ମୁଖ୍ୟମନ୍ତ୍ରୀଙ୍କ ଦ୍ୱାରା ସମ୍ବର୍ଦ୍ଧିତ ହେଲେ ସୌମ୍ୟ ରଞ୍ଜନ:ସାହସିକତା ପାଇଁ ପାଇଲେ ବିଜୁ ପଟ୍ଟନାୟକ ସାହସିକତା ପୁରସ୍କାର

ନୟାଗଡ଼, (ଓଡ଼ିଶା ଲେଖା): ନିଜର ଅଦମ୍ୟ ସାହସ, ମାନବିକତା ଓ ବିପଦ ସମୟରେ ଅନ୍ୟର ଜୀବନ ରକ୍ଷା ପାଇଁ ଅସାଧାରଣ ଉଦ୍ୟମ ଯୋଗୁଁ ନୟାଗଡ଼ ଜିଲ୍ଲା ଗଣିଆ ବ୍ଲକର ପାଣ୍ଡରାସିଂହା ଗ୍ରାମର ଯୁବକ ସୌମ୍ୟ ରଞ୍ଜନ ବେହେରା (ଦିପୁ) ସମ୍ମାନିତ ହୋଇଛନ୍ତି। ଭୁବନେଶ୍ୱରରେ ଆୟୋଜିତ ସ୍ୱତନ୍ତ୍ର ସମାରୋହରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୌମ୍ୟ ରଞ୍ଜନଙ୍କୁ ବିଜୁ ପଟ୍ଟନାୟକ ସାହସିକତା ପୁରସ୍କାର ପ୍ରଦାନ କରି ସମ୍ବର୍ଦ୍ଧିତ କରିଛନ୍ତି। ସୂଚନାନୁସାରେ, ନୟାଗଡ଼ ଜିଲ୍ଲା ଗଣିଆ ବ୍ଲକ କିଶୋରପ୍ରସାଦ ପଞ୍ଚାୟତ ଅନ୍ତର୍ଗତ ପାଣ୍ଡରାସିଂହା ଗ୍ରାମର ମକରନ୍ଦ ବେହେରା ଓ ନୟନା ବେହେରାଙ୍କ ପୁଅ ସୌମ୍ୟ ରଞ୍ଜନ ବର୍ତ୍ତମାନ ଭାରତୀୟ ନୌସେନାରେ କାର୍ଯ୍ୟରତ। ଛୁଟିରେ ଗାଁକୁ ଆସିଥିବା ସମୟରେ ସେ ନିକଟସ୍ଥ ପର୍ଯ୍ୟଟନସ୍ଥଳୀ ଗୋକୁଳାନନ୍ଦ ପୀଠକୁ ବୁଲିବାକୁ ଯାଇଥିଲେ।ସେହି ସମୟରେ ବାହାର ରାଜ୍ୟରୁ ଆସିଥିବା କିଛି ପର୍ଯ୍ୟଟକ ମହାନଦୀରେ ଗାଧୋଉଥିବା ବେଳେ ଜଣେ ବ୍ୟକ୍ତି ପ୍ରଖର ସ୍ରୋତରେ ଭାସି ଯାଇଥିଲେ। ଲୋକଙ୍କ ଚିତ୍କାର ଶୁଣି ସୌମ୍ୟ ରଞ୍ଜନ କୌଣସି ବିଳମ୍ବ ନକରି ମହାନଦୀକୁ ଡେଇଁ ପ୍ରବଳ ସ୍ରୋତ ମଧ୍ୟରୁ ସମ୍ପୃକ୍ତ ବ୍ୟକ୍ତିଙ୍କୁ ଉଦ୍ଧାର କରିଥିଲେ। ତାଙ୍କର ତତ୍ପରତା ଯୋଗୁଁ ଜଣେ ବ୍ୟକ୍ତିଙ୍କ ଜୀବନ ରକ୍ଷା ପାଇଥିଲା।ଏହାସହ ସମୁଦ୍ରରେ ବିପଦରେ ପଡ଼ିଥିବା ମତ୍ସ୍ୟଜୀବୀଙ୍କୁ ଉଦ୍ଧାର କରିବାରେ ମଧ୍ୟ ସୌମ୍ୟ ରଞ୍ଜନ ସାହସିକତା ପ୍ରଦର୍ଶନ କରିଥିବା ଜଣାପଡ଼ିଛି। ସେ ଭାରତୀୟ ନୌସେନାର ଏଡଭାନ୍ସଡ୍ ଲାଇଟ୍ ହେଲିକପ୍ଟର (ରେସ୍କ୍ୟୁ ହେଲିକପ୍ଟର)ରେ ଏୟାର କ୍ରୁ ଡାଇଭର ଭାବେ କାର୍ଯ୍ୟରତ ଅଛନ୍ତି।ବିପଦ ସମୟରେ ଜୀବନକୁ ବାଜି ଲଗାଇ ଅନ୍ୟର ଜୀବନ ରକ୍ଷା କରିବା ସହିତ ତାଙ୍କର ଦକ୍ଷତା, ସାହସ ଓ ମାନବିକତାକୁ ସମ୍ମାନ ଜଣାଇ ତାଙ୍କୁ ଏହି ସମ୍ମାନ ପ୍ରଦାନ କରାଯାଇଛି। ସମାରୋହରେ ଉଚ୍ଚଶିକ୍ଷା ଓ କ୍ରୀଡ଼ା ମନ୍ତ୍ରୀ ସୂର୍ଯ୍ୟବଂଶୀ ସୁରଜ ଏବଂ ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ମୁଖ୍ୟମନ୍ତ୍ରୀଙ୍କ ହାତରୁ ସୌମ୍ୟ ରଞ୍ଜନ ପୁରସ୍କୃତ ହେବା ନୟାଗଡ଼ ଜିଲ୍ଲା ସମେତ ଗଣିଆ ଅଞ୍ଚଳ ପାଇଁ ଗର୍ବ ଓ ଗୌରବର ବିଷୟ ପାଲଟିଛି। ତାଙ୍କର ଏହି ସଫଳତା ପାଇଁ ପରିବାର, ଗ୍ରାମବାସୀ ଓ ଅଞ୍ଚଳବାସୀଙ୍କ ମଧ୍ୟରେ ଖୁସିର ମାହୋଲ ଦେଖାଦେଇଛି। ସୌମ୍ୟ ରଞ୍ଜନଙ୍କ ଏହି ସାହସିକତା ଓ ମାନବିକତା ଆଗାମୀ ଦିନରେ ଯୁବପିଢ଼ିଙ୍କୁ ବିପଦ ସମୟରେ ସାହସର ସହ ଆଗେଇ ଆସିବା, ଦାୟିତ୍ୱବୋଧ ପ୍ରଦର୍ଶନ କରିବା ଏବଂ ମାନବ ଜୀବନ ରକ୍ଷା ପାଇଁ ପ୍ରେରଣା ଯୋଗାଇବ ବୋଲି ଅଞ୍ଚଳବାସୀ ଆଶା ପ୍ରକାଶ କରିଛନ୍ତି।