ଓଡ଼ିଶା ଲେଖା ଅଫିସ୍: ଲାଞ୍ଚ ନେଉଥିଲେ ସାବଧାନ, ଛକି ରହିଛି ଭିଜିଲାନ୍ସ । କେତେ ବେଳେ ବି ଆପଣ ଭିଜିଲାନ୍ସ ଜାଲରେ ପଡିପାରନ୍ତି। ଏ ଯେମିତି ଗୋଟିଏ ଦିନରେ ତିନିଟି ଜାଗାରେ ଭିଜିଲାନ୍ସ ଟିମ୍ ଜାଲରେ ପଡିଛନ୍ତି ଦୁର୍ନୀତି ଖୋର ସରକାରୀ କର୍ମଚାରୀ। ଲାଞ୍ଚ ନେବା ସମୟରେ ବାମରା ତହସିଲଦାର ଅଶ୍ୱିନୀ ପଣ୍ଡା ଓ ତାଙ୍କ ଡ୍ରାଇଭର ଭିଜିଲାନ୍ସ ହାତରେ ଧରାପଡ଼ିଛନ୍ତି ।
ସୂଚନାନୁସାରେ, ବାମରା ବ୍ଲକ ସଦର ମହକୁମା ସ୍ଥିତ ଗୋବିନ୍ଦପୁରର ଭିକି ନାଏକ ଏକ ଜମି ମ୍ୟୁଟେସନ ଓ କିସମ ପରିବର୍ତ୍ତନ ପାଇଁ ବାମରା ତହସିଲ ଅଫିସରେ ଆବେଦନ କରିଥିଲେ । ହେଲେ ତହସିଲଦାର ଅଶ୍ୱିନୀ ପଣ୍ଡା ଲାଞ୍ଚ ମାଗି ଆସୁଥିବା ଭିକି ସମ୍ବଲପୁର ଭିଜିଲାନ୍ସ ପାଖରେ ଅଭିଯୋଗ କରିଥିଲେ ।
ତହସିଲଦାରଙ୍କ ଡ୍ରାଇଭର ତହସିଲଦାରଙ୍କ ନିର୍ଦ୍ଦେଶ କ୍ରମେ ଲାଞ୍ଚ ପାଇଁ ୧୫ ହଜାର ଟଙ୍କା ନେଉଥିବା ସମୟରେ ଭିଜିଲାନ୍ସ ଟିମ୍ ମାଡ଼ି ବସିଥିଲେ। ତହସିଲଦାର ଅଶ୍ୱିନୀ ପଣ୍ଡା ଓ ତାଙ୍କ ଡ୍ରାଇଭର ପ୍ରବିନ କୁମାରକୁ ଅଟକ ରଖିଛି ଭିଜିଲାନ୍ସ । ଘଟଣାର ଯାଞ୍ଚ ପରେ ପରବର୍ତ୍ତୀ କାର୍ୟ୍ୟନୁଷ୍ଠାନ ଗ୍ରହଣ କରାଯିବ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି। ତହସିଲଦାରଙ୍କ ଘରୁ ସୁନା ଅଳଙ୍କାର ନଗଦ ଟଙ୍କା ମଧ୍ୟ ଜବତ କରିଛି ଭିଜିଲାନ୍ସ ଟିମ୍।
