ନୟାଗଡ ଜିଲ୍ଲା ବ୍ୟାପି ସାର ବଣ୍ଟନରେ ବ୍ୟାପକ ଘୋଟାଲା:ହାହାକାର ପରିସ୍ଥିତି ପାଇଁ ଜିଲ୍ଲାପାଳଙ୍କୁ ଦାୟୀ କଲା କଂଗ୍ରେସ

ନୟାଗଡ଼, (ଓଡ଼ିଶା ଲେଖା): ନୟାଗଡ ଜିଲ୍ଲାରେ ବ୍ୟାପି ଚାଲିଛି ସାର ଅଭାବ l ୟୁରିଆ ସାର ବଣ୍ଟନ ପ୍ରକ୍ରିୟାରେ ଘୋର ବିଭ୍ରାଟ ପାଇଁ ନୟାଗଡ ଜିଲ୍ଲପାଳଙ୍କୁ ପ୍ରତ୍ୟକ୍ଷ ଭାବେ ଦାୟୀ କରିଛି କଂଗ୍ରେସ l ଅଗଷ୍ଟ ମାସରେ ଜିଲ୍ଲା କୃଷି ବିଭାଗ ତତ୍ୱାବଧାନରେ କେତେକ ହାତଗଣତି ବଡ଼ବଡ଼ ଘରୋଇ ବ୍ୟବସାୟୀ ଙ୍କୁ ୪୩00 ମେଟ୍ରିକଟନ ସାର ଦିଆ ଯାଇଥିଲା ମାତ୍ର ଏହି ପ୍ରଚୁର ପରିମାଣ ସାର ଧାନ ମଣ୍ଡି ପଞ୍ଜିକୃତ କିମ୍ବା ଖରିଫ ଋଣ ନେଇଥିବା ଚାଷୀ ମାନଙ୍କୁ ଦିଆ ନଯାଇ ଖୋଲା ବଜାର ରେ କଳାବଜାରୀ କରାଯାଇ ୟୁରିଆ ବସ୍ତା ପ୍ରତି ୧000 ଟଙ୍କାରେ ବିକ୍ରି କରାଯିବା ଯୋଗୁଁ ସେପ୍ଟେମ୍ବର ମାସରେ ପ୍ରକୃତ ଚାଷୀ ମାନେ ସାର ପାଇଁ ଡହଳବିକଳ ହେଉଥିବା ଅଭିଯୋଗ କରିଛନ୍ତି  ନୟାଗଡ କଂଗ୍ରେସର ବିଧାୟକ ପ୍ରାର୍ଥୀ ରଣଜିତ ଦାଶ l ଏହି ସାର ବଣ୍ଟନ ବିଭ୍ରାଟ ପାଇଁ ଶ୍ରୀ ଦାଶ ନୟାଗଡ ଜିଲ୍ଲାପାଳ ଙ୍କୁ ଦାୟୀ କରଛନ୍ତି l କାରଣ ଯେତେବେଳେ ସାର କଳାବଜାରୀ ହେଉଥିବା ଚାଷୀ ମାନେ ବାରମ୍ବାର ଅଭିଯୋଗ କରୁଥିଲେ ସେତେବେଳେ ଜିଲ୍ଲପାଳ ଉଚିତ କାର୍ଯ୍ୟାନୁଷ୍ଠାନ ନେଲେ ନାହିଁ, ଯାହାଫଳରେ ସାର ଅଭାବୀ ବିକ୍ରି ଦର୍ଶାଇ କଳାବଜାରୀ ବଢିଚାଲିଛି l ଆଜି ଜିଲ୍ଲାପାଳଙ୍କ କାର୍ଯ୍ୟାଳୟରେ ଶହଶହ ଚାଷୀ ସାର ପାଇଁ ଧାରଣା ଦେଇ ବସିଥିବାରୁ ପରିସ୍ଥିତି ଅଣାୟତ ହେବାରୁ ପୋଲିସ ଲଗାଇ ଚାଷୀଙ୍କୁ ଘଉଡ଼ାଇ ଦିଆଯାଇ ଥିଲା l ପ୍ୟାକ୍ସ ମାଧ୍ୟମରେ ଯେଉଁ ସାର ଚାଷୀଙ୍କୁ ଦିଆ ଯାଉଛି ତାହା ସମୁଦ୍ରକୁ ଶଙ୍ଖେ l ଓଡଗାଁ କୁରାଳ ସୁନାମୁହିଁ କୋମଣ୍ଡ ସରଧାପୁର ଇଟାମାଟି ବିରୁଡ଼ା ନଛିପୁର ଲଷ୍ମୀପ୍ରସାଦ ଭଳି ବହୁ ପ୍ୟାକ୍ସରେ ସାର ପହଁଞ୍ଚି ପାରି ନଥିବା ଅଭିଯୋଗ କରିଛନ୍ତି ଶ୍ରୀ ଦାଶ l ଆଜି ବିରୁଡ଼ା ମର୍ଦରାଜପୁର ପ୍ୟାକ୍ସରେ ସାର ପାଇନଥିବା ଶତାଧିକ ଚାଷୀ ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଛନ୍ତି l ନୟାଗଡ ଜିଲ୍ଲା ପାଇଁ ସର୍ବମୋଟ ୮000 ମେଟ୍ରିକଟନ ସାର ଆବଶ୍ୟକତା ଥିବା ବେଳେ ଅଦ୍ୟାବଧି ୭000 ମେଟ୍ରିକଟନ ସାର ଜିଲ୍ଲାରେ ପହଁଞ୍ଚି ସାରିଲାଣି କିନ୍ତୁ ଘରୋଇ ବ୍ୟବସାୟୀଙ୍କ ସାର କଳାବଜାରୀ ପାଇଁ ଆଜି ସମଗ୍ର ନୟାଗଡ ଜିଲ୍ଲାରେ ସାର ସଙ୍କଟ ଦେଖାଦେଇଛି l ଜିଲ୍ଲାର ସମସ୍ତ ପ୍ୟାକ୍ସ ସମ୍ପାଦକଙ୍କୁ ବାଧ୍ୟତାମୂଳକ ଭାବେ ପର୍ଯ୍ୟାପ୍ତ ପରିମାଣ ସାର ଯୋଗାଇ ସାର ସଙ୍କଟ ଦୂର କରିବା ପାଇଁ ନୟାଗଡ କଂଗ୍ରେସ ପକ୍ଷରୁ ଦାବୀ କରାଯାଇଛି l ପୂର୍ବତନ ବ୍ଲକ କଂଗ୍ରେସ ସଭାପତି ଫକୀର ଚରଣ ମଲ୍ଲ ଏବଂ ଜିଲ୍ଲା ଛାତ୍ର କଂଗ୍ରେସ ସଭାପତି ଶିବରଞ୍ଜନ ସାହୁ ପ୍ରମୁଖ ଜିଲ୍ଲାପାଳଙ୍କ କାର୍ଯ୍ୟାଳୟ ରେ ଆନ୍ଦୋଳନରତ ଚାଷୀଙ୍କୁ ତତ୍କାଳ ସାର ଯୋଗାଣ ପାଇଁ ଡିଆରସିଏସଙ୍କ ସହ ଆଲୋଚନା କରିଥିଲେ l