ନୟାଗଡ଼,(ଓଡ଼ିଶା ଲେଖା): ରାସ୍ତା ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ କାର୍ଯ୍ୟାଳୟ ଘେରିଲେ ଗ୍ରାମବାସୀ । ପାରାଢିପି ଅଞ୍ଚଳର ଶହ ଶହ ଲୋକ ଗ୍ରାମ୍ୟ ଉନ୍ନୟନ ଡିଭିଜନ ୨ କାର୍ଯ୍ୟାଳୟ ଘେରାଉ କରିବା ସହ ଅଧିକାରୀଙ୍କ ଅପାରଗତାକୁ ପଦାରେ ପକାଇଛନ୍ତି । ତାହା ସହିତ ଠିକାଦାର ବିରୁଦ୍ଧରେ ଅସନ୍ତୋଷ ବ୍ୟକ୍ତ କରିଛନ୍ତି । ଆରଡି ବିଭାଗ ଅଧିକାରୀ ଓ ଠିକାଦାରଙ୍କ ମଧ୍ୟରେ ରହିଥିବା ଭିତିରିଆ ସମନ୍ୱୟ ପାଇଁ ଏଭଳି ସମସ୍ୟା ସୃଷ୍ଟି ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ନୟାଗଡ଼ ଜିଲ୍ଲା ନୂଆଗାଁ ବ୍ଲକ୍ର ଶିମିଳିସାହିଠାରୁ ବାଲଣ୍ଡା ପର୍ଯ୍ୟନ୍ତ ୬ କିଲୋମିଟର୍ ରାସ୍ତା ଦୀର୍ଘ ଦିନ ହେଲା କାମ ହେଉଥିଲେ ମଧ୍ୟ ତାହା ଶେଷ ହେବାର ନାଁ ଧରୁନି । ଯାହାଫଳରେ ଏହି ରାସ୍ତା ଉପରେ ନିର୍ଭର କରୁଥିବା ୧୪ଖଣ୍ଡ ଗାଁର ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି । ୨୦୨୨ ମସିହାରେ ଏହି ରାସ୍ତା ନିର୍ମାଣ ପାଇଁ କାର୍ଯ୍ୟାଦେଶ ଦିଆଯାଇଥିଲା ଏବଂ ୨୦୨୩ ମସିହାରେ ଏହାର କାମ ଶେଷ କରିବାକୁ ଧାର୍ଯ୍ୟ କରାଯାଇଥିଲା । ୨୦୨୪ ସୁଦ୍ଧା ସାରିବାକୁ ସମୟ ଧାର୍ଯ୍ୟ କରାଯାଇଥିଲା । ଏହାସତ୍ତ୍ୱେ ବର୍ତ୍ତମାନ ସୁଦ୍ଧା ଠିକାଦାର କେବଳ ମାଟି ପକାଇ କାମ ବନ୍ଦ ରଖିଛି । ଏନେଇ ସ୍ଥାନୀୟ ବାସିନ୍ଦା ବାରମ୍ବାର ଅଭିଯୋଗ କରିଥିଲେ ମଧ୍ୟ କୈାଣସି ସୁଫଳ ମିଳିଲା ନାହିଁ । ଏହାର ପ୍ରତିବାଦରେ ଆଜି ଶତାଧିକ ଅଞ୍ଚଳବାସୀ ଅଫିସ୍ ଘେରାଉ କରିଥିଲେ । ଜିଲ୍ଲାପରିଷଦ ସଭାପତି ଇଂ ଦେବାଶିଷ ପଟ୍ଟନାୟକ, ବିଭାଗୀୟ ଅଧିକାରୀ ଓ ଆନ୍ଦୋଳନକାରୀ ମଧ୍ୟରେ ଆଲୋଚନା କରାଯିବା ପରେ ଧାରଣା ପ୍ରତ୍ୟାହୃତ ହୋଇଛି । ୨୦୨୬ ମସିହା ଫେବୃୟାରୀ ମାସ ସୁଦ୍ଧା କାମ ଶେଷ କରିବାକୁ ବିଭାଗୀୟ ଅଧିକାରୀ ଲିଖିତ ପ୍ରତିଶୃତି ଦେଇଥିବା ସୂଚନା ମିଳିଛି ।
ଗ୍ରାମ୍ୟ ଉନ୍ନୟନ କାର୍ଯ୍ୟାଳୟ ଘେରିଲେ ପାରାଢ଼ୀପି ଓ ଜାକେଡ଼ା ଅଞ୍ଚଳବାସୀ
