ନୟାଗଡ଼, (ଓଡ଼ିଶା ଲେଖା): ନୟାଗଡ଼ ସଦର ଥାନା ଯଦୁପୁର ଗାଁରେ ଡକାୟତୀ। ୬ରୁ ଅଧିକ ଡକାୟତ ମନୋରଞ୍ଜନ ପାତ୍ରଙ୍କ ଘରେ ପଶି ବନ୍ଧୁକ ଦେଖାଇ ୩ଲକ୍ଷରୁ ଉର୍ଦ୍ଧ୍ବ ଟଙ୍କା ସହ ୭୦ଗ୍ରାମ ସୁନା ଏବଂ ଦେଢକେଜିରୁ ଅଧିକ ରୁପାଅଳଙ୍କାର ଲୁଟିନେଇଥିବା ଅଭିଯୋଗ ହୋଇଛି। ଡକାୟତଙ୍କ ଆକ୍ରମଣରେ ମନୋରଞ୍ଜନ ଏବଂ ତାଙ୍କ ସ୍ତ୍ରୀ ଆହତ ଥିବା ଜଣାପଡ଼ିଛି। ସୂଚନାନୁସାରେ, ମନୋରଞ୍ଜନ ପାତ୍ର ନୟାଗଡ ଖଣ୍ଡପଡା ରାସ୍ତା କଡରେ ଥିବା ନିଜ ଘରେ ପରିବାର ସହ ରୁହନ୍ତି ।
ସେ ପାନମସଲା ବ୍ୟବସାୟ କରନ୍ତି। ତେବେ ଗତକାଲି ରାତି ପ୍ରାୟ ୨ଟା ସମୟରେ ୬ରୁ ଅଧିକ ଡକାୟତ ବାରିପଟ ଗ୍ରିଲ୍ ଭାଙ୍ଗି ଘରେ ପଶିଥିଲେ । ଡକାୟତମାନେ ହାତରେ ବନ୍ଧୁକ ଏବଂ ଭୁଜାଲି ଆଦି ଦେଖାଇବା ସହ ମନୋରଞ୍ଜନ ଏବଂ ତାଙ୍କ ସ୍ତ୍ରୀଙ୍କୁ ଏକ ବାଉଁଶରେ ପ୍ରବଳ ମାଡ ମାରିଥିଲେ । ପରେ ଆଲମିରା ଭାଙ୍ଗି ନଗଦ ଟଙ୍କା ସୁନା ରୁପା ଲୁଟିନେଇଥିଲେ । ଖବର ପାଇ ସଦରଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
