ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ମହୋତ୍ସବ ପଲ୍ଲୀଶ୍ରୀ ମେଳା, କୃଷି ଓ ଯନ୍ତ୍ରପାତି ମେଳା ଓ ପୁସ୍ତକ ମେଳା-୨୦୨୫ ଉଦଘାଟିତ ହୋଇଯାଇଛି । ଜିଲ୍ଲା ମହୋତ୍ସବର ଉଦଘାଟନି ସଭା ବହୁ ବିଳମ୍ବରେ ଆରମ୍ଭ ହୋଇଥିଲା । ନୟାଗଡ଼ ଜିଲ୍ଲାପାଳ ଅକ୍ଷୟ ସୁନୀଲ ଅଗ୍ରୱାଲଙ୍କ ସଭାପତିତ୍ବ ଆୟୋଜିତ କାର୍ଯ୍ୟକ୍ରମରେ ଓଡ଼ିଶା ବିଧାନସଭାର ବାଚସ୍ପତି ସୁରମା ପାଢୀ ଉଦଘାଟକ ଭାବେ ଯୋଗ ଦେଇ ଜିଲ୍ଲା ମହୋତ୍ସବର ପ୍ରଥମ ସଂଧ୍ୟାକୁ ଉଦଘାଟନ କରିଥିବା ବେଳେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।
ତତ୍ ସହିତ ପୁରୀ ଲୋକସଭା ସାଂସଦ ଡ଼ ସମ୍ବିତ ପାତ୍ର, କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ, ନୟାଗଡ଼ ବିଧାୟକ ତଥା ପୂର୍ବତନ ମନ୍ତ୍ରୀ ଡ଼ ଅରୁଣ କୁମାର ସାହୁ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ଖଣ୍ଡପଡା ବିଧାୟକ ଦୁଷ୍ମନ୍ତ କୁମାର ସ୍ଵାଇଁ, ଜିଲ୍ଲା ପରିଷଦ ଅଧ୍ୟକ୍ଷ ଇ ଦେବାଶିଷ ପଟ୍ଟନାୟକ ଓ ନୟାଗଡ଼ ଆରକ୍ଷୀ ଅଧିକ୍ଷକ ଏସ ସୁଶ୍ରୀ ମଞ୍ଚାସିନ ହୋଇଥିବା ବେଳେ କବି ଗୋପୀନାଥ ସେଠୀ ଓ ସାମ୍ବାଦିକ ଜୟେନ୍ଦ୍ର ବେହେରା ମଞ୍ଚ ସଂଯୋଜନା କରିଥିଲେ ।
ବହୁ ବିଳମ୍ବର ମହୋତ୍ସବ ପ୍ରଥମ ସଂଧ୍ୟା ଉଦଘାଟନ ହେବାକୁ ନେଇ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ରାତି ୧୦ଟା ପରେ ଆରମ୍ଭ ହୋଇଥିଲା । ଯାହାକୁ ନେଇ ସାଂସ୍କୃତିକ ପ୍ରେମୀ ମାନେ ନିରାଶ ହୋଇଥିଲେ । ଏବଂ ପଲିଟିକାଲ ସର୍କଶର ଟିମ ଦ୍ଵାରା ଜ୍ଞାନ ହୋତା, ବିଭୁ ମିଶ୍ର, ରବିନ୍ଦ ରାଉତ, ଡ଼ କୁଳାଙ୍ଗାର, ସତ୍ୟାନାଶ, ଗିରିଶ ରଞ୍ଜନ ସାହୁଙ୍କୁ ନେଇ ବ୍ୟଙ୍ଗ କବିର ଆସର ଜମିଥିଲା ଓ ନୃତ୍ୟ ନିପୁଣା ତରଫରୁ ରଙ୍ଗାରଙ୍ଗ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।
