ଓଡ଼ଗାଁ, (ଓଡ଼ିଶା ଲେଖା): ରାଜ୍ୟ ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଏବଂ ନୟାଗଡ଼ ଜିଲ୍ଲା ଓ ଓଡ଼ଗାଁ ବ୍ଲକ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଓଡ଼ଗାଁ ବ୍ଲକ ରୋହିବାଙ୍କ ପଞ୍ଚାୟତ ଅନ୍ତର୍ଗତ ସରକାରୀ ଉଚ୍ଚ ବିଦ୍ୟାଳୟ, ରୋହିବାଙ୍କ ପରିସରରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଛି।ଏହି କାର୍ଯ୍ୟକ୍ରମରେ ନୟାଗଡ଼ ଜିଲ୍ଲା ସହକାରୀ ବନ ସଂରକ୍ଷକ ଡ଼ ସତ୍ୟଜିତ କର ମୁଖ୍ୟ ଅତିଥି ଭାବେ ଯୋଗଦେଇଥିଲେ। ସମ୍ମାନିତ ଅତିଥି ଭାବେ ଓଡ଼ଗାଁ ବନାଞ୍ଚଳ ଅଧିକାରୀ ଅଭିମନ୍ୟୁ ମଲ୍ଲିକ, ଓଡ଼ଗାଁ ବନପାଳ ସରିତା ବରାଳ, ବନପାଳ ଜ୍ୟୋତିର୍ମୟୀ ସାମନ୍ତରାୟ, ଲାଉଖାଳ ବନରକ୍ଷୀ ଦୀପ୍ତିମୟୀ ରାଉତ ଏବଂ କୋମଣ୍ଡ ସାଧନକେନ୍ଦ୍ର ସଂଯୋଜକ ଲଳିତମୋହନ ମିଶ୍ର ପ୍ରମୁଖ ଯୋଗଦେଇଥିଲେ ।
ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ବିଷ୍ଣୁପ୍ରିୟା ବାରିକ ଅତିଥିମାନଙ୍କୁ ସ୍ୱାଗତ କରିଥିଲେ। ପରେ ଅତିଥି, ଶିକ୍ଷକ-ଶିକ୍ଷୟିତ୍ରୀ ଓ ଇକୋକ୍ଲବର ଛାତ୍ରଛାତ୍ରୀଙ୍କ ସହଯୋଗରେ ବିଦ୍ୟାଳୟ ଖେଳପଡ଼ିଆ ଓ ପରିସରରେ ୭୫ରୁ ଅଧିକ ବୃକ୍ଷରୋପଣ କରାଯାଇଥିଲା। ପିସ୍ତାବାଦାମ, ଗଙ୍ଗଶିଉଳି, ବଉଳ, ବେଲ, ନିମ୍ବ ଆଦି ବୃକ୍ଷ ସହିତ ବିଦ୍ୟାଳୟ ପରିସରରେ ଆତ, ଡାଳିମ୍ବ ଓ ପିଜୁଳି ଭଳି ଫଳନ୍ତି ବୃକ୍ଷ ମଧ୍ୟ ରୋପଣ କରାଯାଇଥିଲା।ବୃକ୍ଷରୋପଣ ସହ ବୃକ୍ଷ ସୁରକ୍ଷା ଉପରେ ମଧ୍ୟ ଛାତ୍ରଛାତ୍ରୀମାନେ ସଚେତନ ଥିବା ଦେଖାଯାଇଥିଲା। ପୂର୍ବରୁ ଲଗାଯାଇଥିବା ବୃକ୍ଷଗୁଡ଼ିକରେ ଛାତ୍ରଛାତ୍ରୀମାନେ ବାନ୍ଧିଥିବା ‘ସୁରକ୍ଷା କବଚ ରାଖୀ’ ଦେଖି ଅତିଥିମାନେ ଖୁସି ବ୍ୟକ୍ତ କରିବା ସହ ଛାତ୍ରଛାତ୍ରୀଙ୍କ ପରିବେଶ ସଚେତନତାକୁ ପ୍ରଶଂସା କରିଥିଲେ। ବିଦ୍ୟାଳୟ ପରିଚାଳନା କମିଟି ସଭାପତି ସୁରେନ୍ଦ୍ର ସେନାପତିଙ୍କ ସମେତ କୁନି ମହାଙ୍କୁଡ଼, ଦେବରାଜ ନାୟକ, ମୀନାକ୍ଷୀ ପାତ୍ର ପ୍ରମୁଖ କମିଟି ସଦସ୍ୟ-ସଦସ୍ୟାମାନେ ଉପସ୍ଥିତ ଥିଲେ। ମୁଖ୍ୟ ଅତିଥି ଡ଼ ସତ୍ୟଜିତ କର ନିଜ ବାଡ଼ିବଗିଚା ଓ ଖୋଲା ସ୍ଥାନରେ ବୃକ୍ଷରୋପଣ କରିବା ସହ ଲଗାଯାଇଥିବା ବୃକ୍ଷର ନିୟମିତ ଯତ୍ନ ଓ ସୁରକ୍ଷା ନେବାକୁ ସମସ୍ତଙ୍କୁ ଆହ୍ୱାନ ଦେଇଥିଲେ। ଏହାଦ୍ୱାରା ପରିବେଶର ପ୍ରାକୃତିକ ଶୀତଳୀକରଣ ସହ ପରିବେଶ ସୁରକ୍ଷାରେ ସହାୟତା ମିଳିବ ବୋଲି ସେ କହିଥିଲେ। ସମଗ୍ର କାର୍ଯ୍ୟକ୍ରମକୁ ପ୍ରକୃତିବନ୍ଧୁ ଶିକ୍ଷକ ସନ୍ତୋଷ କୁମାର ସାହୁ ପରିଚାଳନା କରିଥିଲେ। ଶିକ୍ଷକ ସନ୍ତୋଷ ନାହାକ, ସୂର୍ଯ୍ୟମଣି ନାୟକ, ଖୋଗେଶ୍ୱର ବେହେରା, ଆଲୋକ ନାୟକ, ବିଶ୍ୱଜିତ ନାୟକ, ରାଧାଗୋବିନ୍ଦ ନାୟକ ଏବଂ ଶିକ୍ଷୟିତ୍ରୀ ଅବନ୍ତୀ ବେହେରା, ବିଜୟଲକ୍ଷ୍ମୀ ଦଳେଇ, ରାଜଲକ୍ଷ୍ମୀ ଶ୍ରୀଚନ୍ଦନ ଓ ପଦ୍ମିନୀ କୁମାରୀ ନାୟକ ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ।
