ନୟାଗଡ଼, (ଓଡ଼ିଶା ଲେଖା): ଉତ୍ତମ ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ରାଜ୍ୟ ସରକାର ଦିନ ରାତି ଏକ କରିଦେଉଥିବା ବେଳେ କିଛି ଅସାଧୁ କର୍ମଚାରୀଙ୍କ ପାଇଁ ସରକାର ଭଲ କାମ କରି ମଧ୍ଯ କଳଙ୍କ ମୁଣ୍ଡାଉଛି। ଇସିଜି ଟେଷ୍ଟ ଭଳି ଗୁରୁତ୍ବପୂର୍ଣ୍ଣ ଟେଷ୍ଟକୁ ଜଣେ ଆଟେଣ୍ଟାଣ୍ଡ କରୁଥିବା ଦେଖିବାକୁ ମିଳିଥିଲା ଏବଂ ଭୁଲ୍ ଭାଲ ରିପୋର୍ଟ୍ ଦେଇଥିବାରୁ ଡାକ୍ତର ମଧ୍ୟ ଅସନ୍ତୁଷ୍ଟ। କଥାରେ ଅଛି ମାଙ୍କଡ଼ ହାତରେ ଶାଳଗ୍ରାମ୍, ସେହିପରି ନ୍ୟାୟରେ ଚାଲିଛି ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ । ସୁଇପର ସୁପରଭାଇଜର ଏଠି ସାଜିଛି ଆଟେଣ୍ଟାଣ୍ଡ ଏବଂ ଆଟେଣ୍ଟାଣ୍ଡ ହୋଇ ଦୁଃସାହସିକ କାମ କରି ରୋଗୀଙ୍କୁ ଅନ୍ଧାରକୁ ଠେଲି ଦେବାକୁ ପ୍ରୟାସ କରିଛି। ଏମିତିକି ଇସିଜି ମେସିନ୍ ଠିକ୍ ରେ ଚଳାଇବା ଶିଖି ନଥିବା ଯୋଗୁଁ ଭୁଲ୍ ରିପୋର୍ଟ ବାହାରିବା ଏବଂ ଶୁକ୍ରବାର ଇସିଜି ମେସିନ୍ ଖରାପ୍ ହେବା ତାହାର ଜ୍ୱଳନ୍ତ ଉଦାହରଣ।
ଶୁକ୍ରବାର ଦିନ ଇସିଜି କରିବା ପାଇଁ ରୋଗୀ ଲାଇନ୍ ଲାଗିଥିବା ବେଳେ ଇସିଜି ମେସିନ୍ ଖରାପ୍ ହୋଇଯାଇଥିଲା। ଯାହାକୁ ନେଇ ୩ରୁ ୪ଘଣ୍ଟା ହେବ ଇସିଜି ଟେଷ୍ଟ ସେବାରେ ବ୍ୟାଘାତ ସୃଷ୍ଟି ହୋଇଥିଲା। ଯେଉଁଥି ପାଇଁ କୋଡ଼ିଏରୁ ଉର୍ଦ୍ଧ୍ବ ରୋଗୀ ହନ୍ତସନ୍ତ ହୋଇଥିବା ଦେଖିବାକୁ ମିଳିଥିଲା। ତେବେ ଠିକ୍ ଠାକ୍ ଚାଲୁଥିବା ମେସିନ୍ କାହିଁକି ଖରାପ୍ ହେଲା ? ଇସିଜି ମେସିନ୍ ଚଳାଇବାରେ ଅଭିଜ୍ଞ ନଥିବା ପ୍ରଭାତ କୁମାର ପଣ୍ଡାଙ୍କ ପାଇଁ ହେଇନି ତ ? ଏଭଳି କିଛି ପ୍ରଶ୍ନ ରୋଗୀ ଓ ରୋଗୀଙ୍କ ସହଯୋଗୀ ମାନଙ୍କ ମନରେ ବଡ ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ଦୀର୍ଘ ଘଣ୍ଟା ଅପେକ୍ଷା କରିବା ପରେ ଟେକ୍ନିସିଆନ୍ ଆସି ଇସିଜି ମେସିନ୍ ଠିକ୍ କରିବା ପରେ ସ୍ୱାଭାବିକ ପରିସ୍ଥିତିକୁ ଆସିଥିଲା।
