ନୟାଗଡ଼, (ଓଡ଼ିଶା ଲେଖା): ୫ପୁଅ ଥାଇ ପେଟକୁ ମିଳୁନି ଆହାର । ଦେଉଛନ୍ତି ଅନେକ ନିର୍ଯ୍ୟାତନା । ସହିବା ଅସହ୍ୟ ହେବାରୁ ଜିଲ୍ଲାପାଳଙ୍କ ଦ୍ବାରସ୍ଥ ହୋଇ ଗୁହାରୀ ଜଣାଇଛନ୍ତି ବୟସ୍କା ଦମ୍ପତ୍ତି । ଏଭଳି ଏକ ହୃଦୟ ବିଦାରକ ଘଟଣା ଆସିଛି ଓଡ଼ଗାଁ ଥାନା ଅଞ୍ଚଳରୁ । ନୟାଗଡ ଜିଲ୍ଲା ଓଡଗାଁ ଥାନା ଲିଙ୍ଗରାଜପ୍ରସାଦ ଗ୍ରାମର ଇନ୍ଦ୍ରମଣି ସିଂ ଏବଂ ତାଙ୍କ ସ୍ତ୍ରୀ ଆଜି ଜିଲ୍ଲାପାଳଙ୍କ ନିକଟରେ ୫ପୁଅଙ୍କ ନାମରେ ନିର୍ଯ୍ୟାତନା ଦେଉଥିବା ଅଭିଯୋଗ କରିଛନ୍ତି । ଇନ୍ଦ୍ରମଣିଙ୍କ ୫ପୁଅ ସମସ୍ତେ ନିଜ ପରିବାର ସହ ଭଲରେ ଚଳୁଛନ୍ତି ।
ବାପାମାଙ୍କୁ ପୁଅମାନେ ପାଳିକରି ଖାଇବାକୁ ଦେଉଥିଲେ । ଜମିବାଡି ବିବାଦକୁ କେନ୍ଦ୍ରକରି ଗାଁରେ ଏକ ଗୋଷ୍ଠି କନ୍ଦଳ ହୋଇଥିଲା , ଯେଉଁଥିରେ ଇନ୍ଦ୍ରମଣୀଙ୍କ ପୁଅ ସାମିଲ ଥିବାରୁ ଗାଁ ସଭା ସମୟରେ ଇନ୍ଦ୍ରମଣି ସତକଥା କହିଦେଇଥିଲେ । ଯାହାକୁ ନେଇ ପୁଅମାନେ ବାପାଙ୍କୁ ପାଟିତୁଣ୍ଡ କରିଥିଲେ । ଏହାସହିତ ପୁଅମାନେ ଝିଅ ସହିତ ସମ୍ପର୍କ ରଖିବାକୁ ବାପାଙ୍କୁ ମନା କରିଥିଲେ । ଇନ୍ଦ୍ରମଣି କିନ୍ତୁ ଝିଅ ଘରକୁ ଯିବାରୁ ପୁଅମାନେ ବାପାଙ୍କୁ ନିର୍ଯ୍ୟାତନା ଦେବା ସହ ଖାଇବାକୁ ଦେବା ବନ୍ଦ କରିଦେଇଥିଲେ । କେବଳ ସାନପୁଅ ଇନ୍ଦ୍ରମଣୀଙ୍କ ସେବା କରୁଥିବାବେଳେ ଅନ୍ୟମାନେ ପଚାରୁନଥିବା ସେ ଅଭିଯୋଗ କରିଛନ୍ତି । ଏନେଇ ଇନ୍ଦ୍ରମଣି ଓଡଗାଁ ଥାନାରେ ଅଭିଯୋଗ କରିବାକୁ ଆସିବା ପରେ ପୋଲିସ ଉପଜିଲ୍ଲାପାଳଙ୍କ ନିକଟକୁ ପଠାଇଦେଇଥିଲା । ଇନ୍ଦ୍ରମଣି ଏବଂ ତାଙ୍କ ସ୍ତ୍ରୀ ଆଜି ଜିଲ୍ଲାପାଳ ଏବଂ ଉପଜିଲ୍ଲାପାଳଙ୍କ ନିକଟରେ ନ୍ୟାୟ ପାଇଁ ଅନୁରୋଧ କରିଛନ୍ତି । ଘଟଣାରେ ପରିବାର କୋର୍ଟରେ କେଶ୍ କରି ପିଲାମାନଙ୍କୁ ଡାକି ଏହାର ସମାଧାନ କରିବାକୁ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲା ଉପଜିଲ୍ଲାପାଳ କର୍ଣ୍ଣଦେବ ସମଦାରଙ୍କୁ ନିର୍ଦ୍ଦେଶ ଦେଇଛନ୍ତି । ଅତିଶିଘ୍ର ପରିବାର କୋର୍ଟରେ ଏହାର ସମାଧାନ କରାଯିବ ବୋଲି ଉପଜିଲ୍ଲାପାଳ କହିଛନ୍ତି । ଜନ୍ମ କଲା ବାପା ମାଆଙ୍କୁ ଯେଉଁ ପୁଅ ବୋହୂ ମାନେ ନିର୍ଯ୍ୟାତନା ଦେଉଛନ୍ତି କିମ୍ବା ବିଭିନ୍ନ ଅସୁବିଧାରେ ପକାଉଛନ୍ତି, ସେହି ବୟସ୍କା ବାପା ମାଆ ମାନେ ଆଇନର ଆଶ୍ରୟ ନିଅନ୍ତୁ ।
