ଭଞ୍ଜନଗର, (ଓଡ଼ିଶା ଲେଖା): ଭଞ୍ଜନଗର ନିକଟସ୍ଥ ତନରଡାସ୍ଥିତ ଶ୍ରୀବତ୍ସ ଗୋରକ୍ଷାଶ୍ରମରେ ମହାନ ସଂସ୍କାରକ ଶ୍ରୀବତ୍ସ ପଣ୍ଡାଙ୍କ ୧୫୬ତମ ଜୟନ୍ତୀ ଉତ୍ସବ ଶ୍ରଦ୍ଧା ଓ ଭକ୍ତିର ସହ ପାଳିତ ହୋଇଯାଇଛି। ଶିକ୍ଷା ଓ ସମାଜ ସଂସ୍କାର କ୍ଷେତ୍ରରେ ବିପ୍ଳବାତ୍ମକ ପରିବର୍ତ୍ତନ ଆଣିବା ଦିଗରେ ସ୍ୱର୍ଗତ ଶ୍ରୀବତ୍ସ ପଣ୍ଡାଙ୍କର ଅତୁଳନୀୟ ଅବଦାନ ରହିଥିବା ବକ୍ତାମାନେ ମତପ୍ରକାଶ କରିଥିଲେ। ଧନୀ ପରିବାରରେ ଜନ୍ମ ହୋଇଥିଲେ ମଧ୍ୟ ସେ ଅତ୍ୟନ୍ତ ସରଳ, ନିଷ୍କପଟ ଓ ଧାର୍ମିକ ଚିନ୍ତାଧାରାରେ ଜୀବନଯାପନ କରୁଥିଲେ। ବେଦ-ବେଦାନ୍ତର ପ୍ରଚାର ସହ ବିଭିନ୍ନ ସଂସ୍କାରମୂଳକ କାର୍ଯ୍ୟରେ ସେ ନିଜକୁ ନିୟୋଜିତ କରିଥିଲେ। ଗୋରକ୍ଷା ଓ ଗୋସେବା କ୍ଷେତ୍ରରେ ମଧ୍ୟ ଶ୍ରୀବତ୍ସ ପଣ୍ଡାଙ୍କର ବିଶେଷ ଅବଦାନ ଥିଲା। ତାଙ୍କ ସ୍ମୃତିରେ ଗଢ଼ିଉଠିଥିବା ଶ୍ରୀବତ୍ସ ଗୋରକ୍ଷାଶ୍ରମ ପକ୍ଷରୁ ପ୍ରତିବର୍ଷ ତାଙ୍କ ଜୟନ୍ତୀ ପାଳନ କରାଯାଉଛି। ଏହି ପବିତ୍ର ଅବସରରେ ବିଶ୍ୱଶାନ୍ତି କାମନା କରି ୧୦୮ କୁଣ୍ଡୀୟ ବିଶ୍ୱଶାନ୍ତି ଯଜ୍ଞ ଅନୁଷ୍ଠିତ ହୋଇଥିଲା। ଯଜ୍ଞ ଓ ଅନ୍ୟାନ୍ୟ ଧାର୍ମିକ କାର୍ଯ୍ୟକ୍ରମରେ ଆଶ୍ରମର ସଦସ୍ୟଙ୍କ ସମେତ ବହୁ ଭକ୍ତ ଯୋଗଦେଇଥିଲେ। କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ସଭାପତି ଆଚାର୍ଯ୍ୟ ଡ଼ ସୁଦର୍ଶନ ଦେବ ଯୋଗଦେଇଥିବା ବେଳେ ସମ୍ପାଦକ ଗୋପବନ୍ଧୁ ସାହୁ, ସଂଚାଳକ ଆଚାର୍ଯ୍ୟ ଶୃତିପ୍ରିୟ ଶାସ୍ତ୍ରୀ, କୋଷାଧ୍ୟକ୍ଷ ଏ. ସନ୍ତୋଷ ଆଚାରୀ, ଡ଼ ଉଷା ମୁନୀ, ସ୍ୱାମୀ ଆତ୍ମାନନ୍ଦ ସରସ୍ୱତୀ, କୈଳାଶ ନନ୍ଦ, ପୁରସ୍ତମ, ଟ୍ରଷ୍ଟି ସୁବ୍ରତ ସାହୁ ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ମୁଖ୍ୟ ଆକର୍ଷଣ ଭାବେ ରାଜ୍ୟ ବିଜେପି ପ୍ରବକ୍ତା ଶ୍ରୀ ଲକ୍ଷ୍ମଣ ପଣ୍ଡା ଯୋଗଦେଇ ଶ୍ରୀବତ୍ସ ପଣ୍ଡାଙ୍କ ଜୀବନ, ଆଦର୍ଶ ଓ ସମାଜ ସଂସ୍କାରମୂଳକ କାର୍ଯ୍ୟ ସମ୍ପର୍କରେ ଆଲୋକପାତ କରିଥିଲେ। ଆଶ୍ରମର ସମସ୍ତ ସଦସ୍ୟଙ୍କ ସହଯୋଗରେ କାର୍ଯ୍ୟକ୍ରମ ସୁଚାରୁରୂପେ ସମାପିତ ହୋଇଥିଲା। ପରିଶେଷରେ ଉପସ୍ଥିତ ଭକ୍ତ ଓ ଅତିଥିମାନଙ୍କ ପାଇଁ ଅନ୍ନ ପ୍ରସାଦର ବ୍ୟବସ୍ଥା କରାଯାଇଥିଲା।
ରିପୋର୍ଟ: ରବି ନାରାୟଣ ଦାଶ
