ନୟାଗଡ଼, (ଓଡ଼ିଶା ଲେଖା): ନୟାଗଡ ଟାଉନ ଥାନା ଅନ୍ତର୍ଗତ ନବଘନପୁରରୁ ହୋଇଛି ସିରିଜ୍ ଚୋରୀ । ବିଳମ୍ବିତ ରାତିରେ ଦୁଇଟି ଘରୁ ଲକ୍ଷାଧିକ ନଗଦ ଟଙ୍କା ସହ ବହୁ ସୁନାଗହଣା ଲୁଟି ନେଇଛନ୍ତି ଦୁର୍ବୁତ୍ତ । ଏହାସହିତ ଅନ୍ଯ ଦୁଇଟି ଘରୁ ଚୋରୀ ଉଦ୍ୟମ ବେଳେ ଲୋକ ଉଠିପଡିବାରୁ ଚୋର ପଳାଇଯାଇଥିବା ଅନୁମାନ କରାଯାଉଛି । ଗତକାଲି ରାତିରେ ଗାଁର ପାଣୁଚରଣ ପାଳଙ୍କ ଘରେ ଝରକା ଗ୍ରିଲ୍ ତାଡି ଘରେ ପଶି ଦୁର୍ବୃତ୍ତମାନେ ୭୦ଗ୍ରାମରୁ ଅଧିକ ସୁନାଅଳଙ୍କାର ସହ ରୁପା ଗହଣା ଏବଂ ୫୫ହଜାର ଟଙ୍କା ଲୁଟ କରିଛନ୍ତି ।
ପାଣୁଙ୍କ ପରିବାର ଲୋକେ ଦୁଇଟି ବଖରାରେ ଶୋଇଥିବାବେଳେ ଠାକୁରଘରେ ପଶି ଦୁର୍ବୃତ୍ତମାନେ ଏହି ଚୋରି କରିଛନ୍ତି । ସେହିପରି ଗାଁର ଅନ୍ଯ ଏକ ସାହିରେ ରହୁଥିବା ପାଣୁଙ୍କ ସମ୍ପର୍କୀୟ ଭାଇ ଅକୃର ପାଳଙ୍କ ଘରୁ ଚୋରମାନେ ୬୨ହଜାର ଟଙ୍କା ସହ ୪୦ଗ୍ରାମରୁ ଅଧିକ ସୁନାଗହଣା ଲୁଟ କରିନେଇଛନ୍ତି । ଦୁଇଟି ଘରୁ ସମାନ ତରିକାରେ ଝରକା ଗ୍ରିଲ୍ ତାଡି ଚୋରି ହୋଇଛି । ଅକୃରଙ୍କ ଘରେ ମଧ୍ଯ ପରିବାର ଲୋକେ ଦୁଇଟି ବଖରାରେ ଶୋଇଥିବାବେଳେ ଠାକୁର ଘର ଝରକା ଗ୍ରିଲ୍ ତାଡି ଚୋର ଲୁଟ୍ କରିଛନ୍ତି ।
ଟାଉନ ଥାନା ଆଇଆଇସି ଅନ୍ଯ ପୋଲିସ ଅଧିକାରୀଙ୍କ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହାସହିତ ସାଇଣ୍ଟିଫିକ ଟିମ୍ ଏବଂ ଡଗ୍ ସ୍କ୍ୱାର୍ଡ ମଧ୍ଯ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଗତ ଜୁନ୍ ମାସ ୩୦ତାରିଖରେ ନବଘନପୁର ଗାଁରେ ବଡଧରଣର ଚୋରି ହୋଇଥିବାବେଳେ ପୋଲିସ ଏପର୍ଯ୍ୟନ୍ତ ଚୋରଙ୍କୁ ଧରିପାରିନାହିଁ ।
