ଓଡ଼ିଶା ଲେଖା ଅଫିସ: ଶିକ୍ଷକଙ୍କ ନାମରେ କଳଙ୍କ ପାଲଟିଛନ୍ତି ଆଦର୍ଶ ବିଦ୍ୟାଳୟର ପ୍ରଧାନ ଶିକ୍ଷକ। ସରକାରୀ ଅର୍ଥ ହେରଫେର କରି ଭିଜିଲାନ୍ସ ଦ୍ୱାରା ବନ୍ଧା ହୋଇଛନ୍ତି ପ୍ରଧାନ ଶିକ୍ଷକ ସୌମ୍ୟରଞ୍ଜନ ଖେତି। ଲକ୍ଷେ ନୁହେଁ କି ଦୁଇ ଲକ୍ଷ ନୁହେଁ ତାଙ୍କ ସମୟରେ ୫୫ ଲକ୍ଷ ଟଙ୍କା ସରକାରୀ ଧନ ଦୁରୁପଯୋଗ କରିଥିବା ଭିଜିଲାନ୍ସ ନିକଟରେ ଅଭିଯୋଗ ହୋଇଥିଲା। ଭିଜିଲାନ୍ସ ଟିମ ତଦନ୍ତ କରି ଶେଷରେ ପ୍ରଧାନ ଶିକ୍ଷକ ଶ୍ରୀ ଖେତିଙ୍କୁ ଗିରଫ କରିଛି। ସୂଚନାନୁସାରେ, ସୁବର୍ଣ୍ଣପୁର ଜିଲ୍ଲାର ବିନିକା ଓଡ଼ିଶା ଆଦର୍ଶ ବିଦ୍ୟାଳୟ (OAV) ର ପୂର୍ବତନ ପ୍ରଧାନଶିକ୍ଷକ ସୌମ୍ୟରଞ୍ଜନ ଖେତି ୨୦୨୧-୨୨ ରୁ ୨୦୨୪-୨୫ ମଧ୍ୟରେ ମଧ୍ୟାହ୍ନ ଭୋଜନ (MDM), Mo School Abhijan ଏବଂ ଛାତ୍ରୀ ନିବାସ ଖର୍ଚ୍ଚ ଧନ ଖାତାରୁ ୫୫ଲକ୍ଷ ଟଙ୍କାର ଉର୍ଦ୍ଧ୍ୱ ବାଟମାରଣା କରିଥିବା ନେଇ ଭିଜିଲାନ୍ସରେ ଅଭିଯୋଗ ହୋଇଥିଲା । ସମ୍ବଲପୁର ଭିଜିଲାନ୍ସ ପୋଲିସ ଷ୍ଟେସନ୍ରେ କେସ୍ ନମ୍ବର-୧୯/୨୦୨୫, U/s 13(2) r/w 13(1)(a) P.C.(Amendment) Act, 2018/316/61(2) BNS ଅନୁସାରେ ମାମଲା ରୁଜୁ କରାଯାଇଛି। ଭିଜିଲାନ୍ସର ଖୋଳତାଡ଼ ପରେ ପ୍ରଧାନ ଶିକ୍ଷକ ସରକାରୀ ଅର୍ଥର ବାଟମାରଣା କରିବା, ଅର୍ଥ ଦୁରୁପଯୋଗ କରିଥିବା ଜଣାପଡିଥିଲା। ଏମିତି କି ପ୍ରଧାନ ଶିକ୍ଷକ ଅନଲାଇନ ଗେମ ତିନି ପତି ଖେଳରେ 11ଲକ୍ଷ ଲଗାଇ ରାତି ରାତି ଧନୀ ହେବାର ସ୍ବପ୍ନ ଦେଖିଥିବା ବେଳେ ସମ୍ବଲପୁର ଭିଜିଲାନ୍ସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି।
ଆଦର୍ଶ ବିଦ୍ୟାଳୟର ପ୍ରଧାନ ଶିକ୍ଷକଙ୍କୁ ଗିରଫ କଲା ଭିଜିଲାନ୍ସ:ତିନିପତି ଖେଳିବାରେ ଲଗାଇଥିଲେ 11ଲକ୍ଷ
