ନୟାଗଡ଼, (ଓଡ଼ିଶା ଲେଖା): ଶରଣକୂଳ ଥାନା କଟରାଝରୀ ନିକଟରେ ଡକାୟତୀ ଉଦ୍ୟମ ବିଫଳ । ଡକାୟତଙ୍କ ଗାଡି ଧକ୍କାରେ ମାର୍କେଟିଂରୁ ଫେରୁଥିବା ବ୍ଯକ୍ତି ଗୁରୁତର ହୋଇଥିବାବେଳେ ଜଣେ ଡକାୟତ ଆହତ ହୋଇଛି । ନୟାଗଡ ସହରର ଜଣେ ବ୍ଯବସାୟୀଙ୍କ ମାର୍କେଟିଂ କରୁଥିବା ନିରଞ୍ଜନ ମହାନ୍ତି ନାମକ ବ୍ଯକ୍ତି ଓଡଗାଁ ଅଞ୍ଚଳରୁ କଲେକ୍ସନ ସାରି ବାଇକରେ ଫେରୁଥିବାବେଳେ ରାତି ଅନ୍ଧାରର ସୁଯୋଗ ନେଇ ୩ଜଣ ଯୁବକ କଟରାଝରୀ ନିକଟରେ ତାଙ୍କ ଗାଡିକୁ ଧକ୍କା ଦେଇଥିଲେ । ଫଳରେ ନିରଞ୍ଜନ ଗାଡିରୁ ପଡି ଗୁରୁତର ଆହତ ହୋଇଛନ୍ତି । ସେପଟେ ୩ ଡକାୟତଙ୍କ ମଧ୍ଯରୁ ଜଣେ ମଧ୍ଯ ଆହତ ହୋଇଛି । ନିରଞ୍ଜନଙ୍କ ଠାରୁ ଡକାୟତମାନେ ଟଙ୍କା ବ୍ଯାଗ୍ ଛଡାଇବାକୁ ଉଦ୍ୟମ କରୁଥିବାବେଳେ ତାଙ୍କ ପାଟି ଶୁଣି ସ୍ଥାନୀୟଲୋକମାନେ ପଳାଇଆସିବାରୁ ଦୁଇ ଡକାୟତ ଘଟଣାସ୍ଥଳରୁ ପଳାଇଯାଇଥିଲେ । ଶରଣକୂଳ ଥାନା ପୋଲିସ ଖବରପାଇ ଘଟଣାସ୍ଥଳକୁ ଆସି ଦୁଇ ଆହତଙ୍କୁ ଶରଣକୂଳ ଏବଂ ପରେ ନୟାଗଡ ଡାକ୍ତରଖାନାକୁ ପଠାଇଥିଲା । ନିରଞ୍ଜନଙ୍କୁ ଗୁରୁତର ଅବସ୍ଥାରେ ଭୂବନେଶ୍ବର ସ୍ଥାନାନ୍ତର କରାଯାଇଥିବାବେଳେ ପୋଲିସ ଉପସ୍ଥିତିରେ ନୟାଗଡ ଡାକ୍ତରଖାନାରୁ ଆହତ ଡକାୟତକୁ ପରିବାର ଲୋକେ ଅଟୋରେ ନେଇଯାଇଛନ୍ତି । ନୟାଗଡ ଡାକ୍ତରଖାନାରେ ଆହତ ଡକାୟତ ଜଣକ ଗଣମାଧ୍ୟମ ପ୍ରତିନିଧିଙ୍କୁ ମଧ୍ଯ ଗାଳିଗୁଲଜ କରିଥିଲା । ପୋଲିସ ୨ଟି ବାଇକ୍ ଜବତ କରିବା ସହ ଟଙ୍କା ବ୍ଯାଙ୍କ ଉଦ୍ଧାର କରିଥିବା ସୂଚନା ମିଳିଛି ।
