ମାନବିକତା ଦେଖାଇଲେ ବ୍ଲକ୍ ଉପାଧ୍ୟକ୍ଷା:ସ୍ଥଗିତ ରହିଲା ଅହୋରାତ୍ର ଧାରଣା

ନୟାଗଡ଼, (ଓଡ଼ିଶା ଲେଖା): ଦିନେ ଏକାଠି ହୋଇ କାମ କରୁଥିଲେ। କିନ୍ତୁ ଆଜି ଇଏ ବିରୋଧୀ। ଅଧ୍ୟକ୍ଷ ସିନା ମାନବିକତା ହରାଇଦେଲେ କିନ୍ତୁ ମାନବିକତା କାହାକୁ କୁହାଯାଏ, ତାହାର ଜ୍ୱଳନ୍ତ ଉଦାହରଣ ସାଜିଛନ୍ତି ନୟାଗଡ଼ ବ୍ଲକ୍ ଉପାଧ୍ୟକ୍ଷା। ବ୍ଲକ୍ ଅଧ୍ୟକ୍ଷଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆସିଥିବା ବେଳେ ଜାଣିଶୁଣି ଜିଲ୍ଲା ପ୍ରଶାସନ ଦିନ ପରେ ଦିନ ଗଡ଼େଇ ଚାଲିଛି ଯାହାକୁ ନେଇ ବ୍ଲକ୍ ଉପାଧ୍ୟକ୍ଷାଙ୍କ ସହ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ/ସଭ୍ୟା ମାନେ ଜିଲ୍ଲା ପ୍ରଶାସନ ବିରୋଧ ଜୁନ୍ ୧୭ତାରିଖରୁ ଅହୋରାତ୍ର ଧାରଣାରେ ବସିଲେ ବୋଲି ଚେତାବନୀ ଦେଇଥିଲେ। ଏବଂ ଅହୋରାତ୍ର ଧାରଣା ବସିଥାନ୍ତେ ମଧ୍ୟ। କିନ୍ତୁ ମାନବିକତା ଦେଖାଇବାକୁ ଯାଇ ଅହୋରାତ୍ର ଧାରଣା କିଛି ଦିନ ପାଇଁ ସ୍ତଗିତ ରଖାଯାଇଛି। କାରଣ ନୟାଗଡ଼ ବ୍ଲକ୍ ଅଧ୍ୟକ୍ଷଙ୍କ ମାତୃ ବିୟୋଗ କୁ ଦୃଷ୍ଟିରେ ରଖି ୧୭ ତାରିଖ ଠାରୁ ଆରମ୍ଭ ହେବାକୁ ଥିବା ଅହୋରାତ୍ର ଧାରଣା କାର୍ଯ୍ୟକ୍ରମ କୁ ସ୍ଥଗିତ ରଖିଲେ ସରପଞ୍ଚ ଓ ସମିତି ସଭ୍ୟ ମାନେ । ଏନେଇ ବ୍ଲକ୍ ଉପାଧ୍ୟକ୍ଷା ଲକ୍ଷ୍ମୀପ୍ରିୟା ସାହୁ ଜିଲ୍ଲାପାଳଙ୍କୁ ଜଣାଇଥିବା ସୂଚନା ମିଳିଛି। ୨୪ ଜୁନ୍ ସୁଦ୍ଧା ଯଦି ଅନାସ୍ଥା ପ୍ରସ୍ତାବ କାର୍ଯ୍ୟ ଆରମ୍ଭ ନହୁଏ ତେବେ ଅହୋରାତ୍ର ଧାରଣା କାର୍ଯ୍ୟକ୍ରମ କରାଯିବ ବୋଲି ବ୍ଲକ୍ଉ ପାଧ୍ୟକ୍ଷା ଶ୍ରୀମତୀ ସାହୁ ଉଲ୍ଲେଖ କରିଛନ୍ତି।