କଙ୍ଗାରୁକୋର୍ଟର କରୁଣ ପରିଣତି:ନଳକୂପ ଚାବିରେ ବାଡ଼େଇ ବାଡ଼େଇ ହତ୍ୟା:୨ଘଣ୍ଟା ପରେ ଡାହୁକା ନଦୀରୁ ମୃତ ଦେହ ଉଦ୍ଧାର:ପୋଲିସର ଛାନଭିନ ଆରମ୍ଭ

ନୟାଗଡ଼, (ଓଡ଼ିଶା ଲେଖା): ରାଜ୍ୟରେ ଦିନକୁ ଦିନ ଆଇନ୍ ଶୃଙ୍ଖଳା ବିଗିଡ଼ିବାରେ ଲାଗିଛି। ଯେଉଁଥି ପାଇଁ ଅପରାଧି ମାନେ ଓଡ଼ିଶା ପୋଲିସ୍ କୁ ଖୋଲା ଚ୍ୟାଲେଞ୍ଜ୍ ଦେଈ ଅପରାଧ ଘଟାଇ ଚାଲିଛନ୍ତି। ଅପରାଧୀ ମାନେ ମଧ୍ୟ ପୋଲିସ ଉପରକୁ ମଧ୍ୟ ହାତ ଉଠାଇବା ଓ ମାଡ଼ ମାରିବା ଭଳି ଘଟଣା ମଧ୍ୟ ବିଗତ ଦିନରେ ଦେଖିବାକୁ ମିଳିଥିବା ବେଳେ ସେଥିରୁ ବାଦ୍ ପଡ଼ିନି ନୟାଗଡ଼ ଜିଲ୍ଲା। ଅପରାଧି ମାନଙ୍କ ଭୂସ୍ୱର୍ଗ ପାଲଟିଗଲାଣି ନୟାଗଡ଼ ଜିଲ୍ଲା। ନୟାଗଡ ସଦରଥାନା ଡାଳିଆମଡା ଗାଁର ଜଣେ  ଯୁବକଙ୍କୁ ପିଟିପିଟି ହତ୍ଯା ପରେ ନଦୀରେ ଫିଙ୍ଗିଦେଇଥିଲେ ଦୁର୍ବୃତ୍ତ । ସୂଚନାନୁସାରେ, ନୟାଗଡ଼ ସଦର ଥାନା ଅନ୍ତର୍ଗତ ଡାଳିଆମଡା ଗାଁର ଚିରଞ୍ଜିବୀ ସାହୁଙ୍କ ପରିବାରକୁ ଜାଗାବାଡି ବିବାଦକୁ କେନ୍ଦ୍ରକରି ଗତ ୩ବର୍ଷ ହେଲା ଗ୍ରାମବାସୀ ଏକଘରିକିଆ ରଖିଥିଲେ । ବିଭିନ୍ନ ସମୟରେ ଗ୍ରାମବାସୀ ଏବଂ ଚିରଞିବୀଙ୍କ ପରିବାର ସଦସ୍ୟଙ୍କ ମଧ୍ଯରେ ପାଟିତୁଣ୍ଡ ହେଉଥିଲା । ଚିରଞିବୀଙ୍କ ପୁଅ ଅଭିମନ୍ୟୁ ରବିବାର ଅପରାହ୍ନରେ ଗାଁ ନିକଟ ଛକରେ ଥିବା ଦୋକାନକୁ ଔଷଧ କିଣିବାକୁ ଯାଇଥିଲେ। ପୂର୍ବ ଶତ୍ରୁତା କାରଣରୁ ଦୋକାନ ସାମ୍ନାରୁ ଗାଁର ଅନ୍ୟ କିଛି ବ୍ୟକ୍ତି ତାଙ୍କ ହାତ ଗୋଡ଼ ବାନ୍ଧି ଉଠାଇ ନେଇଥିଲେ। ଡାହୁକା ନଦୀ କୂଳରେ ଥିବା ଗାଁ କ୍ଲବ ଘରକୁ ନେଇ ସେଠାରେ ତାଙ୍କୁ ନଳକୂପ ଚାବିରେ ମରଣାନ୍ତକ ଆକ୍ରମଣ କରାଯାଇଥିଲା। ପ୍ରବଳ ମାଡ ପରେ ଅଭିମନ୍ୟୁଙ୍କ ମୃତ୍ୟୁ ହୋଇଯିବାରୁ ମୃତଦେହକୁ ନିକଟସ୍ଥ  ଡାହୁକାନଦୀରେ ଫିଙ୍ଗି ଦେଇଥିବା ନେଇ ପରିବାର ଲୋକ ରବିବାର ରାତିରେ ଥାନାରେ ଅଭିଯୋଗ କରିଥିଲେ । ସଦରଥାନା ପୁଲିସ ସାଇଣ୍ଟିଫିକ୍ ଟିମ୍ ଓ ଡଗ ସ୍ୱାର୍ଡ ଜରିଆରେ ତଦନ୍ତ ଆରମ୍ଭ କରିଥିଲା । କ୍ଲବ ଘରୁ ନଳକୂପ ପାଇପ୍ ଜବତ କରାଯାଇଛି। କ୍ଲବ ଘର କାନ୍ଥରେ ରକ୍ତ ଛିଟା ଲାଗିଥିବା ମଧ୍ଯ ଦେଖିବାକୁ ମିଳିଛି।  ଅତିରିକ୍ତ ଆରକ୍ଷୀ ଅଧିକ୍ଷକ, ନୟାଗଡ ଏସଡିପିଓ,  ସଦରଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ନୟାଗଡ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନଦୀରେ ପ୍ରାୟ ୨ଘଣ୍ଟା  ଖୋଜାଖୋଜି କରିବାପରେ କ୍ଲବ୍ ଘର ଠାରୁ ପ୍ରାୟ ୩ଶହ ମିଟର ଦୁରରେ ଅଭିମନ୍ୟୁଙ୍କ ମୃତଦେହକୁ  ନଦୀ ଭିତରୁ ଉଦ୍ଧାର କରିଥିଲେ । ମୃତଦେହରେ ବହୁ କ୍ଷତ ଚିହ୍ନ ରହିଥିବାରୁ ତାଙ୍କୁ ହତ୍ଯା କରିବା ପରେ ନଦୀରେ ଫିଙ୍ଗି ଦିଆଯାଇଥିବା ଅନୁମାନ କରାଯାଉଛି । ମୃତଦେହକୁ ଜବତ କରି ପୋଲିସ ପୋଷ୍ଟମର୍ଟମ ପାଇଁ ପଠାଇଛି । ଘଟଣାର ଅଧିକ ତଦନ୍ତ ଚାଲିଛି ଏବଂ ୮ଜଣଙ୍କୁ ଅଟକ ରଖାଯାଇଥିବା ଅତିରିକ୍ତ ଆରକ୍ଷୀ ଅଧିକ୍ଷକ ପ୍ରକାଶ କରିଛନ୍ତି ।