ନୟାଗଡ଼, (ଓଡ଼ିଶା ଲେଖା): କବିସୂର୍ଯ୍ୟ ସଦାନନ୍ଦ ବ୍ରହ୍ମା ସାହିତ୍ୟ ଓ ସଂସ୍କୃତି ପରିଷଦ, ନୟାଗଡ଼ ପକ୍ଷରୁ ରାଜ୍ୟସ୍ତରୀୟ ବର୍ଷା କବିତା ଆସର ଓ ପଣ୍ଡିତ କୈଳାସ ଚନ୍ଦ୍ର ରଥଙ୍କ ରଚିତ ‘ଶ୍ରୀମଦ୍ ସଂକ୍ଷିପ୍ତ ଭାଗବତ ବୃକ୍ଷ’ (ସପ୍ତାକ୍ଷରୀ ଛନ୍ଦ) ପୁସ୍ତକର ଲୋକାର୍ପଣ ଉତ୍ସବ ରବିବାର ପୂର୍ବାହ୍ନରେ ପଞ୍ଚାୟତ ସମିତି ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ପରିଷଦ ସଭାପତି ତଥା ସମାଜସେବୀ ପ୍ରମୋଦ ପଟ୍ଟନାୟକଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ମୁଖ୍ୟ ଅତିଥି ଭାବେ ନୟାଗଡ଼ ଜିଲ୍ଲାପାଳ ମଧୁମିତା ରଥ ଯୋଗଦେଇ ‘ସଂକ୍ଷିପ୍ତ ଭାଗବତ’ ପୁସ୍ତକର ଲୋକାର୍ପଣ କରିଥିଲେ। କବି ଅଶୋକ ମଲ୍ଲ ପୁସ୍ତକଟିର ସମୀକ୍ଷା କରିଥିଲେ। ଅନ୍ୟତମ ଅତିଥି ଭାବେ ବିଶିଷ୍ଟ ସାହିତ୍ୟିକ ତଥା ଅଭିମନ୍ୟୁ ସାମନ୍ତ ସିଂହାର ସାହିତ୍ୟ ଗବେଷକ କବି ଡ଼ ଶରତ କୁମାର ଜେନା, ଆକାଶବାଣୀ କଟକ କେନ୍ଦ୍ରର ସ୍ୱୀକୃତିପ୍ରାପ୍ତ ଗୀତିକାର, କବି, ଉଦ୍ଘୋଷକ ତଥା ନାଟ୍ୟକାର ବିରଞ୍ଚି ନାରାୟଣ ତ୍ରିପାଠୀ ଏବଂ ସୁସାହିତ୍ୟିକ ତଥା ସୁବକ୍ତା କବି ଡ଼ ନିତ୍ୟ ସୁନ୍ଦର ସିଆ ପ୍ରମୁଖ ଯୋଗଦେଇ ବର୍ଷାକୁ ନେଇ ରଚିତ ବିଭିନ୍ନ କାବ୍ୟ ଓ କବିତା ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ସଭା ପ୍ରାରମ୍ଭରେ ଅତିଥିମାନେ ଶ୍ରୀଜଗନ୍ନାଥଙ୍କ ପ୍ରତିମୂର୍ତ୍ତିରେ ଧୂପ ଓ ପୁଷ୍ପ ଅର୍ପଣ କରିଥିଲେ।
ରାଜ୍ୟସ୍ତରୀୟ ବର୍ଷା କବିତା ଆସର
ଏହି ଅବସରରେ ଲେଖକ ପଣ୍ଡିତ କୈଳାସ ଚନ୍ଦ୍ର ରଥ, ଶିଶୁ କବି ଲକ୍ଷ୍ମୀକାନ୍ତ ଖୁଣ୍ଟିଆ, ପ୍ରକାଶକ ଶୁଭ କିଶୋର ଦାଶ, କବି ରମେଶ ଚନ୍ଦ୍ର ରଥ ଓ ଶାନ୍ତିଲତା ରଥଙ୍କୁ ଅତିଥିମାନଙ୍କ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା।ଅନୁଷ୍ଠାନର ସମ୍ପାଦକ ତଥା କଣ୍ଠଶିଳ୍ପୀ ଓ କବି ପ୍ରଶାନ୍ତ କୁମାର ଦାଶ ସ୍ୱାଗତ ଭାଷଣ ଦେଇଥିବା ବେଳେ ସହ-ସମ୍ପାଦକ ଲକ୍ଷ୍ମୀଧର ସାହୁ ଧନ୍ୟବାଦ ଅର୍ପଣ କରିଥିଲେ। ଅଧ୍ୟାପିକା ନୀଳିମା ନନ୍ଦ, ରବୀନ୍ଦ୍ର ମହାପାତ୍ର, ନୀଳମାଧବ ମିଶ୍ର, ବଂଶୀଧର ମହାପାତ୍ର ଓ ଗୀତାଞ୍ଜଳି ଦଳେଇଙ୍କ ମିଳିତ ସଂଯୋଜନାରେ ଆୟୋଜିତ କବିତା ଆସରରେ ଜିଲ୍ଲାର ବିଭିନ୍ନ ଅଞ୍ଚଳରୁ ଶତାଧିକ କବି ଯୋଗଦେଇ ସ୍ୱରଚିତ କବିତା ପାଠ କରିଥିଲେ। ଏହି ଅବସରରେ ସମସ୍ତ କବିଙ୍କୁ ଅନୁଷ୍ଠାନ ପକ୍ଷରୁ ଉପଢୌକନ ଓ ମାନପତ୍ର ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା।
