ଭଞ୍ଜନଗର (ଓଡ଼ିଶା ଲେଖା): ଗଞ୍ଜାମ ଜିଲ୍ଲାପାଳ ଭି. କିର୍ତ୍ତିଭାସନ୍ ଶନିବାର ଭଞ୍ଜନଗର ଗସ୍ତରେ ଆସି ଆସିବା ବିଭିନ୍ନ ପ୍ରକଳ୍ପର କାର୍ଯ୍ୟ ତଦାରଖ କରିଥିଲେ। ପ୍ରଥମେ ସ୍ଵାଧୀନତା ସଂଗ୍ରାମୀ ଚକରା ବିଷୋୟୀଙ୍କ କର୍ମକ୍ଷେତ୍ର ଚନ୍ଦ୍ରଗିରି ଜଙ୍ଗଲରେ ଚାଲିଥିବା ଚକ୍ରଘାଟି ଉନ୍ନୟନ କାର୍ଯ୍ୟର ସମୀକ୍ଷା କରିଥିଲେ। ଉକ୍ତ ସ୍ଥାନରେ ପ୍ରାୟ ୬ କୋଟି ଟଙ୍କାରେ ଚାଲିଥିବା ଉନ୍ନୟନ କାର୍ଯ୍ୟ ଏବଂ ବନ ବିଭାଗ ପକ୍ଷରୁ ଚାଲିଥିବା ସୌନ୍ଦର୍ଯ୍ୟକରଣ ସାଙ୍ଗକୁ ଏକ ୱାଚ୍ ଟାୱାର୍ ଓ ପର୍ଯ୍ୟଟକଙ୍କ ନିମନ୍ତେ ବିଭିନ୍ନ ବ୍ୟବସ୍ଥା କରାଯାଉଛି। ଏହି ସମସ୍ତ କାର୍ଯ୍ୟର ସମୀକ୍ଷା କରିବା ସହ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ। ସେହିପରି ଭଞ୍ଜନଗରକୁ ପୌର ପରିଷଦ ନେଇ ଘୋଷଣା କରାଯିବା ପରେ ଲୋକଙ୍କୁ କିପରି ଅତ୍ୟାଧୁନିକ ସୁବିଧା ଯୋଗାଇ ଦିଆଯାଇପାରିବ ସେନେଇ ଆଲୋଚନା କରିଥିଲେ। ସହର ମଧ୍ୟରେ ରହିଥିବା ପୁରୁଣା ଜେଲ୍ ବର୍ତ୍ତମାନ ପରିତ୍ୟକ୍ତ ଅବସ୍ଥାରେ ରହିଥିବା ବେଳେ ପ୍ରାୟ ୨ ଏକର ଜାଗାରେ ଏକ ସୁପର୍ ମାର୍କେଟ୍ କମ୍ପେକ୍ସ ନିର୍ମାଣ ନେଇ ପ୍ରସ୍ତାବ ରହିଛି। ଉକ୍ତ ସ୍ଥାନ ବୁଲି ଦେଖିବା ସହ ନିର୍ମାଣ ହେବାକୁ ଥିବା ମାର୍କେଟ କମ୍ପ୍ଲେକ୍ସର ଡିପିଆର୍ ( ଡିଟେଲ ପ୍ରୋଜେକ୍ଟ ରିପୋର୍ଟ) ସମ୍ପର୍କରେ ବୁଝିଥିଲେ। ପରେ କବିସମ୍ରାଟ ଷ୍ଟାଡ଼ିୟମ ବୁଲିବା ସହ ଏହାର ଉନ୍ନତିକରଣ, ଗ୍ୟାଲେରି, ପୋଡ଼ିଅମ ଆଦି ନିର୍ମାଣ ନେଇ ଆଲୋଚନା କରିଥିଲେ।
ଏହାପରେ ସହର ମଧ୍ୟରେ ରହିଥିବା ଭଞ୍ଜ ସାହିତ୍ୟ ପରିଷଦର ଉନ୍ନତିକରଣ ସହ ଏଠାରେ ଉପେନ୍ଦ୍ର ଭଞ୍ଜଙ୍କ ଜୀବନୀ ଓ କୃତୀ ସମ୍ପର୍କିତ ଏକ ମ୍ୟୁଜିୟମ୍ ନିର୍ମାଣ ହେବା ନେଇ ପ୍ରସ୍ତାବ ରହିଥିବା ବେଳେ ତାକୁ ମଧ୍ୟ ବୁଲି ଦେଖିଥିଲେ। ପ୍ରସ୍ତାବିତ ମୁନିସିପାଲିଟି ପାଇଁ ନୂତନ କୋଠା ନିମନ୍ତେ ଜାଗା, ଘୁମୁସର କ୍ଲବ୍ର ଉନ୍ନତିକରଣ କରିବା ନେଇ ସେହି ସ୍ଥାନ ମଧ୍ୟ ବୁଲି ଦେଖିଥିଲେ । ଏଥିସହ ଆଇଏଏସ୍ ଓ ଓଏଏସ୍ ଭଳି ସିଭିଲ ସର୍ଭିସ ପରୀକ୍ଷା ନିମନ୍ତେ ଆଶାୟୀଙ୍କ ପାଇଁ ଜିଲ୍ଲାରେ ଆଗାମୀ ଦିନରେ ୩ଟି ମାଗଣା କେନ୍ଦ୍ର ବ୍ୟବସ୍ଥା ଗ୍ରହଣ ନିମନ୍ତେ ଜିଲ୍ଲା ପ୍ରଶାସନ ନିଷ୍ପତି ନେଉଛି। ଏହି ପରିପ୍ରେକ୍ଷୀରେ ଭଞ୍ଜନଗର ଠାରେ ମଧ୍ୟ ଏକ କୋଚିଂ କେନ୍ଦ୍ର କରାଯିବା ଲାଗି ଏକ ପୁରୁଣା ହଷ୍ଟେଲକୁ ଚୟନ କରାଯାଇଥିବା ବେଳେ ତାକୁ ମଧ୍ୟ ବୁଲି ଦେଖିଥିଲେ। ଏଭଳି କୋଚିଂ ସେଣ୍ଟର୍ ଏଠାରେ ଖୋଲିବା ପରେ ଭଞ୍ଜନଗର ଓ ଏହାର ଆଖପାଖ ଅଞ୍ଚଳର ଗରିବ ଓ ମେଧାବୀ ଛାତ୍ରଛାତ୍ରୀ ଉପକୃତ ହୋଇ ପାରିବେ ବୋଲି ମତପ୍ରକାଶ ପାଇଛି। ଉପଜିଲ୍ଲାପାଳ ଉମାଶଙ୍କର ବେହେରା, ବିଡିଓ ଭାରତୀ ଦେବୀ, ନଗରପାଳ ଗୋପବନ୍ଧୁ ମହାପାତ୍ର, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ମୁରଲିକୃଷ୍ଣ ପଣ୍ଡା, ଅତିରିକ୍ତ ତହସିଲଦାର ଅବିନାଶ ମାହାର ପ୍ରମୁଖ ଉପସ୍ଥିତ ଥିଲେ ।
