ନୟାଗଡ଼, (ଓଡ଼ିଶା ଲେଖା): ମହାପ୍ରଭୂ ଶ୍ରୀ ଜଗନ୍ନାଥଙ୍କ ପବିତ୍ର ଘୋଷଯାତ୍ରା ପାଇଁ ପୁରୀ ଶ୍ରୀମନ୍ଦିରରୁ ଆଜ୍ଞାମାଳ ଧରି ୫ ଜଣିଆ ଟିମ୍ ନୟାଗଡ଼ରେ ପହଞ୍ଚିଛନ୍ତି । ଆସନ୍ତାକାଲି ଗଣିଆ ବ୍ଲକ ବଡ଼ରାଉଳ ଠାକୁରାଣୀଙ୍କ ପୀଠରେ ରଥକାଠ ଅନୁକୂଳ କରାଯିବ । ଏଥିପାଇଁ ଭାରପ୍ରାପ୍ତ ଅଧିକାରୀ ନୀତି ରବିନ୍ଦ୍ରନାଥ ଦାସଙ୍କ ନେତୃତ୍ୱରେ ୫ ଜଣିଆ ଦଳ ଆଜି ସନ୍ଧ୍ୟାରେ ନୟାଗଡ଼ରେ ପହଞ୍ଚିଛନ୍ତି । ଏହି ଦଳରେ ଅନ୍ୟମାନଙ୍କ ମଧ୍ୟରେ ସହକାରୀ ପ୍ରଶାସକ ଡ. ପ୍ରଭୂପିୟୁଷ ମହାପାତ୍ର, ତତ୍ତ୍ୱାବଧାରକ ଚିତ୍ତରଞନ ମହାପାତ୍ର, ରଥକାଠ ଅମିନ ଲକ୍ଷ୍ମଣ ମହାପାତ୍ର, ରଥ ସର୍ଦ୍ଦାର ରବି ଭୋଇ ଆସିଛନ୍ତି । ମଙ୍ଗଳବାର ଜିଲ୍ଲାର ଗଣିଆ ବଡ଼ମୁଳସ୍ଥିତ ମା ବଡରାଉଳଙ୍କ ପୀଠରେ ପୂଜାର୍ଚ୍ଚନା ପରେ ରଥକାଠ କଟା ଅନୁକୁଳ ହେବ । ଚଳିତ ବର୍ଷ ରଥଯାତ୍ରା ପାଇଁ ୮୬୫ ଖଣ୍ଡ କାଠ ଆବଶ୍ୟକ ହେଉଛି । ତେବେ ଏଥର ଶ୍ରୀମନ୍ଦିର ପ୍ରଶାସନ ପାଖରେ ଗତବର୍ଷର ୪୭ ଖଣ୍ଡ କାଠ ବଳକା ରହିଥିବାରୁ ସମୁଦାୟ ୮୧୮ଖଣ୍ଡ କାଠର ଆବଶ୍ୟକତା ରହିଛି ।
ସେଥିମଧ୍ୟରୁ ବିଭିନ୍ନ ମାପର ଧଉରା ୪୦୩ ଖଣ୍ଡ, ଅସନ ୩୪୦ଖଣ୍ଡ, ଫାଶି ୭୨ ଖଣ୍ଡ ଏବଂ ୩ଟି ଶିମିଳି କାଠର ଆବଶ୍ୟକତା ରହିଛି । ପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ନିମନ୍ତେ ନୟାଗଡ଼ ବନଖଣ୍ଡ ଚଳିତ ବର୍ଷ ପାଖାପାଖି ୩୦୦ଖଣ୍ଡ କାଠ ଯୋଗାଇବେ ଏବଂ ଅନ୍ୟ କାଠ ଗୁଡିକ ଅନ୍ୟାନ୍ୟ ବନଖଣ୍ଡରୁ ଯୋଗଇବାକୁ ଆଲୋଚନା କରାଯିବ ବୋଲି ଡିଏଫଓ ଗଣମାଧ୍ୟମ କହିଛନ୍ତି । ଏହି କାଠ ନୟାଗଡ଼ ଜିଲ୍ଲା ଦଶପଲ୍ଲା ବନାଞ୍ଚଳର ଚଢେୟାପଲ୍ଲୀ, ବାଣିଗୋଛା, ସାକେଣି, ଟାକେରା ଆଦି ଫରେଷ୍ଟ ଅଞ୍ଚଳରୁ ସଂଗ୍ରହ କରାଯାଇଥାଏ । ଚଳିତବର୍ଷ ବର୍ତ୍ତମାନ ସୁଦ୍ଧା ୨୭୦ ରୁ ଅଧିକ କାଠ ଚିହ୍ନଟ ହୋଇସାରିଥିବା ଡିଏଫ୍ଓ କହିଛନ୍ତି । ତିନି ଠାକୁରଙ୍କ ରଥଯାତ୍ରା ପାଇଁ ରଥ ସଂହିତା ଆଧାର ଅନୂଯାୟୀ କେଉଁ ଆବାହମାନ କାଳରୁ ପ୍ରତିବର୍ଷ ନୟାଗଡ଼ ବନଖଣ୍ଡରୁ କାଠ ଯୋଗାଇଦିଆଯାଇଥାଏ । ଶ୍ରୀ ପଞ୍ଚମୀ ପୂର୍ବରୁ ପ୍ରଥମ ରଥକାଠ ପୁରୀ ରଥଖଳାରେ ପହଞ୍ଚାଯାଇଥାଏ ।
