ନୟାଗଡ଼, (ଓଡ଼ିଶା ଲେଖା): ଦିଅଁ ଖାଇ ଖଟୁଲି ଖାଇବାକୁ ବସିଛି ଠିକାଦାର । କାହାରି କଥାକୁ ଖାତିର ନକରି ଚଲେଇଛି ନିମ୍ନମାନର କାର୍ଯ୍ୟ । ହଠାତ୍ ପହଞ୍ଚିଲେ ଜିଲ୍ଲାପାଳ । ନିର୍ମାଣଧିନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ନିମ୍ନମାନର କାର୍ଯ୍ୟ ହେଉଥିବା ଦେଖି ବିଗିଡି ଗଲେ ଜିଲ୍ଲାପାଳ । ଏଭଳି ଅବସ୍ଥା ଦେଖି ସ୍ଵତନ୍ତ୍ର ଟିମ ମାଧ୍ୟମରେ ତଦନ୍ତ ହେବ ବୋଲି ଅନୁମାନ କରାଯାଉଛି । ସୂଚନାନୁସାରେ, ନୟାଗଡ ଜିଲ୍ଲାପାଳ ଅକ୍ଷୟ ସୁନୀଲ ଅଗ୍ରୱାଲ ସରକାରୀ କାର୍ଯ୍ୟକ୍ରମରେ ବନମାଳିପୁର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ଆସିଥିଲେ। ତେବେ କାର୍ଯ୍ୟକ୍ରମ ସାରି ଫେରୁଥିବା ସମୟରେ ସ୍ଥାନୀୟ ଗ୍ରାମବାସୀ ଜିଲ୍ଲାପାଳଙ୍କୁ ଅଭିଯୋଗ କରିଥିଲେ।
ଗତ ଦେଢ ବର୍ଷରୁ ଊର୍ଦ୍ଧ୍ଵ ସମୟ ଧରି ପ୍ରାୟ ୧ କୋଟିରୁ ଊର୍ଦ୍ଧ୍ଵ ଟଙ୍କା ବ୍ୟୟ ଅଟକଳରେ ଏହି କାମକୁ ଟେଣ୍ଡର ଜରିଆରେ ଜୈନେକ ଠିକାଦାର ହାତେଇଥିବା ବେଳେ ନିମ୍ନମାନର ଯୋଗୁଁ ବାରମ୍ବାର ଅଭିଯୋଗ ହୋଇଆସୁଛି। ତେବେ ସ୍ଥିତି ବାବଦରେ ଜାଣିବା ପରେ ମଧ୍ୟ ଆଖି ବୁଜିଦେଇଥିଲେ ଉଚ୍ଚ କର୍ତୃପକ୍ଷ। କେତେବେଳେ ଫାଉଣ୍ଡେସନ ଢଳେଇରେ ନିମ୍ନମାନର ତ ପୁଣି କେବେ ଏଷ୍ଟିମେଟ ବାହାରେ କାମ ହେଉଥିବା ସ୍ଥାନୀୟ ବାସିନ୍ଦା ଅଭିଯୋଗ ଆଣିଥିଲେ ମଧ୍ୟ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଦିନେହେଲେ ତଦନ୍ତ କରାଯାଇନାହିଁ। ଏପରିକି ପୂର୍ବରୁ କନିଷ୍ଠ ଯନ୍ତ୍ରୀ ନିମ୍ନମାନର କାମ ବାବଦରେ ପ୍ରତିବାଦ କରିଥିଲେ ମଧ୍ୟ ଠିକାଦାର ଏହାକୁ କର୍ଣ୍ଣପାତ ମଧ୍ୟ କରୁନଥିବା ଅଭିଯୋଗ କରିଥିଲେ।ଜିଲ୍ଲାପାଳ ସ୍ଥାନୀୟ ବାସିନ୍ଦାଙ୍କ ଅଭିଯୋଗକୁ ଗୁରୁତ୍ବ ଦେଇ ସଙ୍ଗେ ସଙ୍ଗେ ଜିଲ୍ଲାପାଳ ପ୍ରକଳ୍ପ କାର୍ଯ୍ୟ ବୁଲି ଦେଖିବା ସହିତ ଅସନ୍ତୋଷ ପ୍ରକାଶ କରିଛନ୍ତି।
ଏ ବାବଦରେ ସ୍ଵତନ୍ତ୍ର ଟିମ ଦ୍ଵାରା ତଦନ୍ତ କରାଇ ପଦକ୍ଷେପ ନେବାକୁ ପ୍ରତିଶୃତି ଦେଇଥିବା ସୂଚନା ମିଳିଛି। ଜିଲ୍ଲାପାଳଙ୍କ ଗସ୍ତ ସମୟରେ ସିଡିଏମଓ ସୁଶାନ୍ତ କୁମାର ଦାଶ, ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ଇନଚାର୍ଜ ଡା ରମାକାନ୍ତ ମିଶ୍ର ପ୍ରମୁଖ ସାମିଲ ଥିଲେ। ଅନ୍ୟପକ୍ଷରେ ଜିଲ୍ଲା ପ୍ରଶାସନ ଏ ଦିଗରେ ପଦକ୍ଷେପ ନ ନେଲେ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ତେବେ ଆଗାମୀ ଦିନରେ ତଦନ୍ତ ହୋଇ ବିଭାଗୀୟ ଯନ୍ତ୍ରୀ ଓ ଠିକାଦାରଙ୍କ ଉପରେ କାର୍ଯ୍ୟାନୁଷ୍ଠାନ ହେଉଛି ନା ତଦନ୍ତ ଆଳରେ ନିମ୍ନ ମାନର କାମର ଫାଇଲକୁ ଚାପି ଦିଆଯାଉଛି ତାହା ଜଣାପଡ଼ିବ।
