ଭୁବନେଶ୍ୱର, (ଓଡ଼ିଶା ଲେଖା): ଭାରତୀୟ କ୍ରିକେଟ୍ରେ ଓଡ଼ିଶା ପାଇଁ ଆଉ ଏକ ଗର୍ବର ମୁହୂର୍ତ୍ତ। ପୂର୍ବତନ ଭାରତୀୟ କ୍ରିକେଟର ତଥା ଓଡ଼ିଆ ସ୍ପିନର ପ୍ରଜ୍ଞାନ ଓଝାଙ୍କୁ ବିସିସିଆଇର ବରିଷ୍ଠ ପୁରୁଷ କ୍ରିକେଟ୍ ଦଳର ଚୟନ ସମିତିର ଅନ୍ତରୀଣ ଅଧ୍ୟକ୍ଷ ଭାବେ ଦାୟିତ୍ୱ ମିଳିବା ନେଇ ଖବର ପ୍ରକାଶ ପାଇଛି। ବର୍ତ୍ତମାନର ଚୟନ ସମିତିରେ ପ୍ରଜ୍ଞାନ ଓଝାଙ୍କ ସହ ଆର୍.ପି. ସିଂହ, ଶିବସୁନ୍ଦର ଦାସ ଓ ଅଜୟ ରାତ୍ରା ସଦସ୍ୟ ରହିଛନ୍ତି। ବିସିସିଆଇର ପୂର୍ବତନ ଅଧିକୃତ ଘୋଷଣାରେ ପ୍ରଜ୍ଞାନ ଓଝାଙ୍କୁ ପୁରୁଷ ଚୟନ ସମିତିର ସଦସ୍ୟ ଭାବେ ସାମିଲ କରାଯାଇଥିବା ନିଶ୍ଚିତ ହୋଇଥିଲା। ଅଜିତ ଅଗରକରଙ୍କ ଚୟନ ସମିତି ଅଧ୍ୟକ୍ଷ ପଦର କାର୍ଯ୍ୟକାଳ ଶେଷ ହେବାକୁ ଥିବା ବେଳେ ପ୍ରଜ୍ଞାନ ଓଝାଙ୍କୁ ଅନ୍ତରୀଣ ଭାବେ ଏହି ଦାୟିତ୍ୱ ଦିଆଯିବା ନେଇ ରିପୋର୍ଟ ପ୍ରକାଶିତ ହୋଇଛି। ପ୍ରଜ୍ଞାନ ଓଝାଙ୍କ ଏହି ନୂଆ ଦାୟିତ୍ୱ ଖବର ପ୍ରକାଶ ପାଇବା ପରେ ଓଡ଼ିଶାର କ୍ରିକେଟ୍ପ୍ରେମୀ, କ୍ରୀଡ଼ାପ୍ରେମୀ ଓ ତାଙ୍କ ପ୍ରଶଂସକଙ୍କ ମଧ୍ୟରେ ଉତ୍ସାହ ଦେଖାଦେଇଛି। ସାମାଜିକ ଗଣମାଧ୍ୟମ ସମେତ ବିଭିନ୍ନ ମହଲରୁ ପ୍ରଜ୍ଞାନ ଓଝାଙ୍କୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଓଡ଼ିଶାରୁ ଭାରତୀୟ କ୍ରିକେଟ୍ରେ ନିଜର ପରିଚୟ ସୃଷ୍ଟି କରିଥିବା ପ୍ରଜ୍ଞାନ ଓଝାଙ୍କ ଏହି ନୂଆ ଭୂମିକା ରାଜ୍ୟର କ୍ରିକେଟ୍ପ୍ରେମୀଙ୍କ ପାଇଁ ଗର୍ବର ବିଷୟ ପାଲଟିଛି।
ବିସିସିଆଇ ଚୟନ ସମିତିର ଅନ୍ତରୀଣ ଅଧ୍ୟକ୍ଷ ହେବେ ପ୍ରଜ୍ଞାନ ଓଝା:ପ୍ରିୟ ଓଡ଼ିଆ କ୍ରିକେଟରଙ୍କୁ ଶୁଭେଚ୍ଛାର ସୁଅ
