ନୟାଗଡ଼, (ଓଡ଼ିଶା ଲେଖା): ଏବେ କିଛି ମାସ ହେଲା ଚର୍ଚ୍ଚାରେ ରହିଛି ଆଦିବାସୀ ଅଧ୍ୟୁଷିତ ଗାଁ ନେପାଳ । ଦିନେ ସେହି ଗାଁକୁ ଯିବାକୁ ରାସ୍ତା ନଥିଲା । ନେପାଳ ଗୋଟିଏ ଗାଁ ନୟାଗଡ଼ ଜିଲ୍ଲାରେ ଅଛି ତାହା କିଞ୍ଚିତ ଲୋକ ଜାଣିଥିଲେ । ବାରମ୍ବାର ଗଣମାଧ୍ୟମରେ ନେପାଳ ଗାଁ ସଂପର୍କିତ ଖବର ପ୍ରକାଶ ପରେ ଧୀରେ ଧୀରେ ସୁଧାର ଆସୁଛି ଏବଂ ସମସ୍ୟାର ସମାଧନ ହେଇ ଆସୁଛି । ତେବେ କିଛି ଦିନ ତଳେ ନୟାଗଡ଼ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲ ନେପାଳ ଗାଁରେ ପହଞ୍ଚି ସ୍ଥିତି ପରଖିବା ସହ ଗ୍ରାମବାସୀ ସହ ଆଲୋଚନା କରିଥିଲେ । ନେପାଳ ଗାଁର ବିକାଶ କିପରି ହେବ ତା ଉପରେ ସମୀକ୍ଷା କରିଥିଲେ ।
ଉକ୍ତ ଗାଁକୁ ପକ୍କା ରାସ୍ତା ନଥିବାରୁ କିପରି ବିଭାଗ ପାଖରେ ସୁପାରିସ କରାଯିବ ଏବଂ ରାସ୍ତା ନିର୍ମାଣ କରିବା ଅନୁମୋଦନ କରାଯିବ, ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁଙ୍କ ପରାମର୍ଶ କ୍ରମେ ଜିଲ୍ଲାପରିଷଦ ଅଧ୍ୟକ୍ଷ ଇ ଦେବାଶିଷ ପଟ୍ଟନାୟକ ନେପାଳ ଗାଁକୁ ଯାଇଥିଲେ ସ୍ଥାନୀୟ ଜନ ପ୍ରତିନିଧି ଓ ଗ୍ରାମବାସୀଙ୍କ ସହ ଆଲୋଚନା କରିଥିଲେ । ଏବଂ ଜିଲ୍ଲାପରିଷଦ ଦଶମ ସାଧାରଣ ଅଧିବେଶନ ବୈଠକରେ ନେପାଳ ଗାଁକୁ ରାସ୍ତା ନିର୍ମାଣ କରିବା ପ୍ରସ୍ତାବ ରଖିଥିଲେ । ଏହି ପ୍ରସ୍ତାବକୁ ଗୃହର ସମସ୍ତ ସଦସ୍ୟ ସଦସ୍ୟା ସମର୍ଥନ ଜଣାଇଥିଲେ ।
ତେବେ ଆଜି ଜିଲ୍ଲାପରିଷଦ ଅଧ୍ୟକ୍ଷ ଶ୍ରୀଯୁକ୍ତ ପଟ୍ଟନାୟକ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼ ସୁଶାନ୍ତ କୁମାର ଦାଶଙ୍କ ସହ ମେଡ଼ିକାଲ ଡାକ୍ତରଙ୍କୁ ଧରି ନେପାଳ ଗାଁରେ ପହଞ୍ଚିଥିଲେ । ଏବଂ ଏକ ସ୍ବାସ୍ଥ୍ୟ ପରୀକ୍ଷା ସେବା ଶିବିର ଆୟୋଜନ କରିଥିଲେ । ନେପାଳ ଗାଁର ସମସ୍ତ ଜନସାଧାରଣଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ସହ ମାଗଣା ଔଷଧ ବଣ୍ଟନ କରିଥିଲେ । ଗୋଟିଏ ପଟେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼ ସୁଶାନ୍ତ କୁମାର ଦାଶ କାର୍ଯ୍ୟରୁ ଅବସର ସମୟ ଗୋଟିଏ ଦିନ ପୂର୍ବରୁ ଆଦିବାସୀ ଅଧ୍ୟୁଷିତ ଗାଁରେ ପହଞ୍ଚି ଲୋକଙ୍କୁ ସ୍ବାସ୍ଥ୍ୟ ସେବା ଯୋଗାଇ ଦେବା, ତାଙ୍କ ପାଇଁ ଏକ ସ୍ମରଣୀୟ ଦିନ ।
ଉକ୍ତ ସ୍ବାସ୍ଥ୍ୟ ପରୀକ୍ଷା ସେବା କାର୍ଯ୍ୟକ୍ରମରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼ ଦାଶଙ୍କୁ ଜିଲ୍ଲା ପରିଷଦ ଅଧ୍ୟକ୍ଷ ଶ୍ରୀଯୁକ୍ତ ପଟ୍ଟନାୟକଙ୍କ ସହ ଜିଲ୍ଲା ପରିଷଦ ସଭ୍ୟା ଝିଲ୍ଲି ପ୍ରଧାନ, ବିରଜାଲକ୍ଷ୍ମୀ ସାହୁ, ବ୍ଲକ୍ ଅଧ୍ୟକ୍ଷ ଲୋକନାଥ ସାହୁ ଓ ନେପାଳ ଗ୍ରାମ ବାସୀ ମିଶି ଚାକିରୀର ଅବସର କାଳୀନ ବିଦାୟ ସମ୍ୱର୍ଦ୍ଧନା ଜଣାଇଥିଲେ । ଉକ୍ତ କାର୍ଯ୍ୟକ୍ରମରେ ଓଡ଼ଗାଁ ବ୍ଲକର କିଛି ସରପଞ୍ଚ ସମିତି ସଭ୍ୟ ସଭ୍ୟା ଓ ସ୍ଵାସ୍ଥ୍ୟ କର୍ମୀ ମାନେ ଉପସ୍ଥିତ ଥିଲେ ।
