ନୟାଗଡ଼, (ଓଡ଼ିଶା ଲେଖା): ଚକି ପେଶିବାକୁ ଗଲେ ନୟାଗଡ ଜିଲ୍ଲାର ଲେବର ଅଫିସର୍। ଲେବର କାର୍ଡ କରିଦେବାକୁ ନେଉଥିଲେ ଲାଞ୍ଚ। ମାଡ଼ି ବସିଲା କଟକ ଭିଜିଲାନ୍ସ ଟିମ୍। ରେଡ୍ ହ୍ୟାଣ୍ଡରେ ଲେବର ଅଫିସରଙ୍କୁ ଧରିଲା ଭିଜିଲାନ୍ସ ଟିମ । ଭିଜିଲାନ୍ସ ଟିମ ଲେବର ଅଫିସରଙ୍କୁ ଗିରଫ କରିଥିବା ଜଣାପଡିଛି । ସୂଚନାନୁସାରେ, ନୟାଗଡ଼ ଜିଲ୍ଲାର ଲେବର ଅଫିସର ଭାବେ କାର୍ଯ୍ୟ କରିଆସୁଥିବା ଚିତ୍ତରଞ୍ଜନ ରାଉତ ୩ ବର୍ଷ ହେଲା ଲେବର ଅଫିସରେ ମନମୁଖୀ କାର୍ଯ୍ୟ ଚଳେଇ ଆସୁଥିଲେ । କାହାରି କଥାକୁ ଖାତିର କରୁନଥିଲେ । ଯିଏ ତାଙ୍କ ନାମରେ ଅଭିଯୋଗ କରୁଥିଲା, ତାଙ୍କ ନାମରେ ମିଛ କେସ ଦେଇ ହଇରାଣ ହରକତ କରୁଥିଲେ । ନୟାଗଡ଼ ଜିଲ୍ଲାର ହଜାର ହଜାର ଲେବର ମାନଙ୍କ ପାଇଁ ବିଭିନ୍ନ ପ୍ରକାରର ସରକାରୀ ଅନୁଦାନ ଆସୁଥିବା ବେଳେ (ଡ଼ିଏଲଓ) ଜିଲ୍ଲା ଲେବର ଅଫିସର ଚିତ୍ତରଞ୍ଜନ ରାଉତ ଅନୁଦାନ ହଡ଼ପ କରିବା ଲାଞ୍ଚ ନେଉଥିବା ନେଇ ଅଭିଯୋଗ ହେଇଆସୁଥିଲା । କଥାରେ ଅଛି ଚୋର ଘର ସଦାବେଳେ ଅନ୍ଧାର ନଥାଏ, ସେହି ନ୍ୟାୟରେ ଶୁକ୍ରବାର ଦିନ ଜଣେ ଶ୍ରମିକ ନେତାଙ୍କ ଠାରୁ ୩0 ଜଣଙ୍କ ପାଇଁ ଲେବର କାର୍ଡ କରିଦେବା ପାଇଁ 6000ଟଙ୍କା ଲାଞ୍ଚ ନେଉଥିବା ବେଳେ ରେଡ ହ୍ୟାଣ୍ଡରେ ଧରିଲେ ଭିଜିଲାନ୍ସ ଟିମ । ଭିଜିଲାନ୍ସ ଜବତ 6000ଟଙ୍କା ସହ ଜିଲ୍ଲା ଶ୍ରମ କାର୍ଯ୍ୟାଳୟରେ ଚଢ଼ାଉ, ସେହିପରି ରାଉତ ବାବୁ ରହୁଥିବା ଭଡ଼ା ଘରେ ମଧ୍ୟ ଚଢ଼ାଉ କରି ବିଭିନ୍ନ କାଗଜ ପତ୍ର ଜବତ କରିଥିଲା ।ଏମିତିକି ଚଢ଼ାଉ ସମୟରେ ଘରୁ ଦୁଇଟି ଖାମରେ ଟଙ୍କା ଥିବାର ଦେଖିବାକୁ ପାଇ ଭିଜିଲାନ୍ସ ଟିମ ଜବତ କରିଥିବା ଜଣାପଡିଛି । ଭିଜିଲାନ୍ସ ଟିମ ପଚାର ଉଚୁରା ପରେ ଜିଲ୍ଲା ଲେବର ଅଫିସର ଚିତ୍ତରଞ୍ଜନ ରାଉତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି ।
