ବଡ଼ମ୍ବା, (ଓଡ଼ିଶା ଲେଖା): କଥାରେ ଅଛି ଝିମିଟି ଖେଳରୁ ମହାଭାରତ, ସେହିପରି ଭାବେ ଛତୁ ବେପାରକୁ ନେଇ ବଚସା, ତା’ପରେ ବାଡେଇ ବାଡେଇ ହତ୍ୟା କରିଥିବା ନେଇ ଅଭିଯୋଗ ହୋଇଛି। ଯାହାଫଳରେ ମୃତକଙ୍କ ପରିବାର ଲୋକଙ୍କୁ କ୍ଷତିପୂରଣ ଦାବି କରି ରାଜ୍ୟ ରାଜପଥ ଅବରୋଧ କରିଥିବା ଜଣାପଡିଛି। ଏଭଳି ଘଟଣା ଦେଖିବାକୁ ମିଳିଛି ମାଣିଆବନ୍ଧ ଥାନା ଅଞ୍ଚଳରେ। ସୂଚନାନୁସାରେ, କଟକ ଜିଲ୍ଲା ମାଣିଆବନ୍ଧ ଥାନା ଅନ୍ତର୍ଗତ ମହୁଲିଆ ଗାଁର କୃଷ୍ଣଚନ୍ଦ୍ର ପ୍ରଧାନ (୫୫) ଓ ମାଣିଆବନ୍ଧ ଗାଁର ଯୁବକ ଶୁଭେନ୍ଦୁ ପାତ୍ର (୨୩) ଉଭୟ ମିଶି ଛତୁ ଭାଗ ବେପାର କରୁଥିଲେ। ୧ କେଜି ଛତୁକୁ ୧୦ ଟଙ୍କା କମ କରି ବିକ୍ରି କରିବାକୁ ନେଇ ଗତକାଲି ଉଭୟଙ୍କ ମଧ୍ୟରେ ବଚସା ଓ ଝଗଡା ଲାଗିଥିଲେ ।
ଝଗଡା ଉଗ୍ରରୂପ ନେବାରୁ ଶୁଭେନ୍ଦୁ ଏକ ଠେଙ୍ଗାରେ ଆକ୍ରମଣ କରି କୃଷ୍ଣଚନ୍ଦ୍ରଙ୍କର ମୁଣ୍ଡ ଫଟେଇ ଦେଇ ଲହୁ ଲୁହାଣ କରିଦେଇଥିଲା। ଏନେଇ ମୃତ କୃଷ୍ଣଚନ୍ଦ୍ର ପ୍ରଧାନଙ୍କର ପୁତୁରା ଜଗନ୍ନାଥ ପ୍ରଧାନ ମାଣିଆବନ୍ଧ ଥାନାରେ ଅଭିଯୋଗ କରିବା ପରେ ପୋଲିସ ଆଜି ଶୁଭେନ୍ଦୁଙ୍କୁ ଗିରଫ କରିଛି। ପରେ ଏହି ଘଟଣାକୁ ନେଇ କ୍ଷତିପୂରଣ ପାଇଁ ମହୁଲିଆ ଛକ ନିକଟରେ ବଡମ୍ବା-ନରସିଂହପୁର ରାଜ୍ୟ ରାଜପଥ ରାସ୍ତା ଅବରୋଧ କରିଛନ୍ତି ଗ୍ରାମବାସୀ। ଘଟଣା ସ୍ଥଳରେ ବଡ଼ମ୍ବା ତହସିଲଦାର ସାଶ୍ୱତ ରଞ୍ଜନ ଦାଶ, ଆଠଗଡ଼ ଉପଖଣ୍ଡ ଆରଖି ଅଧିକାରୀ ବିଶ୍ୱଜିତ ମହାନ୍ତି, ମାଣିଆବନ୍ଧ ଆଇଆଇସି ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଗ୍ରାମବାସୀଙ୍କୁ ବୁଝାସୁଝା କରୁଥିବା ଜଣାପଡିଛି।।
