ ଅଭିଯୋଗ କରିଛନ୍ତି । ପ୍ରଭାତ ଆହାତ ହୋଇ ଭାପୁର ଚିକିତ୍ସାଳୟରେ ଚିକିତ୍ସିତ ହେଉଥିବା ସୂଚନା ମିଳିଛି ।ସେପଟେ କାର୍ଯ୍ୟରତ ସାମ୍ବାଦିକକୁ ମରଣାନ୍ତକ ଆକ୍ରମଣ ଘଟଣାକୁ ଦୃଢ଼ ନିନ୍ଦା କରିବା ସହ ଅଭିଯୁକ୍ତ ତୁରନ୍ତ ଗିରଫ କରି ଦୃଢ଼ କାର୍ଯ୍ୟାନୁଷ୍ଠାନ ଦାବି କରାଯାଇଛି ।