ନୟାଗଡ଼, (ଓଡ଼ିଶା ଲେଖା): ନୟାଗଡ଼ ମୁଖ୍ୟ ଚିକିତ୍ସାଳୟରେ ଅଲଟ୍ରାସାଉଣ୍ଡ ସେବାକୁ ନେଇ ଏବେ ଗୁରୁତର ପ୍ରଶ୍ନ ଉଠିଛି। ହସ୍ପିଟାଲ ପରିସରରେ ଅଲଟ୍ରାସାଉଣ୍ଡ ଗୃହ ଥିବା ସତ୍ତ୍ୱେ ସେଠାରେ ତାଲା ପଡ଼ିଥିବା ଅଭିଯୋଗ ହେଉଛି। ଫଳରେ ପ୍ରତିଦିନ ଶହଶହ ପ୍ରସୂତି ମହିଳାଙ୍କୁ ଘରୋଇ ଅଲଟ୍ରାସାଉଣ୍ଡ କ୍ଲିନିକ୍ର ଦ୍ୱାରସ୍ଥ ହେବାକୁ ପଡ଼ୁଥିବା ଅଭିଯୋଗ ରହିଛି।ସରକାରୀ ହସ୍ପିଟାଲରେ ଲକ୍ଷଲକ୍ଷ ଟଙ୍କା ବ୍ୟୟରେ ଅତ୍ୟାଧୁନିକ ଅଲଟ୍ରାସାଉଣ୍ଡ ମେସିନ ଉପଲବ୍ଧ ଥିବା ସତ୍ତ୍ୱେ ତାହା ଯଦି ବ୍ୟବହାର ନହୋଇ ଅଚଳ ଅବସ୍ଥାରେ ପଡ଼ିରହେ, ତେବେ ଏହାର ଉଦ୍ଦେଶ୍ୟ ନେଇ ସାଧାରଣ ଲୋକଙ୍କ ମନରେ ସ୍ୱାଭାବିକ ଭାବେ ପ୍ରଶ୍ନ ଉଠିବା ସ୍ୱାଭାବିକ। ବିଶେଷକରି ଗର୍ଭବତୀ ମହିଳାମାନେ ସରକାରୀ ହସ୍ପିଟାଲରେ ମାଗଣା କିମ୍ବା ସୁଲଭ ମୂଲ୍ୟରେ ଅଲଟ୍ରାସାଉଣ୍ଡ ସେବା ପାଇବାରୁ ବଞ୍ଚିତ ହୋଇ ଘରୋଇ କ୍ଲିନିକ୍କୁ ଯିବାକୁ ବାଧ୍ୟ ହେଉଥିବା ଅଭିଯୋଗ ଗୁରୁତର ଚିନ୍ତାର ବିଷୟ। ଘରୋଇ କ୍ଲିନିକ୍ଗୁଡ଼ିକରେ ରୋଗୀଙ୍କ ଭିଡ଼ ବଢ଼ୁଥିବା ବେଳେ ସରକାରୀ ହସ୍ପିଟାଲର ମେସିନ ଓ ସୁବିଧା ଅବ୍ୟବହୃତ ହୋଇ ପଡ଼ିରହିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଉଛି। ଏହା ପଛରେ କାହାର ଦାୟିତ୍ୱହୀନତା ରହିଛି? ସରକାରୀ ସ୍ୱାସ୍ଥ୍ୟସେବାକୁ ଅଚଳ ରଖି ଘରୋଇ ସ୍ୱାସ୍ଥ୍ୟ ବ୍ୟବସାୟକୁ ସୁଯୋଗ ଦିଆଯାଉଛି କି? ଯଦି ସରକାରୀ ଅଲଟ୍ରାସାଉଣ୍ଡ ମେସିନ କାର୍ଯ୍ୟକ୍ଷମ ଅଛି, ତେବେ ସେବା କାହିଁକି ମିଳୁନାହିଁ—ଏଭଳି ଅନେକ ପ୍ରଶ୍ନ ଏବେ ସାଧାରଣ ଲୋକଙ୍କ ମନରେ ଉଠିଛି। ତେଣୁ ଏହି ଘଟଣାର ନିରପେକ୍ଷ ତଦନ୍ତ କରାଯାଇ ସରକାରୀ ଅଲଟ୍ରାସାଉଣ୍ଡ ସେବା ତୁରନ୍ତ ଚାଲୁ କରିବାକୁ ଦାବି ହେଉଛି। ଗର୍ଭବତୀ ମା’ମାନଙ୍କୁ ଅନାବଶ୍ୟକ ଖର୍ଚ୍ଚ ଓ ହଇରାଣରୁ ମୁକ୍ତ କରି ସରକାରୀ ସ୍ୱାସ୍ଥ୍ୟସେବାର ସୁଯୋଗ ଦେବା ଆବଶ୍ୟକ। ପ୍ରସୂତି ‘ସୁଭଦ୍ରା ମା’ମାନଙ୍କ ପ୍ରତି ଅନ୍ୟାୟ ବିରୋଧରେ ସ୍ୱର ଉଠାଇବା ଏବଂ ସରକାରୀ ସ୍ୱାସ୍ଥ୍ୟସେବା ସୁନିଶ୍ଚିତ ହେବା ପର୍ଯ୍ୟନ୍ତ ସଂଘର୍ଷ ଜାରି ରହିବ ଜିଲ୍ଲା କଂଗ୍ରେସ ପକ୍ଷରୁ ଜିଲ୍ଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷଙ୍କୁ କଡ଼ା ଚେତାବନୀ ଦିଆଯାଇଛି।
ନୟାଗଡ଼ ମୁଖ୍ୟ ଚିକିତ୍ସାଳୟରେ ଅଲଟ୍ରାସାଉଣ୍ଡ ଗୃହରେ ତାଲା ! ସରକାରୀ ମେସିନ ଅଚଳ:ଘରୋଇ କ୍ଲିନିକ୍ରେ ପ୍ରସୂତି ମହିଳାଙ୍କ ଲମ୍ବା ଲାଇନ
