ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଏଣିକି ମିଳିବ ଉତ୍ତମ ସ୍ୱାସ୍ଥ୍ୟ ସେବା । ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ପାଞ୍ଚ ମହଲା ବିଲ୍ଡିଂର ପ୍ରଥମ ମହଲାରେ ସ୍ପର୍ଶ ହେଲଥ୍ କେୟାର ଦ୍ୱାରା କର୍କଟ ରୋଗର ସ୍କ୍ରିନିଂ, ପରାମର୍ଶ ଏବଂ ବର୍ହିବିଭାଗ ଚିକିତ୍ସାର ସୁବିଧା ସୁଯୋଗ ପାଇଁ ଆଜି ଏହାର ବର୍ହିବିଭାଗ(ଓପିଡି) ର ଶୁଭାରମ୍ଭ କରାଯାଇଛି । ନୟାଗଡ଼ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲା ମୁଖ୍ୟ ଅତିଥି ଭାବେ ଯୋଗ ଦେଇ କର୍କଟ ରୋଗର ସ୍କ୍ରିନିଂ, ପରାମର୍ଶ ଏବଂ ବର୍ହିବିଭାଗ ଶୁଭ ଉଦ୍ଘାଟନ କରିଛନ୍ତି । କର୍କଟ ସମ୍ବନ୍ଧୀୟ ସେବାକୁ ବୃଦ୍ଧି କରିବା ଏବଂ ଏହି ଅଞ୍ଚଳର ରୋଗୀମାନଙ୍କ ପାଇଁ ଉତ୍ତମ ସୁବିଧା ସୁଯୋଗ ଯୋଗାଇଦେବା ଏହାର ମୁଖ୍ୟ ଉଦେଶ୍ୟ ରହିଛି।
ଏହି ପଦକ୍ଷେପ ଚିକିତ୍ସା ସେବା କ୍ଷେତ୍ରରେ ନିରନ୍ତର ଉନ୍ନତି ଆଣିବା ଏବଂ ସମାଜରେ କ୍ଲିନିକାଲ୍ ସେବାକୁ ସଶକ୍ତ କରିବା ପାଇଁ ସ୍ପର୍ଶ ହେଲଥ୍ କେୟାର ଲକ୍ଷ୍ୟ ଧାର୍ଯ୍ୟ କରିଛି । ସ୍ପର୍ଶ ହେଲଥ୍ କେୟାର ଏଭଳି ପଦକ୍ଷେପକୁ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼ ସୁଶାନ୍ତ କୁମାର ଦାସଙ୍କ ତତ୍ଵବଧାନ ଆୟୋଜିତ କାର୍ଯ୍ୟକ୍ରମରେ ସମ୍ମାନୀତ ଅତିଥି ଭାବେ ସ୍ପର୍ଶ ହସ୍ପିଟାଲ୍ର ପ୍ରତିଷ୍ଠାତା ଏବଂ ମୁଖ୍ୟ ପରିଚାଳନା ଅଧ୍ଯକ୍ଷ ଡ଼ ପ୍ରିୟବତ ଧୀର, ଜିଏମ୍ ସୈାମେନ୍ଦ୍ର ମିଶ୍ରଙ୍କ ସହ ସ୍ଥାନୀୟ କର୍ମଚାରୀ ରବୀନ୍ଦ୍ର କୁମାର ଦାଶ ପ୍ରମୂଖ ଉପସ୍ଥିତ ରହିଥିଲେ । ସ୍ୱାସ୍ଥ୍ୟ ବିଭାଗ କର୍ମଚାରୀ, ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧିମାନେ କାର୍ଯ୍ୟକ୍ରମରେ ସାମିଲ ହୋଇଥିଲେ ।
