ନୟାଗଡ଼, (ଓଡ଼ିଶା ଲେଖା): ଗୋଡ଼ିଗଦାରୁ ଉଦ୍ଧାର ହୋଇଛି ୧୯ବର୍ଷୀୟ ଯୁବକଙ୍କ ମୃତ ଦେହ। ଯୁବକ ଜଣଙ୍କର ଦୁର୍ଘଟଣା ଜନିତ ମୃତ୍ୟୁ ଘଟିଛି ନା ହତ୍ୟା କରି ଗୋଡ଼ି ଗଦାରେ ପୋତି ଦିଆଯାଇଛି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ପୋଲିସ ଘଟଣାସ୍ଥଳରେ ପହଞ୍ଚି ମୃତ ଦେହ ଯବତ କରିଛି। ତେବେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଫତେଗଡ ଥାନା ଭାପୁର ମହୋତ୍ସବ ପଡ଼ିଆରେ। ମୃତ ଯୁବକ ଜଣଙ୍କ ହେଉଛନ୍ତି ୧୯ବର୍ଷୀୟ ମୁନା ରାଉତ। ସୂଚନାନୁସାରେ, ନୟାଗଡ଼ ଜିଲ୍ଲା ଫତେଗଡ଼ ଥାନା ଅନ୍ତର୍ଗତ ସୁନାଖଳା ଗ୍ରାମର ୧୯ ବର୍ଷୀୟ ମୁନା ରାଉତ ଏକ ହାଇୱା ଟ୍ରକରେ ହେଲ୍ପର ଭାବେ କାମ କରୁଥିଲେ। ଶନିବାର ରାତିରେ ଭାପୁର ବଜାର ନିକଟରେ ଥିବା ମହୋତ୍ସବ ପଡ଼ିଆ ନିକଟରେ ଚିପ୍ସ(ଗୋଡ଼ି) ଅନଲୋଡ଼ ହୋଇଥିଲା । ତେବେ ଆଜି ସକାଳୁ ଉକ୍ତ ଗୋଡ଼ିଗଦା ଭିତରୁ ମୁନାଙ୍କ ମୃତଦେହ ଦେଖିବାକୁ ମିଳିଥିଲା। ସାଙ୍ଗେ ସାଙ୍ଗେ ସ୍ଥାନୀୟ ଅଞ୍ଚଳରେ ଏହି ଘଟଣା ଖେଳି ଯାଇଥିଲା। ଖବର ପାଇ ଫତେଗଡ଼ ପୋଲିସ ଓ ତଦନ୍ତକାରୀ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି। ମୃତ୍ୟୁର କାରଣ ହତ୍ୟା ନା ଦୁର୍ଘଟଣାଜନିତ, ସେନେଇ ପୋଲିସ୍ ସମସ୍ତ୍ ଦିଗରୁ ତଦନ୍ତ ଜାରି ରଖିଛି।
