ନୟାଗଡ଼, (ଓଡ଼ିଶା ଲେଖା): ନୟାଗଡ଼ ୟୁନାଇଟେଡ୍ ସ୍ପୋର୍ଟ୍ସ ଆସୋସିଏସନ୍ ଆନୁକୂଲ୍ୟରେ ଆସନ୍ତା ଡିସେମ୍ବର ମାସର ତୃତୀୟ ସପ୍ତାହରେ ନୟାଗଡ଼ ଖେଳପଡ଼ିଆରେ ପ୍ରଥମ ନୟାଗଡ଼ ଚ୍ୟାଲେଞ୍ଜ ରାଜ୍ୟସ୍ତରୀୟ ଫୁଟବଲ୍ ଟୁର୍ଣ୍ଣାମେଣ୍ଟ ଆୟୋଜନ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଏନେଇ ଆଜି ଖେଳପଡ଼ିଆ ମଞ୍ଚରେ ବରିଷ୍ଠ ଆଇନଜୀବୀ ରଣଜିତ୍ ଦାଶଙ୍କ ଆବାହକତ୍ୱରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା।ବୈଠକରେ ରାଜ୍ୟର ବିଭିନ୍ନ ପ୍ରତିଷ୍ଠିତ ଫୁଟବଲ୍ ଦଳ ଓ ଖେଳାଳିଙ୍କୁ ନେଇ ଏକ ଉଚ୍ଚକୋଟୀର ଟୁର୍ଣ୍ଣାମେଣ୍ଟ ଆୟୋଜନ କରିବାକୁ ନିଷ୍ପତ୍ତି ହୋଇଛି। ଏଥିସହ ନୟାଗଡ଼ର ସୁନାମଧନ୍ୟ ଫୁଟବଲ୍ ଖେଳାଳିଙ୍କୁ ନେଇ ଏକ ଦଳ ଗଠନ କରାଯାଇ ଟୁର୍ଣ୍ଣାମେଣ୍ଟରେ ପ୍ରମୁଖ ଅଂଶୀଦାର ଦଳ ଭାବେ ଅଂଶଗ୍ରହଣ କରାଯିବ।ଟୁର୍ଣ୍ଣାମେଣ୍ଟକୁ ଶୃଙ୍ଖଳିତ ଓ ସଫଳ ଭାବେ ପରିଚାଳନା ପାଇଁ ଏକ ଟୁର୍ଣ୍ଣାମେଣ୍ଟ କମିଟି ଗଠନ କରାଯାଇଛି। ବିଶିଷ୍ଟ ସମାଜସେବୀ ପ୍ରମୋଦ ପଟ୍ଟନାୟକଙ୍କୁ ସଭାପତି, ହାସିମ୍ ଖାଁଙ୍କୁ ଉପସଭାପତି, କମଳ ଚରଣ ସାହୁଙ୍କୁ ସମ୍ପାଦକ ଏବଂ ଶିବ ରଞ୍ଜନ ସାହୁଙ୍କୁ ସାଂଗଠାନିକ ସମ୍ପାଦକ ଭାବେ ମନୋନୀତ କରାଯାଇଛି। ଖୁବ୍ଶୀଘ୍ର କାର୍ଯ୍ୟକାରୀ କମିଟି ସମ୍ପର୍କରେ ସୂଚନା ଦିଆଯିବ।ଆଠଦିନ ବ୍ୟାପୀ ଏହି ଫୁଟବଲ୍ ପ୍ରତିଯୋଗିତା ଆୟୋଜନ ସହ ଏକ ମହିଳା ଫୁଟବଲ୍ ପ୍ରଦର୍ଶନୀ ମ୍ୟାଚ୍ ମଧ୍ୟ ଅନୁଷ୍ଠିତ ହେବ ବୋଲି ବୈଠକରେ ସ୍ଥିର ହୋଇଛି।ବୈଠକରେ ଲକ୍ଷ୍ମୀଧର ତ୍ରିପାଠୀ, ଅମଜାଦ ଖାଁ, ପୀତବାସ ଖୁଣ୍ଟିଆ, ଶେଖ୍ ମସୁଜୁଦ୍ ହୁସେନ, ପୂର୍ଣ୍ଣଚନ୍ଦ୍ର ସାନ୍ତ, ଓମ୍ ପ୍ରକାଶ ପ୍ରଧାନ, ଅଶୋକ କୁମାର ମଲ୍ଲିକ, ମଲ୍ଲିକ୍ ସାହିଦ, ସହାବାଜ ଖାଁ, ସଲମାନ୍ ଖାଁ, ପ୍ରତୀକ ମହାପାତ୍ର, ବିଶ୍ୱଜିତ୍ ବେହେରା, ହୁରସିଦ୍ ମଲ୍ଲିକ୍, ଅରବିନ୍ଦ ପାଢ଼ୀ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ।ସର୍ବସମ୍ମତିକ୍ରମେ ଆବାହକ ରଣଜିତ୍ ଦାଶଙ୍କୁ ଟୁର୍ଣ୍ଣାମେଣ୍ଟର ମୁଖ୍ୟ ପୃଷ୍ଠପୋଷକ ଭାବେ ଗ୍ରହଣ କରାଯାଇଥିଲା। ଶେଷରେ ଉପସଭାପତି ହାସିମ୍ ଖାଁ ଧନ୍ୟବାଦ ଅର୍ପଣ କରିଥିଲେ।
ରାଜ୍ୟସ୍ତରୀୟ ନୟାଗଡ଼ ଚ୍ୟାଲେଞ୍ଜ ଫୁଟବଲ୍ ଟୁର୍ଣ୍ଣାମେଣ୍ଟ ପାଇଁ ପ୍ରସ୍ତୁତି ବୈଠକ
