ପୋଲିସ ଓ ଏମ୍ସ ହସ୍ପିଟାଲରେ ନିଯୁକ୍ତି କରେଇ ଦେବା ନାଁରେ ଠକେଇ:କମଳିନୀ ପାଟ୍ଟଶାଣୀ ଗିରଫ ଦୁଇ ସହଯୋଗୀ ଫେରାର

ନୟାଗଡ଼, (ଓଡ଼ିଶା ଲେଖା): ଓଡ଼ିଶା ପୋଲିସ ଓ ଏମ୍ସ ହସ୍ପିଟାଲରେ ନିଯୁକ୍ତି କରେଇଦେବା ନେଇ ଜଣେ ମହିଳା ନେତ୍ରୀ ଗିରଫ ହୋଇଥିବା ବେଳେ ଦୁଇ ସହଯୋଗୀ ଫେରାର ହୋଇଯାଇଥିବା ଜଣାପଡ଼ିଛି । ଲକ୍ଷାଧିକ ଟଙ୍କା ନେଇ ନିଯୁକ୍ତି ନାଁରେ ଠକି ନେଇଥିବା ନାରୀ ନେତ୍ରୀ ଜଣଙ୍କ ହେଲେ କମଳିନୀ ପାଟ୍ଟଶାଣୀ । ସୂଚନାନୁସାରେ, ନୟାଗଡ଼ ଜିଲ୍ଲା ଇଟାମାଟି ଥାନା ଅଞ୍ଚଳରୁ ୭ଜଣ ଯୁବକ ଯୁବତୀଙ୍କୁ ଓଡ଼ିଶା ପୋଲିସ୍ ଓ ଏମ୍ସ ହସ୍ପିଟାଲରେ ଚାକିରୀ କରେଇ ଦେବା ନେଇ ନାରୀ ନେତ୍ରୀ କମଳିନୀ ପାଟ୍ଟଶାଣୀ ୧୪ରୁ ୧୫ଲକ୍ଷ ଟଙ୍କା ନେଇଥିଲେ । ତେବେ ଟଙ୍କା ନେବା ପରେ ଉକ୍ତ ଯୁବକ ଯୁବତୀଙ୍କୁ କମଳିନୀ ପାଟ୍ଟଶାଣୀ ଧରା ଛୁଆଁ ଦେଇନଥିଲେ । ଯାହାଫଳରେ ବାଧ୍ୟ ହୋଇ ଯୁବକ ଯୁବତୀ ମାନେ ଇଟାମାଟି ଥାନାର ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିଥିଲେ । ଇଟାମାଟି ପୋଲିସ୍ ଥାନାରେ କେସ ନଂ ୨୦୯/୨୫ରେ ମାମଲା ୠଜୁ କରି ତଦନ୍ତ ଆରମ୍ଭ କରିଥିଲେ ଏସଆଇ ସାଗରିକା ସାମଲ । ତଦନ୍ତରୁ ଅଭିଯୋଗର ସତ୍ୟାସତ୍ୟ ଥିବା ଜଣାପଡିବା ପରେ ଆଜି ନାରୀ ନେତ୍ରୀ କମଳିନୀ ପାଟ୍ଟଶାଣୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ ଏସଆଇ ସାଗରିକା ସାମଲ । କମଳିନୀ ପାଟ୍ଟଶାଣୀଙ୍କୁ ସାହାଯ୍ୟ ସହଯୋଗ କରୁଥିବା ଦୁଇ ସହଯୋଗୀ ଫେରାର ହୋଯାଇଛନ୍ତି । ଫେରାର ଥିବା ଦୁଇ ସହଯୋଗୀଙ୍କୁ ଇଟାମାଟି ପୋଲିସ୍ ଖୁବଶୀଘ୍ର ଗିରଫ କରାଯିବ ବୋଲି ଇଟାମାଟି ଥାନା ଅଧିକାରୀ ପ୍ରିୟବ୍ରତ ରାଉତ ସୂଚନା ଦେଇଛନ୍ତି ।