ନୟାଗଡ଼, (ଓଡ଼ିଶା ଲେଖା): ଜଗତର ଜନନୀ ମା’ ଦୁର୍ଗାଙ୍କ ପବିତ୍ର ଶାରଦୀୟ ପୂଜା ଅବସରରେ ନୟାଗଡ଼ ପ୍ୟାଲେସଠାରେ ମା’ଙ୍କ ସପ୍ତମୀ ପୂଜାକୁ ନେଇ ଆୟୋଜିତ ଦାଣ୍ଡିଆ ନୃତ୍ୟ ଉତ୍ସବ ଉତ୍ସାହ ଓ ଉଲ୍ଲାସର ସହ ପାଳିତ ହୋଇଛି। ଏହି ଉତ୍ସବରେ ହଜାର ହଜାର ମହିଳା ଯୋଗଦେଇ ବିଭିନ୍ନ ସଙ୍ଗୀତର ତାଳେ ତାଳେ ଦାଣ୍ଡିଆ ନୃତ୍ୟ ପରିବେଷଣ କରିଥିଲେ। ରଙ୍ଗବେରଙ୍ଗର ପୋଷାକ ଓ ଆକର୍ଷଣୀୟ ନୃତ୍ୟରେ ଉତ୍ସବସ୍ଥଳ ଉତ୍ସବମୁଖର ହୋଇଉଠିଥିଲା। ଏହି ଉତ୍ସବରେ ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ ଯୋଗଦେଇଥିବା ବେଳେ ଜିଲ୍ଲା ପରିଷଦ ଅଧ୍ୟକ୍ଷ ଇଂ ଦେବାଶିଷ ପଟ୍ଟନାୟକ, ନୟାଗଡ଼ ପୌର ପରିଷଦର ଅଧ୍ୟକ୍ଷା ନିରୁପମା ଖଟେଇ, ନାଟୁଗାଁ ସରପଞ୍ଚ ତଥା ବିଜୁ ମହିଳା ଜନତା ଦଳର ବ୍ଲକ ସଭାପତି ସାଗରବାଳା ବରାଡ଼, ଖୁଣ୍ଟୁବନ୍ଧ ସରପଞ୍ଚ ସୁକାନ୍ତି ବିଶ୍ୱାଳଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ମା’ ଦୁର୍ଗାଙ୍କ ଆରାଧନା ସହ ଦାଣ୍ଡିଆ ନୃତ୍ୟ ମାଧ୍ୟମରେ ଆନନ୍ଦ, ଉତ୍ସାହ ଓ ସାମୂହିକ ଏକତାର ବାର୍ତ୍ତା ଦେଇଥିଲେ ଉତ୍ସବରେ ସାମିଲ ହୋଇଥିବା ମହିଳାମାନେ। ଗୀତର ତାଳେ ତାଳେ ମହିଳାମାନଙ୍କ ନୃତ୍ୟ ଓ ଦର୍ଶକଙ୍କ ଉତ୍ସାହ ଉତ୍ସବକୁ ଆହୁରି ଆକର୍ଷଣୀୟ କରିଥିଲା। ସମଗ୍ର କାର୍ଯ୍ୟକ୍ରମ ମା’ଙ୍କ ପୂଜାର ଆଧ୍ୟାତ୍ମିକ ପରିବେଶ ସହ ସାଂସ୍କୃତିକ ଉତ୍ସାହର ଏକ ସୁନ୍ଦର ସମନ୍ୱୟ ସୃଷ୍ଟି କରିଥିଲା।
