ନୟାଗଡ଼, (ଓଡ଼ିଶା ଲେଖା): କୃଷକ ମାନଙ୍କ ହାତ ମୁଠାକୁ ସୁଦୃଢ଼ କରିବା ପାଇଁ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ମୁଖ୍ୟମନ୍ତ୍ରୀ ମକା ଯୋଜନା କାର୍ଯ୍ୟକାରୀ ହୋଇଛି । କୃଷକ ମାନେ ମକା ଚାଷ କରି ଲାଭବାନ ହୋଇପାରିବେ, ତେଣୁ ରାଜ୍ୟ ସରକାର ମୁଖ୍ୟମନ୍ତ୍ରୀ ମକା ଯୋଜନା ଲାଗୁ କରିଥିଲେ । ତେବେ ନୟାଗଡ଼ ଜିଲ୍ଲାରେ ୮ଟି ବ୍ଲକ ଥିବା ବେଳେ ନୟାଗଡ଼ କୃଷି ବିଭାଗ ତରଫରୁ ଦୁଇଟି ବ୍ଲକରେ ମକା ଚାଷ କରାଯାଉଥିବା ନେଇ ସୂଚନା ମିଳିଛି ।ମୁଖ୍ୟମନ୍ତ୍ରୀ ମକା ମିଶନ ଯୋଜନା ୨୦୨୫-୨୬ ଆର୍ଥିକ ବର୍ଷରେ ନୟାଗଡ଼ ଜିଲ୍ଲାର ଓଡ଼ଗାଁ ବ୍ଲକ୍ ୮ଟି ପଞ୍ଚାୟତର ୬୧୧ଜଣ ଚାଷୀ ମକା ଚାଷ କରୁଥିବା ବେଳେ ଦଶପଲ୍ଲା ବ୍ଳକର ୭ଟି ପଞ୍ଚାୟତର ୬୦୬ଜଣ ଚାଷୀ ମକା ଚାଷ କରୁଥିବା ନେଇ ସୂଚନା ମିଳିଛି । ତେବେ ୨୦୨୫-୨୬ ଆର୍ଥିକ ବର୍ଷ ପାଇଁ ନୟାଗଡ଼ ଜିଲ୍ଲାକୁ ୬୦୦ହେକ୍ଟର ମକା ଚାଷ କରିବା ପାଇଁ ଲକ୍ଷ ରଖାଯାଇଛି । ନୟାଗଡ଼ ଜିଲ୍ଲାର ଓଡ଼ଗାଁ ବ୍ଲକକୁ ୩୦୦ହେକ୍ଟର ମକା ଚାଷ ପାଇଁ ଲକ୍ଷ ରଖାଯାଇଥିବା ବେଳେ ୬୧୧ଜଣ ଚାଷୀମାତ୍ର ୧୬୭ହେକ୍ଟର ମକା ଚାଷ କରିଛନ୍ତି ବୋଲି ବିଭାଗ ତରଫରୁ ସୂଚନା ମିଳିଛି । ସେହିପରି ଦଶପଲ୍ଲା ବ୍ଳକକୁ ୩୦୦ହେକ୍ଟର ମକା ଚାଷ ପାଇଁ ଲକ୍ଷ ରହିଥିବା ବେଳେ ସେଥିରୁ ୭ଟି ପଞ୍ଚାୟତର ୬୦୬ଜଣ ଚାଷୀ ମାତ୍ର ୧୭୪.୩୦ହେକ୍ଟର ମକା ଚାଷ କରିଥିବା ନେଇ ବିଭାଗ ପକ୍ଷରୁ ସୂଚନା ମିଳିଛି ।
ତେବେ ଜିଲ୍ଲାରେ ଅନେକ ଚାଷୀ ମକା ଚାଷ କରୁଥିବା ବେଳେ ନୟାଗଡ଼ କୃଷି ବିଭାଗ ରାଜ୍ୟ ସରକାରଙ୍କ ମକା ଚାଷ ଉପରେ ରହୁଥିବା ଟାର୍ଗେଟ କାହିଁକି ଶତ ପ୍ରତିଶତ ହାସଲ କରିପାରୁନାହିଁ ବୋଲି ବଡ ପ୍ରଶ୍ନବାଚୀ ସୃଷ୍ଟି କରିଛି । ଜିଲ୍ଲାରେ ୬୦୦ହେକ୍ଟର ଚାଷରୁ ମାତ୍ର ୩୪୧.୩୦ହେକ୍ଟର ମକା ଚାଷ ହେଉଥିବା ନେଇ ନୟାଗଡ ଜିଲ୍ଲା କୃଷି ବିଭାଗ ଜିଲ୍ଲାପରିଷଦ ଦଶମ ଅଧିବେଶନରେ ତଥ୍ୟ ଉପସ୍ଥାପନ କରିଛନ୍ତି । ଜିଲ୍ଲା ପରିଷଦ ଦଶମ ଅଧିବେଶନରେ ମକା ଚାଷକୁ ନେଇ ଉପସ୍ଥାପନ ହୋଇଥିବା ତଥ୍ୟ ବାସ୍ତବରେ ସତ୍ୟ ନା କେବଳ ଶ୍ରୀଅନ୍ନ ଯୋଜନା ମାଣ୍ଡିଆ ଚାଷ ପରି କାଗଜ କଲମରେ ହୋଇଛି ତାହାକୁ ନେଇ ଚାଷୀ ମାନଙ୍କ ମଧ୍ୟରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । କୃଷି ବିଭାଗ ପକ୍ଷରୁ ଉପସ୍ଥାପନ ହୋଇଥିବା ତଥ୍ୟ ଚାଷୀମାନଙ୍କ ମନରେ ସନ୍ଦେହ ସୃଷ୍ଟି କରିଛି । ତେଣୁ ଶ୍ରୀଅନ୍ନ ଯୋଜନା ପରି ଓଡ଼ଗାଁରେ କାଗଜ କଲମରେ ଯେପରି ମାଣ୍ଡିଆ ଚାଷ ହୋଇଛି ବୋଲି କୁହାଯାଉଛି, ସେହିଭଳି ଭାବେ ମକା ଚାଷରେ କରାଯାଇନି ତ ? ଏହାର ତଦନ୍ତ କରି ଅଧିକରୁ ଅଧିକ ଚାଷୀ କେମିତି ମକା ଚାଷ କରି ଗୁଜୁରାଣ ମେଣ୍ଟାଇ ପାରିବେ ସେହି ଉପରେ ଜିଲ୍ଲା କୃଷି ବିଭାଗ ଦୃଷ୍ଟି ଦେବାକୁ ଦାବି ହୋଇଛି ।
