ଦିଲ୍ଲୀରେ ଲାଲ୍ କିଲ୍ଲା ନିକଟରେ ବିସ୍ଫୋରଣ:ନୟାଗଡ଼ରେ ଟ୍ରାଫିକ ଛକରେ ଯାଞ୍ଚ କଡ଼ାକଡ଼ି

ନୟାଗଡ଼, (ଓଡ଼ିଶା ଲେଖା): ଗତକାଲି ସଂଧ୍ୟା ବିସ୍ପୋରଣରେ ରକ୍ତ ରଞ୍ଜିତ ଲାଲ କିଲ୍ଲା । କାର ଭିତରେ ଥିବା ବିସ୍ପୋରକ ଦେଶର ରାଜଧାନୀ ଉପରେ ବଡ ବିସ୍ଫୋରଣ ଘଟିଥିଲା । ଏହି ଭୟାନକ ବିସ୍ଫୋରଣରେ ମୃତ ସଂଖ୍ୟା ୧୦ରୁ ଯାଇ ୧୩ରେ ପହଞ୍ଚିଥିବା ବେଳେ ଗୁରୁତର ଆହାତ ସଂଖ୍ୟା ଯାଇ ୨୫ରେ ପହଞ୍ଚିଛି । ବିସ୍ଫୋରଣ ନେଇ ସାରା ଦେଶରେ ହାଇ ଆଲର୍ଟ ଜାରି କରାଯାଇଛି । ତେବେ ଏହାକୁ ନେଇ ନୟାଗଡ଼ରେ ମଧ୍ୟ ଗାଡ଼ି ମଟର କଡ଼ାକଡି ଯାଞ୍ଚ କରାଯାଇଛି । ନୟାଗଡ଼ ଆରକ୍ଷୀ ଅଧିକ୍ଷକ ଏସ ସୁଶ୍ରୀଙ୍କ ନିର୍ଦ୍ଦେଶ କ୍ରମେ ନୟାଗଡ଼ ଟାଉନ୍ ପୋଲିସ୍ ଗୋଲେଇ ଛକ ଠାରେ ବିଳମ୍ବିତ ରାତିରେ ଯାତ୍ରୀ ମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଯାନବାହାନ ଗୁଡ଼ିକ ତନ ତନ କରି ଯାଞ୍ଚ କରିଥିବା ଜଣାପଡ଼ିଛି । ଯାଞ୍ଚ ପ୍ରକ୍ରିୟାରେ ବମସ୍କ୍ୱାର୍ଡ ସାମିଲ୍ ହୋଇଥିବା ବେଳେ ନୟାଗଡ଼ ଟାଉନ୍ ଥାନା ଅଧିକାରୀ ରଶ୍ମୀରଂଜନ ପ୍ରଧାନ, ସନ୍ତୋଷ କୁମାର ଦାସ, ଏଏସଆଇ ସନ୍ଧ୍ୟାରାଣି ସେଠୀଙ୍କ ସହ ଅନ୍ୟାନ୍ୟ ପୋଲିସ୍ କର୍ମଚାରୀ ପ୍ରମୁଖ ଉପସ୍ଥିତ ଥିଲେ ।