ମହିପୁର ଇଥାଇନ୍ କମ୍ପାନୀରେ ବିସ୍ଫୋରଣ: ୪ ଶ୍ରମିକ ଗୁରୁତର

ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲାର ମହିପୁରସ୍ଥିତ ଇଥାଇନ୍ କମ୍ପାନୀରେ ବିସ୍ଫୋରଣ ଘଟି ୪ ଜଣ ଶ୍ରମିକ ଗୁରୁତର ଆହତ ହୋଇଥିବା ଖବର ମିଳିଛି। ବିସ୍ଫୋରଣରେ ଦିଲ୍ଲୀପ କୁମାର ନାୟକ (୨୬), ଶରତ କୁମାର ସାହୁ (୪୦), ବିଭୂତି ପ୍ରଧାନ (୨୯) ଓ ବ୍ରଜକିଶୋର ପ୍ରଧାନ (୨୮) ଗୁରୁତର ଆହତ ହୋଇଛନ୍ତି।ଘଟଣା ପରେ ଆହତମାନଙ୍କୁ ତୁରନ୍ତ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇ ଚିକିତ୍ସା କରାଯାଇଥିଲା। ତେବେ ସେମାନଙ୍କ ଅବସ୍ଥା ସଙ୍କଟାପନ୍ନ ଥିବାରୁ ଉନ୍ନତ ଚିକିତ୍ସା ପାଇଁ ଭୁବନେଶ୍ୱରକୁ ରେଫର କରାଯାଇଥିବା ସୂଚନା ମିଳିଛି।ଅନ୍ୟପକ୍ଷରେ, ଘଟଣାର ଖବର ପାଇ ନୂଆଗାଁ ପୁଲିସ ମହିପୁର ଇଥାଇନ୍ କମ୍ପାନୀରେ ପହଞ୍ଚିଛି। ପୁଲିସ ପକ୍ଷରୁ ଘଟଣାସ୍ଥଳରେ ତଦନ୍ତ ଆରମ୍ଭ କରାଯାଇଥିବା ବେଳେ ବିସ୍ଫୋରଣର ପ୍ରକୃତ କାରଣ ଜଣାପଡ଼ିନାହିଁ। ତଦନ୍ତ ପରେ ଘଟଣାର ସମ୍ପୂର୍ଣ୍ଣ କାରଣ ସ୍ପଷ୍ଟ ହେବ।