ନୟାଗଡ଼, (ଓଡ଼ିଶା ଲେଖା): ରାଜ୍ୟ ସରକାରଙ୍କ ରାଜସ୍ଵ ବିଭାଗର ନିର୍ଦ୍ଦେଶ କ୍ରମେ ନୟାଗଡ଼ ତହସିଲ ପକ୍ଷରୁ “ମୋ ଗାଁରେ ମୋ ତହସିଲ” ପରିକଳ୍ପିତ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ନୟାଗଡ଼ ତହସିଲଦାର ରାଜେଶ କେଶରୀ ସ୍ୱାଇଁଙ୍କ ପରାମର୍ଶ କ୍ରମେ ଅତିରିକ୍ତ ତହସିଲଦାର ଅମିତା ପଟ୍ଟନାୟକ ବିଭିନ୍ନ ଗାଁକୁ ଯାଇ ସଚେତନର ବାର୍ତ୍ତା ବହନ କରିଥିବା ଜଣାପଡ଼ିଛି । ଏହି କାର୍ଯ୍ୟକ୍ରମରେ ଓଡ଼ିଶା ସରକାରଙ୍କ ରାଜସ୍ୱ ସେବାକୁ ଗ୍ରାମସ୍ତରରେ ପହଞ୍ଚାଇବା ପାଇଁ ଏକ ଅଭିନବ ପ୍ରୟାସ କରାଯାଇଛି।
ଏହି କାର୍ଯ୍ୟକ୍ରମ ପ୍ରଜାପଟ୍ଟାରେ ଥିବା ୨ୟ କଲମ (ପ୍ରଜାଙ୍କ ନାମ) ସଂଶୋଧନରେ ଜନସାଧାରଣଙ୍କ ଅଂଶଗ୍ରହଣ ବୃଦ୍ଧି କରିବା ସହିତ ଜମିଜମା ସମ୍ବନ୍ଧୀୟ ବିବାଦର ତୁରନ୍ତ ସମାଧାନ ଏବଂ ରାଜସ୍ୱ ପ୍ରଶାସନରେ ସ୍ପଷ୍ଟତା ଓ ଜନବିଶ୍ୱାସକୁ ସୁଦୃଢ଼ କରିବ । ଜନସାଧାରଣଙ୍କୁ ଉତ୍ତମ ସେବା ଯୋଗାଇ ଦେବାପାଇଁ “ମୋ ଗାଁରେ ମୋ ତହସିଲ” କାର୍ଯ୍ୟକ୍ରମ କରାଯାଇଛି। ଓଡ଼ିଶାର ଲୋକକଳା ପାଲା ଓ ଦାସକାଠିଆ ମାଧ୍ୟମରେ ଲୋକ ମାନଙ୍କୁ ସଚେତନ କରାଇବା ସହ ବାର୍ତ୍ତା ମଧ୍ୟ ଦିଆଯାଉଛି । ଏହି କାର୍ଯ୍ୟକ୍ରମରେ ପାଲା କଳାକାର, ରାଜସ୍ବ ନିରୀକ୍ଷକ ଓ କର୍ମଚାରୀ ମାନେ ସାମିଲ ହୋଇଛନ୍ତି ।
