ନରସିଂହପୁର, (ଓଡ଼ିଶା ଲେଖା): କଟକ ଜିଲ୍ଲା ନରସିଂହପୁରସ୍ଥାୟୀ ବାସସ୍ଥାନ ପ୍ରମାଣପତ୍ର ଓ ଜମି ପଟ୍ଟା ପ୍ରଦାନ ଦାବିରେ ଆଜି ନରସିଂହପୁର ମୁକ୍ତି ସଂଗଠନ ଓ ଦେବୋତ୍ତର ଉପଭୋକ୍ତା ମଞ୍ଚ ପକ୍ଷରୁ ଏକ ପଦଯାତ୍ରା ଆୟୋଜିତ ହୋଇଥିଲା। ପଞ୍ଚମୁଖୀ ଛକରୁ ଆରମ୍ଭ ହୋଇଥିବା ଏହି ପଦଯାତ୍ରା ନରସିଂହପୁର ତହସିଲ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲା। ପଦଯାତ୍ରାରେ ସାମିଲ ହୋଇ ଜନସାଧାରଣଙ୍କ ଦୀର୍ଘଦିନର ଦାବି ପ୍ରତି ସମର୍ଥନ ଜଣାଇବା ସହ ସମସ୍ତ ଯୋଗ୍ୟ ହିତାଧିକାରୀଙ୍କୁ ଶୀଘ୍ର ସ୍ଥାୟୀ ପଟ୍ଟା ଓ ଆବଶ୍ୟକ ପ୍ରମାଣପତ୍ର ଯୋଗାଇଦେବା ପାଇଁ ସହଯୋଗର ଆଶ୍ୱାସନ ଦିଆଯାଇଥିଲା।
ଏହି ଅବସରରେ ଜନସାଧାରଣ ଓ ମୁକ୍ତି ସଂଗଠନର ସଦସ୍ୟମାନଙ୍କ ଉପସ୍ଥିତିରେ ନରସିଂହପୁର ତହସିଲଦାର ଅମ୍ରିତା ସାହୁ ଏବଂ ବ୍ଲକ ଉନ୍ନୟନ ଅଧିକାରୀ ପ୍ରଳୟାନନ୍ଦ ଶତପଥୀଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ପଟ୍ଟା ପ୍ରଦାନ ପ୍ରକ୍ରିୟାକୁ ଶୀଘ୍ର ଆଗେଇ ନେବା ସହ ଜନସାଧାରଣଙ୍କ ସମସ୍ୟାର ସ୍ଥାୟୀ ସମାଧାନ ପାଇଁ ପ୍ରଶାସନ ସହ ବୈଠକରେ ବିସ୍ତୃତ ଆଲୋଚନା ମଧ୍ୟ କରାଯାଇଥିଲା। ଦୀର୍ଘଦିନର ଏହି ଦାବି ପୂରଣ ପାଇଁ ପ୍ରଶାସନ ତ୍ୱରିତ ପଦକ୍ଷେପ ନେବ ବୋଲି ଆଶା ପ୍ରକାଶ ପାଇଛି।
