ନୟାଗଡ଼ ଜିଲ୍ଲାର ଦାଦନ ଦୁଃଖ:ଜିଲ୍ଲପାଳଙ୍କ ଅଭିଯୋଗ ଶୁଣାଣିରେ ଶିଶୁ,ନାବାଳିକା ଓ ମହିଳାଙ୍କୁ ବିକ୍ରି ଅଭିଯୋଗ

ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ଉପରେ ଦାଦନ ଦଲାଲଙ୍କ ନଜର । ଦାଦନ ଖଟାଇବାକୁ ନେଇ ବାହାର ରାଜ୍ୟରେ ବିକ୍ରି କରିଦେଉଥିଲା ଦଲାଲ । ଜଣେ ନୁହେଁ କି ଦୁଇ ଜଣ ନୁହେଁ ଶିଶୁ, ନାବାଳିକା ଓ ମହିଳା ମିଶି ୭ଜଣଙ୍କୁ ନୟାଗଡ଼ ଜିଲ୍ଲାରୁ ଦାଦନ ଖଟାଇବାକୁ ନେଇ ବାହାର ରାଜ୍ୟରେ ବିକ୍ରି କରିଦେଇ ଥିବା ନେଇ ନଭେମ୍ୱର ତୃତୀୟ ସୋମବାର ଜିଲ୍ଲାପାଳଙ୍କ ଅଭିଯୋଗ ଶୁଣାଣୀରେ ଅଭିଯୋଗ ହୋଇଥିଲା ।ଏଭଳି ସାଙ୍ଘାତିକ ଅଭିଯୋଗ ଜିଲ୍ଲା ପୋଲିସ୍ ଓ ଜିଲ୍ଲା ପ୍ରଶାସନର ମୁଣ୍ଡ ବିନ୍ଧାର କାରଣ ପାଲଟିଛି । ତେବେ ଦାଦନ ମୁକ୍ତ କରେଇବା କହି ରାଜ୍ୟରେ ବିଜେପି ଡବଲ ଇଞ୍ଜିନ ସରକାର କରିଥିବା ବେଳେ କନ୍ଧମାଳ ସଂସଦୀୟ କ୍ଷେତ୍ରରେ ଥିବା ଦଶପଲ୍ଲା ନିର୍ବାଚନ ମଣ୍ଡଳୀର ଗଣିଆ ବ୍ଲକ ଆଡ଼କଟା ପଞ୍ଚାୟତରୁ ଆସିଛି ଏଭଳି ସାଙ୍ଘାତିକ ଅଭିଯୋଗ । ସୂଚନାନୁସାରେ, ନୟାଗଡ଼ ଜିଲ୍ଲାରେ ଗଣିଆ ବ୍ଲକରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣୀ ଶିବିର ଅନୁଷ୍ଠିତ ହୋଇଥିଲା । ଉକ୍ତ ଶିବିରରେ ଆଡ଼କଟା ପଞ୍ଚାୟତ ଆଡ଼କଟା ଗାଁରୁ ଦୁଇ ମହିଳା ସାଙ୍ଘାତିକ ଅଭିଯୋଗ ନେଇ ଜିଲ୍ଲାପାଳଙ୍କ ଅଭିଯୋଗ ଶୁଣାଣୀ ଶିବିରରେ ପହଞ୍ଚି ଥିଲେ । ଏବଂ ଅଭିଯୋଗରେ, ତିନି ମାସ ତଳେ ବୌଦ୍ଧ ଜିଲ୍ଲାର ଚନ୍ଦନ ଗଡ଼ତିଆ ଆଡ଼କଟା ଗାଁରରେ ପହଞ୍ଚି ବୁଲୁ ପ୍ରଧାନଙ୍କ ମାଧ୍ୟମରେ ଆଡ଼କଟା ଗାଁରୁ ଅନେକ ଲୋକଙ୍କୁ ନେଇ ହାଇଦ୍ରାବାଦ ଦାଦନ ଖଟାଇବାକୁ ନେଇଥିଲେ । ସେଠାରେ ଅକଥନୀୟ ଅତ୍ୟାଚାର ଓ ନିର୍ଯ୍ୟାତନା ଦେବାରୁ କିଛି ଖସି ଆସିଥିବା ବେଳେ ୭ଜଣଙ୍କୁ ଦଲାଲ୍ ମାନେ ବିକ୍ରି କରିଦେବା ନେଇ ଅଭିଯୋଗ ହୋଇଛି । ପ୍ରତ୍ୟେକ ବ୍ୟକ୍ତି ପିଛା ମଜୁରି ଆକାରରେ ୪୦ ହଜାର ଟଙ୍କା ଲେଖାଏଁ ଅଗ୍ରୀମ ଦେଇଥିଲେ। ଚନ୍ଦ୍ରମଣି ପ୍ରଧାନଙ୍କ ନାବାଳିକା ଝିଅ, ତାଙ୍କ ସମ୍ପର୍କୀୟ କିରଣ ପ୍ରଧାନ, ବର୍ଷା ପ୍ରଧାନ ଏବଂ ମୀନା ପ୍ରଧାନଙ୍କ ଭାଇ କିଶୋର ପ୍ରଧାନ, ଭାଉଜ ସଞ୍ଜୁ ପ୍ରଧାନ ଏବଂ ଛୋଟ ପୁତୁରା ଶିଶିର ପ୍ରଧାନ ନିଖୋଜ ଥିବା ଅଭିଯୋଗ ହୋଇଛି। ଏହାସହ ଆଡ଼କଟା ଗ୍ରାମର ପପୁନ ଗଡ଼ିତିଆ ମଧ୍ୟ ସେମାନଙ୍କ ସହ ନିଖୋଜ ରହିଛି। ସଂପର୍କରେ ଆଜି ଚନ୍ଦ୍ରମଣି ଓ ମୀନା ଜିଲ୍ଲାପାଳଙ୍କ ଜନଶୁଣାଣିରେ ଅଭିଯୋଗ କରିଛନ୍ତି। ଚନ୍ଦ୍ରମଣିଙ୍କ କହିବାନୁସାରେ, ୪୦ ହଜାର ଟଙ୍କାରେ ନେଇ ସେମାନଙ୍କୁ ଲକ୍ଷାଧିକ ଟଙ୍କାରେ ବିକ୍ରି କରି ଦିଆଯାଇଛି। ସେମାନଙ୍କଠାରୁ ମୋବାଇଲ ଫୋନ୍ ମଧ୍ୟ ଛଡ଼ାଇ ନିଆଯାଇଛି। ଫଳରେ ସେମାନେ କାହା ସହ ଯୋଗାଯୋଗ କରିପାରୁନାହାନ୍ତି ସେଠାରୁ ଖସି ଆସି ପାରୁନାହାନ୍ତି। ସେମାନଙ୍କ ଜୀବନ ପ୍ରତି ବିପଦ ରହିଛି ଚନ୍ଦ୍ରମଣି କହିଛନ୍ତି । ତେବେ ଏହି ଅଭିଯୋଗ ହେବା ପରେ ପୋଲିସ ଓ ଜିଲ୍ଲା ପ୍ରଶାସନର ମୁଣ୍ଡ ବିନ୍ଧାର କାରଣ ପାଲଟିଛି ।