ନୟାଗଡ଼, (ଓଡ଼ିଶା ଲେଖା): ୧୪ବର୍ଷର ସଂଘର୍ଷ ପରେ ବି ମିଳୁନି ନ୍ୟାୟ । ହରାଇ ଥିବା ନିଯୁକ୍ତି ଫେରି ପାଇବା ପାଇ ଆମରଣ ଅନଶନରେ ନୂଆଗାଁ ବ୍ଲକ୍ ବରକୋଳା ଗ୍ରାମର ସୁରେଶନ ନାୟକ। ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନ ୩ଦିନରେ ପହଞ୍ଚିଲାଣି କିନ୍ତୁ ସମସ୍ୟାର ସମାଧାନ କଣ ହେବ ତାଙ୍କୁ ବିଭିନ୍ନ ପ୍ରକାରର ଧମକ ଦିଆଯାଉଥିବା ଓ ଚାପ ପକାଯାଉଥିବା ନେଇ ସାଙ୍ଘାତିକ ଅଭିଯୋଗ ଆଣଛନ୍ତି ସୁରେଶନ୍ ନାୟକ। ସୂଚନାନୁସାରେ, ୨୦୦୮ ମସିହାରେ ପ୍ରକାଶିତ ବିଜ୍ଞପ୍ତି ଅନୁସାରେ ସେ ଜିଆର୍ଏସ୍ ପଦବୀ ପାଇଁ ଆବେଦନ କରିଥିଲେ । ଶୁରସେନଙ୍କ ନାଁ ଚୂଡ଼ାନ୍ତ ତାଲିକାର ତୃତୀୟ ସ୍ଥାନରେ ରହିଥିଲା । ପ୍ରଥମ ଓ ଦ୍ୱିତୀୟ ସ୍ଥାନରେ ରହିଥିବା ପ୍ରାର୍ଥୀ ଚାକିରୀ ନକରିବାରୁ ଶୁରସେନ୍ ଚାକିରୀ ପାଇବା ପାଇଁ ହକଦାର ରହିଥିଲେ । ଏହାକୁ ନେଇ ତତ୍କାଳୀନ କାପ୍ତାପଲ୍ଲୀ ସରପଞ୍ଚ ତାଙ୍କୁ ଅସ୍ଥାୟୀ ଭାବେ ମଧ୍ୟ ପଞ୍ଚାୟତରେ କାର୍ଯ୍ୟ କରାଇଥିଲେ । ଦୀର୍ଘ ୧୦ ମାସ ଧରି ସେ କାର୍ଯ୍ୟ କରିଥିଲେ ମଧ୍ୟ ତାଙ୍କୁ ନିଯୁକ୍ତି ମିଳିବା ବଦଳରେ ବାହାର କରି ଦିଆଯାଇଥିଲା ।
ଏହାକୁ ନେଇ ଶୁରସେନ୍ ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ । ଉଚ୍ଚ ନ୍ୟାୟାଳୟ ୨୦୧୧ ମସିହାରେ ତାଙ୍କୁ ନିଯୁକ୍ତି ଦେବାକୁ ଜିଲ୍ଲା ପ୍ରଶାସନ ତଥା ତତ୍କାଳୀନ ଜିଲ୍ଲା ପରିଷଦ ପ୍ରକଳ୍ପ ନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶ କାର୍ଯ୍ୟକାରୀ କରାନଯିବାରୁ, ସେ ପୁଣି ରିଟ୍ ପିଟିସନ୍ ଦାଖଲ କରିଥିଲେ । ପୁର୍ନବାର ଉଚ୍ଚ ନ୍ୟାୟାଳୟ ପୂର୍ବ ନିର୍ଦ୍ଦେଶ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଛନ୍ତି । ଦୀର୍ଘ ୧୪ ବର୍ଷ ଅତିକ୍ରାନ୍ତ କରିଥିଲେ ମଧ୍ୟ ଆଜି ପର୍ଯ୍ୟନ୍ତ ଶୁରସେନଙ୍କୁ ନିଯୁକ୍ତି ମିଳିପାରିନାହିଁ । ଅସହାୟ ଓ ଦଳିତ ହୋଇଥିବାରୁ ତାଙ୍କ କଥାକୁ କୈାଣସି ପ୍ରଶାସନିକ ଅଧିକାରୀ କର୍ଣ୍ଣପାତ କରୁନଥିବା ଶୁରସେନ କହିଛନ୍ତି । ଫଳରେ ୩ ଦିନ ହେଲା ଶୁରସେନ ଜିଲ୍ଲାପାଳଙ୍କ କାର୍ଯ୍ୟାଳୟରେ ଆମରଣ ଅନଶନରେ ବସିଥିବା ଦେଖାଯାଇଛି ।
