ଓଡ଼ିଶା ଲେଖା ଅଫିସ୍: ରାଜ୍ୟ ବିଧାନସଭାର ସର୍ବୋଚ୍ଚ ସ୍ଥାନରେ ରଣପୁର ବିଧାୟିକା ଥିବା ବେଳେ ନୟାଗଡ଼ ଜିଲ୍ଲାକୁ ସର୍ବ ନିମ୍ନ ସ୍ତରକୁ ଠେଲି ଦେଇଛନ୍ତି ରାଜ୍ୟ ସରକାର। ଯେଉଁ ଜିଲ୍ଲାରେ ଲୋକ ସଂଖ୍ୟା କମ, ଆୟତନ କମ ଏବଂ ନିର୍ବାଚନ ମଣ୍ଡଳୀ କମ ଥାଇ ମଧ୍ୟ ସେହି ଜିଲ୍ଲା ଗୁଡ଼ିକୁ ମଧ୍ୟମ ବର୍ଗ ରଖିଥିବା ନୟାଗଡ଼ ଜିଲ୍ଲା ପ୍ରତି ପକ୍ଷପାତିତା କାହିଁକି ? ଏଭଳି କିଛି ତଥ୍ଯ ରଖି ବିଧାନସଭା ପବିତ୍ର ଗୃହରେ ରାଜ୍ୟ ସରକାରଙ୍କ ଉପରେ ବର୍ଷଛନ୍ତି ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ । ରାଜ୍ୟ ସରକାର ଯାହା କିଛି ପଦକ୍ଷେପ ନେଉଛନ୍ତି ତାହା ସରକାରର ଦଳୀୟ ନେତୃତ୍ଵମାନଙ୍କ ସହ ଆଲୋଚନା କରି ପଦକ୍ଷେପ ନେଉଛନ୍ତି ନା ମନ ଇଚ୍ଛା ପଦକ୍ଷେପ ନେଉଛନ୍ତି ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ଯଦି ଆଲୋଚନା କରି ପଦକ୍ଷେପ ନେଉଛନ୍ତି, ତେବେ ବାଚସ୍ପତି ମହୋଦୟା କେମିତି ନିଜ ଜିଲ୍ଲାକୁ ଛୋଟିଆ ବର୍ଗକୁ ଠେଲି ଦେଇଛନ୍ତି ତାହା ନୟାଗଡ଼ ଜିଲ୍ଲା ବାସୀଙ୍କୁ ଚକିତ କରିଦେଇଛି । ଯାହାକୁ ନେଇ ନୟାଗଡ଼ ପ୍ରତି ସରକାରଙ୍କ ବୈମାତୃକ ମନୋଭାବକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ବିଧାୟକ ଡ଼ ସାହୁ। ରାଜ୍ୟ ସରକାର ଏବେ ସବୁ ଜିଲ୍ଲାରେ ଜିଲ୍ଲାପାଳ କାର୍ଯ୍ୟାଳୟର ନବକଳେବର କରିବାକୁ ଯାଉଛନ୍ତି । ଏଥିରେ ଜନସଂଖ୍ୟା, ପ୍ରଶାସନିକ କାର୍ଯ୍ୟଭାର ଆଦିକୁ ବିଚାରକୁ ନେଇ ଜିଲ୍ଲାଗୁଡିକୁ ୩ ଭାଗରେ ବିଭକ୍ତ କରାଯାଇଛି । ଆଉ ଏହି ବର୍ଗରେ ନୟାଗଡ଼କୁ ଛୋଟ ବର୍ଗରେ ରଖାଯାଇଛି । ନୟାଗଡ଼ ପ୍ରତି ରାଜ୍ୟ ସରକାରଙ୍କ ଏଭଳି ମନୋଭାବକୁ ନେଇ ସେ ବାଚସ୍ପତିଙ୍କ ହସ୍ତକ୍ଷେପ ଦାବି କରିଥିଲେ । ଶୂନ୍ୟ କାଳରେ ଏହି ପ୍ରସଙ୍ଗ ଉଠାଇ ସେ କହିଥିଲେ ଯେ ବଡ଼ ବର୍ଗ ସହରରେ ରହିଛନ୍ତି ସମ୍ବଲପୁର, ପୁରୀ, କେନ୍ଦୁଝର, ମୟୁରଭଞ୍ଜ, ସୁନ୍ଦରଗଡ ଓ ଗଞ୍ଜାମ । ସେହିପରି ମଧ୍ୟମ ବର୍ଗ ସହରରେ ରହିଛନ୍ତି କନ୍ଧମାଳ, ରାୟଗଡ଼ା, ବାଲେଶ୍ବର, ଯାଜପୁର, ବଲାଙ୍ଗୀର, ଖୋର୍ଦ୍ଧା, କଳାହାଣ୍ଡି, ଭଦ୍ରକ, ବରଗଡଡ଼ କେନ୍ଦ୍ରାପଡା, କୋରାପୁଟ, ଅନୁଗୁଳ, ନବରଙ୍ଗପୁର, ଢେଙ୍କାନାଳ ଓ ଜଗତସିଂହପୁର । ସେପଟେ ଛୋଟ ବର୍ଗ ସହରରେ ରହିଛନ୍ତି ନୟାଗଡ଼, ମାଲକାନଗିରି, ନୂଆପଡ଼ା, ସୋନପୁର, ଝାରସୁଗୁଡ଼ା, ଗଜପତି, ବୌଦ୍ଧ ଓ ଦେବଗଡ଼ । ପ୍ରସ୍ତାବିତ ନବକଳେବର ରୂପରେଖ ଅନୁଯାୟୀ ୧ ଲକ୍ଷ ୭୦ ହଜାର ବର୍ଗଫୁଟ ଜମିରେ ବଡ଼, ୧ ଲକ୍ଷ ୪୦ ହଜାର ବର୍ଗଫୁଟ ଜମିରେ ମଧ୍ୟମ ଓ ଏକ ଲକ୍ଷ ବର୍ଗଫୁଟ ଜମିରେ ନିର୍ମାଣ ହେବ କ୍ଷୁଦ୍ର ଜିଲ୍ଲାପାଳ କାର୍ଯ୍ୟାଳୟ । ନୟାଗଡ଼ରେ ନା ଅଛି ଖଣି ନା ପାଣି କେବଳ ଜଙ୍ଗଲ ସମ୍ପଦ ଉପରେ ନୟାଗଡ଼ ଜିଲ୍ଲା ନିର୍ଭରଶୀଳ। ନୟାଗଡ଼ ଦେଇ ମହାନଦୀ ଯାଇଥିଲେ ବି ଏବେ ଧିରେ ଧିରେ ସେଥିରେ ମଧ୍ୟ ପାଣି କମିଲାଣି । ସେ ଭିତରେ ନୟାଗଡ଼ବାସୀ ନିଜ ଗୋଡ଼ରେ ନିଜେ ଛିଡ଼ା ହେବାକୁ ଏବେ ବି ସଂଘର୍ଷ କରୁଛନ୍ତି । ଅନ୍ୟ ଜିଲ୍ଲା ପରି ନୟାଗଡ଼ ପ୍ରାଚୁର୍ଯ୍ୟରେ ଭରପୂର ନୁହେଁ। ତେଣୁ ଗୋଟେ ଜିଲ୍ଲାକୁ ଆଗକୁ ବଢ଼ିବାକୁ ସୁଯୋଗ ଦିଆଯିବାର ଆବଶ୍ୟକତା ରହିଛି । ବିଧାନସଭାର ସର୍ବୋଚ୍ଚ ଆସନରେ ବସିଥିବା ବାଚସ୍ପତି ମଧ୍ୟ ନୟାଗଡ଼ ଜିଲ୍ଲାକୁ ପ୍ରତିନିଧିତ୍ବ କରୁଛନ୍ତି । ତେଣୁ ସେ – ଏଥିରେ ହସ୍ତକ୍ଷେପ କରିବାକୁ ଶ୍ରୀ ସାହୁ ଦାବି କରିଛନ୍ତି ।
ନୟାଗଡ଼ ପ୍ରତି ରାଜ୍ୟ ସରକାରଙ୍କ ବୈମାତୃକ ମନୋଭାବ:ମଧ୍ୟମ ବର୍ଗ ବଦଳରେ ଛୋଟ ବର୍ଗକୁ ଠେଲି ଦେଲେ ସରକାର:ବାଚସ୍ପତିଙ୍କ ହସ୍ତକ୍ଷେପ ଲୋଡ଼ିଲେ ଅରୁଣ
