ନୟାଗଡ଼, (ଓଡ଼ିଶା ଲେଖା): ଗଣଧାରଣାରେ ବସିଛନ୍ତି ଶହ ଶହ ମହିଳା । କମ୍ୟୁନିଟ ସପୋର୍ଟଷ୍ଟାପଙ୍କ ଆନ୍ଦୋଳନକୁ କର୍ଣ୍ଣପାତ କରୁନାହାନ୍ତି ସରକାର । ଯାହାକୁ ନେଇ କ୍ଷୋଭ ପ୍ରକାଶ କରିବା ସହ ରାଜ୍ୟର ପ୍ରତ୍ୟେକ ବ୍ଲକରେ ଗଣଧାରଣା ଦେଇଛନ୍ତି ମିଶନ ଶକ୍ତି ବିଭାଗର ଶତାଧିକ କମ୍ୟୁନିଟ ସପୋର୍ଟଷ୍ଟାପ । ବିଗତ ସରକାରରେ କମ୍ୟୁନିଟ ସପୋର୍ଟଷ୍ଟାପ ସ୍ଥାୟୀ ଦରମା ପାଇଆସୁଥିବା ବେଳେ ବର୍ତ୍ତମାନର ମୋହନ ସରକାର ଉକ୍ତ ଷ୍ଟାପମାନଙ୍କ ପାଇଁ ଆଖି ବୁଜିଦେଇଛନ୍ତି ।
ଯାହାଫଳରେ ନିୟମିତ ଓ ସ୍ଥାୟୀ ଦରମାକୁ ବନ୍ଦ କରି ଇନସେଟିଭି ଆକାରରେ ସରକାର ଦେବାକୁ କହୁଥିବା ବେଳେ ଏହାକୁ କଡ଼ା ଭାବେ ବିରୋଧ କରୁଛନ୍ତି କମ୍ୟୁନିଟ ସପୋର୍ଟଷ୍ଟାପର ହଜାର ହଜାର ମହିଳା । ନୟାଗଡ଼ ସଦର ବ୍ଲକ ଅନ୍ତର୍ଗତ 29ଟି ପଞ୍ଚାୟତର ଶତାଧିକ କମ୍ୟୁନିଟ ସପୋର୍ଟଷ୍ଟାପଙ୍କ ଦୀର୍ଘ ଛ ମାସ ହେଲା ଦରମା ପାଇନଥିବା ବେଳେ ରାଜ୍ୟ ସରକାର ଇନସେଟିଭି ଆକାରରେ ସପୋର୍ଟଷ୍ଟାପ ମାନେ କାର୍ଯ୍ୟ କରିବାକୁ କହିଛନ୍ତି । ଯାହାକୁ ନେଇ ବିରୋଧ କରୁଛନ୍ତି କମ୍ୟୁନିଟ ସପୋର୍ଟଷ୍ଟାପ ।
କମ୍ୟୁନିଟ ସପୋର୍ଟଷ୍ଟାପଙ୍କ ଛ ମାସର ଦରମା ପ୍ରଦାନ କରିବା ସହ ଇନସେଟିଭି ହଟାଇ ସ୍ଥାୟୀ ନିଯୁକ୍ତି ଦାବି କରି ମିଶନ ଶକ୍ତିର କମ୍ୟୁନିଟ ସପୋର୍ଟଷ୍ଟାପ ମାନେ ରାଜ୍ୟ ସ୍ତରରେ ଆନ୍ଦୋଳନକୁ ତୀବ୍ରତର କରିଛନ୍ତି । ଆଜି ନୟାଗଡ଼ ବ୍ଲକ ସ୍ତରୀୟ ଜିପିଏଲଏଫ କର୍ମୀ ସଂଘ ତରଫରୁ ନୟାଗଡ଼ ବ୍ଲକର ମିଶନ ଶକ୍ତି କାର୍ଯ୍ୟାଳୟ ସମ୍ମୁଖରେ ସରକାରଙ୍କ ବିରୋଧ ନାରାବାଜି ଦେବା ସହ ଗଣଧାରଣାରେ ବସିଥିବା ଦେଖିବାକୁ ମିଳିଛି । ସରକାର ଦାବି ପୁରଣ କରିବା ପର୍ଯ୍ୟନ୍ତ ଏପରି ଆନ୍ଦୋଳନ ଜାରି ରହିବ ବୋଲି ସୂଚନା ମିଳିଛି ।
