ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ଭାପୁର ବ୍ଲକ ଅଧୀନ ଫତେଗଡ଼ ଯୁବକ ସଂଘ ଆନୁକୂଲ୍ୟରେ ଆୟୋଜିତ ୧୬ତମ ସର୍ବଭାରତୀୟ ସଦାଶିବ ସ୍ମାରକୀ କ୍ରିକେଟ ଟୁର୍ଣ୍ଣାମେଣ୍ଟ ଆଜି ଉଦଘାଟିତ ହୋଇଯାଇଛି। ଉଦଘାଟିନୀ ମ୍ୟାଚରେ ଭୁବନେଶ୍ୱର ସାଇ ଇଲେଭେନ ୟୁପି ଟାଇଗର କୁ ୧୪୬ ରନରେ ହରାଇ ପ୍ରଥମ ସେମିଫାଇନାଲ କୁ ପ୍ରବେଶ କରିଛି। ରବିବାର ପୂର୍ବାହ୍ନରେ ମୁଖ୍ୟଅତିଥୀ ଭାବେ ବରିଷ୍ଠ ଶିକ୍ଷାବିତ ଲୋକନାଥ ଆଚାର୍ଯ୍ୟ ଯୋଗଦେଇ ମ୍ୟାଚ କୁ ଉଦଘାଟନ କରିଥିଲେ। ସମ୍ମାନିତ ଅତିଥୀ ରୂପେ ଓଡ଼ିଶାର ପୂର୍ବତନ ରଣଜି ଖେଳାଳି ବସନ୍ତ ମହାନ୍ତି, ବ୍ଳକ ବିଜେଡ଼ି ସଭାପତି ଶିବ ପ୍ରସାଦ ଷଡଙ୍ଗୀ, ପୂର୍ବତନ ସରପଞ୍ଚ ବୈକୁଣ୍ଠ ସାହୁ ଏବଂ ଫତେଗଡ ଯୁବକ ସଂଘ ସଭାପତି ତଥା ବ୍ଲକ ଉପାଧ୍ୟକ୍ଷ ବେଣୁଧର ପ୍ରଧାନଙ୍କ ସମେତ ବହୁ କ୍ରୀଡ଼ାପ୍ରେମୀ ଉପସ୍ଥିତ ରହି ଖେଳାଳିଙ୍କୁ ଉତ୍ସାହିତ କରିଥିଲେ। ଆଜି ଅନୁଷ୍ଠିତ ପ୍ରଥମ କ୍ୱାଟର ମ୍ୟାଚରେ ଟସ ଜିତି ୟୁପି ଟାଇଗର ପ୍ରଥମେ ବୋଲିଂ କରିବାର ନିଷ୍ପତ୍ତି ନେଇଥିଲା।
ବିପକ୍ଷ ଦଳ ଭୁବନେଶ୍ୱର ସାଇ ଇଲେଭେନ କ୍ରିକେଟ କ୍ଳବ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ସମସ୍ତ ଉଇକେଟ ହରାଇ ୧୮୪ ରନ କରିବାକୁ ସକ୍ଷମ ହୋଇଥିଲା। ଜବାବରେ ୟୁପି ଟାଇଗର ୮ ଓଭରରେ ସମସ୍ତ ଉଇକେଟ ହରାଇ ମାତ୍ର ୩୮ ରନ କରିବାକୁ ସକ୍ଷମ ହୋଇଥିଲା। ବିଜୟୀ ଦଳ ପକ୍ଷରୁ ଅମର ଦାଶ ଦୁଇ ଓଭରରେ ୫ ରନ ବ୍ୟୟ କରି ୩ଟି ଉଇକେଟ ନେଇ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ। ପୁରସ୍କାର ବିତରଣ ସମୟରେ ବସନ୍ତ ମହାନ୍ତି ଉପସ୍ଥିତ ରହି ଖେଳାଳିଙ୍କୁ ଟ୍ରଫି ପ୍ରଦାନ କରିଥିଲେ। ଖେଳକୁ ପରିଚାଳନା କରିଥିଲେ ଓସିଏ ଅମ୍ପାୟାର ଦୁର୍ଗା ପ୍ରସାଦ ପଟ୍ଟନାୟକ ଏବଂ ଆଶୁତୋଷ ପାଣି। ଏଥିସହ ସ୍କୋରର ଦାୟିତ୍ଵ ତୁଲାଇଥିଲେ କିରଣ ମନୋହର ମହାନ୍ତି, ବିଭୁତି ଭୂଷଣ ସାହୁ, ଇତିପ୍ରକାଶ ସେନାପତି ଏବଂ କିଷାନ ମନୋହର ମହାନ୍ତି। ମ୍ୟାଚ ରେଫରି ଭାବେ ସୁଧୀରଞ୍ଜନ ପଣ୍ଡା ଦାୟିତ୍ୱ ତୁଲାଇଥିବା ବେଳେ ତୃତୀୟ ଅମ୍ପାୟାର ଭାବେ ସୁଧାଂଶୁ କର ଦାୟିତ୍ୱ ନିଭାଇଥିଲେ। ଭାସ୍ୟକାର ବୁବୁ ସିହ୍ନା, ସରୋଜ ମହାପାତ୍ର, ଜନ୍ମେଜୟ ଦଳେଇ ଦର୍ଶକଙ୍କୁ ଉତ୍ସାହିତ କରିଥିଲେ। ହଜାର ହଜାର ସଂଖ୍ୟାରେ ଉପସ୍ଥିତ ଦର୍ଶକ ଏବଂ ଖେଳାଳିଙ୍କୁ ଉତ୍ସାହିତ କରିବା ପାଇଁ ଚିୟର ଗ୍ୟାର୍ଲ, ଡିଜିଟାଲ ସ୍କୋରବୋର୍ଡ ଏବଂ ଖେଳର ସିଧା ପ୍ରସାରଣ ବେଶ ଆକର୍ଷଣୀୟ ହୋଇଥିଲା। ସୋମବାର ଦ୍ଵିତୀୟ କ୍ୱାଟର ମ୍ୟାଚ କୋଲକାତା ଏବଂ ସମ୍ବଲପୁର ମଧ୍ୟରେ ଅନୁଷ୍ଠିତ ହେବ ବୋଲି ଫତେଗଡ଼ ଯୁବକ ସଂଘ ସଭାପତି ବେଣୁଧର ପ୍ରଧାନଙ୍କ ଠାରୁ ସୂଚନା ମିଳିଛି।
