ସ୍ୱତନ୍ତ୍ର, (ଓଡ଼ିଶା ଲେଖା): ନୟାଗଡ଼ ବ୍ଲକର ନୋତର ଠାରେ ୧୦ବର୍ଷ ତଳେ ଗଢି ଉଠିଥିବା ଓଡ଼ିଶା ଆଦର୍ଶ ବିଦ୍ୟାଳୟ, ଚଳିତ ଶିକ୍ଷାବର୍ଷ ସି.ବି.ଏସ.ଇ ଦଶମ ବୋର୍ଡ ପରୀକ୍ଷାରେ ଶତ ପ୍ରତିଶତ ଫଳାଫଳ କରି ରାଜ୍ୟରେ ଥିବା ୩୧୬ଗୋଟି ଓଏଭି ବିଦ୍ୟାଳୟ ମଧ୍ୟରେ ଶ୍ରେଷ୍ଠ ବିବେଚିତ ହୋଇଛି । ଏହି ବିଦ୍ୟାଳୟର ୮୦ ପରିକ୍ଷାର୍ଥୀଙ୍କ ମଧ୍ୟରୁ ୯୯ ପ୍ରତିଶତରୁ ଅଧିକ ନମ୍ବର ୩ ଜଣ, ୯୫ ରୁ ୯୯ ପ୍ରତିଶତ ୧୭ , ୯୦ ରୁ ୯୫ ପ୍ରତିଶତ ୧୪, ୮୦ ରୁ ୯୦ ପ୍ରତିଶତ ୧୬ ଓ ୭୦ରୁ ୮୦ ପ୍ରତିଶତ ୨୨ ଜଣ ପରିକ୍ଷାର୍ଥୀ ପାସ୍ କରିଛନ୍ତି । କେବଳ ସେତିକି ନୁହେଁ, ବିଦ୍ୟାଳୟର ଛାତ୍ରୀ ଶ୍ରେୟ ସ୍ମରଣିକା ଓ ଛାତ୍ର ଆଶୀର୍ବାଦ ମାର୍ଥା ୯୯.୬୦% ନମ୍ବର ରଖି ରାଜ୍ୟରେ ଯୁଗ୍ମ ଭାବେ ଟପର ହୋଇଛନ୍ତି । ଶିକ୍ଷକ, ଶିକ୍ଷୟତ୍ରୀ ମାନଙ୍କ ଅକ୍ଳାନ୍ତ ପ୍ରଚେଷ୍ଟା ଓ ଗୁଣାତ୍ମକ ଶିକ୍ଷାଦାନ , ଛାତ୍ର ଛାତ୍ରୀ ମାନଙ୍କ ଅଗାଢ ପରିଶ୍ରମ ଓ ଅଭିଭାବକ ମାନଙ୍କ ଦାୟୀତ୍ଵ ଯୋଗୁଁ ଏହା କେବଳ ସମ୍ଭବ ହୋଇପାରିଛି । ଏହି ବିଦ୍ୟାଳୟ ଅତୀତରେ ୨୦୨୦-୨୧ ଓ ୨୦୨୧-୨୨ ଶିକ୍ଷାବର୍ଷରେ ମଧ୍ୟ ରାଜ୍ୟରେ ଶ୍ରେଷ୍ଠ ବିଦ୍ୟାଳୟର ମାନ୍ୟତା ପାଇଥିଲା । ପରବର୍ତ୍ତୀ ଶିକ୍ଷାବର୍ଷ ଗୁଡିକରେ ଆଶାନୁରୂପକ ଫଳାଫଳ ନହେବାରୁ, ତର୍ଜମାରୁ ଜଣାଗଲାଯେ, ପ୍ରବେଶିକା ପରୀକ୍ଷାରେ ଉତ୍ତୀର୍ଣ୍ଣ ଛାତ୍ର ଛାତ୍ରୀ ମାନେ ଭଲ ନମ୍ବର ରଖୁଥିବା ସ୍ଥଳେ ବିଧାୟକ, ସାଂସଦ ଓ ଜିଲ୍ଲାପାଳଙ୍କ ସୁପାରିଶ କ୍ରମେ ପଢୁଥିବା ଦୁର୍ବଳ ଶ୍ରେଣୀର ଛାତ୍ର ଛାତ୍ରୀଙ୍କ ଫଳାଫଳ ନୈରାଶ୍ୟ ଜନକ ଅଟେ ଓ ଅନୁଷ୍ଠାନର ଫଳାଫଳ ପରୋକ୍ଷରେ ପ୍ରଭାବିତ ହେଉଛି । ସେମାନଙ୍କ ଯୋଗୁଁ ବିଦ୍ୟାଳୟରେ ଧାରାବାହିକ ଭାବେ ଏକ ପ୍ରକାରର କୋଟା ପରିବେଶ ସୃଷ୍ଟି କରୁଛନ୍ତି । ଏଣୁ ମୁଁ ମୋର ସୁପାରିଶକୁ ୩ ବର୍ଷ ଧରି କ୍ରମାଗତ ଭାବେ ବନ୍ଦ କରିଦେଲି । ଯଦିଓ ସେଥିପାଇଁ ଶତାଧିକ କର୍ମୀ, ସ୍ଥାନୀୟ ବାସିନ୍ଦା , କିଛି ସମ୍ପର୍କୀୟ ଓ ଚାକିରିଆ ମୋତେ ଭୁଲ ବୁଝିଲେ , ଏହା ମୋ ନିଜସ୍ଵ ନିଷ୍ପତି ଉପରେ କୌଣସି ପ୍ରଭାବ ପକାଇ ପାରିନଥିଲା । ଫଳରେ ଆଜି ନୋତର, ନୟାଗଡ଼ ସ୍ଥିତ ଓଏଭି ଚଳିତ ବର୍ଷ ରାଜ୍ୟରେ ପୁନଃ ଶ୍ରେଷ୍ଠ ବିଦ୍ୟାଳୟର ମାନ୍ୟତା ଲାଭ କରିପାରିଛି । ଏ ସମ୍ପର୍କରେ ଅନୁଷ୍ଠାନରେ କୋଟା ଉଚ୍ଛେଦପାଇଁ ମୁଁ ବିଧାନସଭା ଭିତରେ ଓ ବାହାରେ ବାରମ୍ବାର ଦାବି କରିଆସୁଛି । ପ୍ରତ୍ୟେକ ବିଧାୟକ କେବଳ ୨ ଜଣଙ୍କୁ ସୁପାରିଶ କରିବାକୁ ଅନୁମତି ଥିବା ସ୍ଥଳେ ୨୦୦/ ୩୦୦ ରୁ ଅଧିକ ବ୍ୟକ୍ତି ଅନୁରୋଧ କରୁଛନ୍ତି । ଯାହାକି ସମସ୍ତଙ୍କୁ ସନ୍ତୁଷ୍ଟ କରିବା ସମ୍ଭବପର ନୁହେଁ ଏବଂ ଅନୁଚିତ ଭାବେ ବାଧ୍ୟ ବାଧ୍ୟକତାରେ ଯେଉଁ ମାନଙ୍କ ନାମ ସୁପାରିଶ କରାଯାଉଛି, ସେମାନଙ୍କ ଯୋଗୁଁ ବିଦ୍ୟାଳୟରେ ପାତର ଅନ୍ତର ନୀତି ହେଉଛି । ବିଗତ ୩ ବର୍ଷ ଧରି ମୁଁ କାହାରି ନାମକୁ ସୁପାରିଶ ନକରିବାରୁ ଆଜି ନୋତର, ନୟାଗଡ଼ ଓଏଭି ରାଜ୍ୟରେ ପ୍ରଥମ ସ୍ଥାନ ଅଧିକାର କରି ପାରିଛି । କୋଟା ଉଚ୍ଛେଦ କରିବା ନିମନ୍ତେ ସରକାର ଏବଂ ଶିକ୍ଷା ବିଭାଗ ତୁରନ୍ତ ନିଷ୍ପତ୍ତି ନେବା ଉଚିତ । ଦଳ ମତ ନିର୍ବିଶେଷରେ ସମସ୍ତ ବିଧାୟକ ଏହିଭଳି ଦାବି ଉତ୍ଥାପନ କଲେ ଏହି ସରକାରୀ ଶିକ୍ଷାନୁଷ୍ଠାନ ଗୁଡିକରେ ଶିକ୍ଷାର ମାନ ବୃଦ୍ଧି ହେବା ସହିତ ଉତ୍ତମ ଛାତ୍ର ଛାତ୍ରୀ ସୃଷ୍ଟି ହୋଇପାରନ୍ତେ ।
କୋଟା ହଟାଅ–ଶିକ୍ଷା ବଞ୍ଚାଅ:ରାଜ୍ୟରେ ନୟାଗଡ଼ ଓଏଭି ଶ୍ରେଷ୍ଠ ବିବେଚିତ:ଅରୁଣ
