କଂଗ୍ରେସରେ ଯୋଗଦେଲେ ପୂର୍ବତନ ସ୍ୱାଧୀନ ବିଧାୟକ ପ୍ରାର୍ଥୀ କାହ୍ନା: ସାମ୍ବାଦିକ ସମ୍ମିଳନୀରେ ଉଠାଇଲେ ବିଭିନ୍ନ ଜନସମସ୍ୟା

ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ଦଶପଲ୍ଲାର ଯୁବ ସାମ୍ବାଦିକ ତଥା ଦଶପଲ୍ଲା ନିର୍ବାଚନମଣ୍ଡଳୀର ପୂର୍ବତନ ସ୍ୱାଧୀନ ବିଧାୟକ ପ୍ରାର୍ଥୀ କାହ୍ନା ନାୟକ କଂଗ୍ରେସ ଦଳରେ ଯୋଗଦାନ କରିଛନ୍ତି। ଏନେଇ ଶନିବାର ଦଶପଲ୍ଲାରେ ଆୟୋଜିତ ସାମ୍ବାଦିକ ସମ୍ମିଳନୀରେ ନୟାଗଡ଼ ଜିଲ୍ଲା କଂଗ୍ରେସ ସଭାପତି ରଞ୍ଜିତ କୁମାର ଦାସ ସୂଚନା ଦେଇଥିଲେ। ଏହି ଅବସରରେ ଦଶପଲ୍ଲା ନିର୍ବାଚନମଣ୍ଡଳୀ ଅନ୍ତର୍ଗତ ବିଭିନ୍ନ ବ୍ଲକର କଂଗ୍ରେସ ସଭାପତି, ବରିଷ୍ଠ ପଦାଧିକାରୀ ଓ ଦଳୀୟ କର୍ମୀମାନେ ଉପସ୍ଥିତ ଥିଲେ। ସାମ୍ବାଦିକ ସମ୍ମିଳନୀରେ କାହ୍ନା ନାୟକ ଦଶପଲ୍ଲା ଅଞ୍ଚଳର ବିଭିନ୍ନ ଜନସମସ୍ୟା ଉପରେ ଆଲୋକପାତ କରିଥିଲେ। ବିଶେଷକରି ଦଶପଲ୍ଲା ହସ୍ପିଟାଲରେ ଡାକ୍ତର ଅଭାବ, ସ୍ୱାସ୍ଥ୍ୟସେବା, ଆମ୍ବୁଲାନ୍ସ ଏବଂ ଅନ୍ୟାନ୍ୟ ମୌଳିକ ସୁବିଧା ସମ୍ପର୍କିତ ସମସ୍ୟା ଉପରେ ସେ ଗୁରୁତ୍ୱାରୋପ କରିଥିଲେ। କାହ୍ନା ନାୟକ କହିଥିଲେ, “ସାମ୍ବାଦିକଙ୍କ କାମ କେବଳ ଖବର ପ୍ରକାଶ କରିବାରେ ସୀମିତ ନୁହେଁ। ଲୋକଙ୍କ ସମସ୍ୟାକୁ ସାମ୍ନାକୁ ଆଣିବା ସହ ଏହାର ସମାଧାନ ପାଇଁ ଉଦ୍ୟମ କରିବା ମଧ୍ୟ ଦାୟିତ୍ୱ ଓ କର୍ତ୍ତବ୍ୟ। କଂଗ୍ରେସରେ ଯୋଗଦାନ ପରେ ଦଶପଲ୍ଲା ଅଞ୍ଚଳରେ କାହ୍ନା ନାୟକଙ୍କ ରାଜନୈତିକ ଭୂମିକା କିପରି ରହିବ ଏବଂ ସ୍ଥାନୀୟ ଜନସମସ୍ୟାକୁ ନେଇ ସେ କେଉଁ ପଦକ୍ଷେପ ନେବେ, ତାହା ଉପରେ ଏବେ ରାଜନୈତିକ ମହଲର ନଜର ରହିଛି।