ନୟାଗଡ଼, (ଓଡ଼ିଶା ଲେଖା): ନୂଆଗାଁ କୋରଡ଼ାରେ ବାଣ ଭିଡୁଥିବା ବେଳେ ଘଟିଛି ଅଘଟଣ। ବିସ୍ପୋରଣରେ ନାବାଳକ ସହ ୬ଜଣ ଅବସ୍ଥା ଗୁରୁତର ଥିବା ଜଣାପଡିଛି। ଗୁରୁତର ଆହତ ମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ଭୁବନେଶ୍ୱରରେଫର କରାଯାଇଛି। ସୂଚନାନୁସାରେ, ଦଶପଲ୍ଲା ଲଙ୍କାପୋଡି ପାଇଁ ବାଣ ପ୍ରସ୍ତୁତି ବେଳେ ଭୟାଭୟ ବିସ୍ପୋରଣ ଘଟି ୬ ଗୁରୁତର ଆହତ ହୋଇଛନ୍ତି । ସମସ୍ତଙ୍କୁ ଭୁବନେଶ୍ଵର ସ୍ଥାନାନ୍ତର କରାଯାଇଛି । ନୂଆଗାଁ ଥାନା କୋରଡା ଗାଁରେ ଏହି ଭୟାଭୟ ବାଣ ବିସ୍ପୋରଣ ଘଟିଛି । ଆଗକୁ ଦଶପଲ୍ଲାରେ ଲଙ୍କାପୋଡ଼ି ଥିବାରୁ କୋରଡା ଗାଁର କାହ୍ନୁ ସେଠିଙ୍କ ଘରେ ସବୁ ବର୍ଷ ପରି ଏ ବର୍ଷ ମଧ୍ୟ ବାଣ ତିଆରି ଚାଲିଥିଲା । ତେବେ କୌଣସି କାରଣରୁ ବାରୁଦରେ ନିଆଁ ଲାଗି ଯାଇଥିଲା, ଫଳରେ ବାଣ ବିସ୍ପୋରଣ ଘଟିଥିଲା । ବାଣ ପ୍ରସ୍ତୁତ କରୁଥିବା ୬ଜଣ ଗୁରୁତର ହୋଇଛନ୍ତି , ସେମାନଙ୍କ ମଧ୍ୟରେ ଜଣେ ନାବାଳକ ଥିବା ଜଣା ପଡିଛି । ଗୁରୁତର ଆହତ ମାନେ ହେଲେ ହାଡ଼ିବନ୍ଧୁ ସେଠି ପୁଅ ନବ ସେଠୀ ଏବଂମାନସ ନାୟକ, ନିରଞ୍ଜନ ନାହାକ, ବାପି ନାୟକ ସମେତ ଜଣେ ୧୨ବର୍ଷିୟ ନାବାଳକ ମଧ୍ୟ ଗୁରୁତର ଆହତ ହୋଇଛନ୍ତି । ସମସ୍ତଙ୍କୁ ପ୍ରଥମେ ନୟାଗଡ ପରେ ଭୁବନେଶ୍ଵର ସ୍ଥାନାନ୍ତର କରାଯାଇଥିବା ବେଳେ ସମସ୍ତଙ୍କ ଅବସ୍ଥା ସଙ୍କଟାପୂର୍ଣ ରହିଛି । ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଆର୍ଥିକ କାରବାର କରୁଥିବା ଜଣେ ମହିଳା ଓ ଜଣେ ବ୍ୟକ୍ତିଙ୍କୁ ଅଟକ ରଖିଛି ନୂଆଗାଁ ପୋଲିସ୍।
