ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ରକ୍ତର ଅଭାବ ଲାଗି ରହିଛି । ଯେଉଁଥି ପାଇଁ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି ରୋଗୀ ଓ ରୋଗୀଙ୍କ ଆଟେଡ଼ାଣ୍ଟ । ଏହାକୁ ଦୃଷ୍ଟିରେ ରଖି ନୟାଗଡ଼ ଅଞ୍ଚଳର ଯୁବ ସମାଜସେବୀ ଓ ଅନୁଷ୍ଠାନ ଆଗଭର ହୋଇ ଆଜି ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ରକ୍ତ ଭଣ୍ଡାର ଗୃହରେ ରକ୍ତଦାନ ଶିବିର ଆୟୋଜନ କରିଥିଲେ । ଯୁବ ଛାତ୍ର ସମାଜସେବୀ ଅଶ୍ୱିନୀ କୁମାର ସେଠୀ, ଗିଭ୍ ବ୍ଲଡ ସେଭ୍ ଲାଇଫ ସଙ୍ଗଠନ ଓ ଇନଫିନିଟ କଲେଜ୍ ଅଫ ହୋଟେଲ ମ୍ୟାନେମେଣ୍ଟ ସହଭାଗିତାରେ ଆୟୋଜିତ ରକ୍ତଦାନ ଶିବିରକୁ ନୟାଗଡ଼ ଏସଡିପିଓ ଜ୍ୟୋତି ରଞ୍ଜନ ସାମନ୍ତରାୟ ମୁଖ୍ୟ ଅତିଥି ଭାବେ ଯୋଗ ଦେଇ ରକ୍ତଦାନ ଶିବିରର ଶୁଭାରମ୍ଭ କରିବା ସହ ନିଜେ ରକ୍ତ ଦାନ କରି ଜନସାଧାରଣଙ୍କ ପ୍ରେରଣା ପାଲଟିଥିଲେ । ଏବଂ ଯୁବ ରକ୍ତଦାତା ମାନଙ୍କୁ ରକ୍ତଦାନ କରିବା ପାଇଁ ଉତ୍ସାହିତ କରାଇଥିଲେ ।
ଅନ୍ୟତମ ଅତିଥି ଭାବେ ଅତିରିକ୍ତ ଜିଲ୍ଲା ଚିକିତ୍ସାଧିକାରୀ ଶୁଶାନ୍ତ କୁମାର ବେହେରା, ଟାଉନ ଥାନା ଆଇଆଇସି ରଶ୍ମିରଂଜନ ପ୍ରଧାନ, ସମାଜସେବୀ ଭାଗିରଥି ବାଇ, ଇନଫିନିଟ କଲେଜ୍ ଅଫ ହୋଟେଲ ମ୍ୟାନେମେଣ୍ଟ ଅଧ୍ୟକ୍ଷ ମିର୍ ସାହିଦ୍ ଅଲ୍ଲୀ, ଓ ସମ୍ପାଦିକା ସଂଯୁକ୍ତା ମହାରଣା ପ୍ରମୁଖ ଉପସ୍ଥିତ ଥିବା ବେଳେ ସୁଶ୍ରୀ ସୋନାଲି ସୁଚିସ୍ମିତା,ବବୁଲ୍ ଦାସ ଏବଂ ରକ୍ତ ଭଣ୍ଡାରର କର୍ମଚାରୀଙ୍କ ମିଳିତ ପ୍ରୟାସରେ କାର୍ଯ୍ୟକ୍ରମଟି ସାଫଲ୍ୟମଣ୍ଡିତ ହୋଇଥିଲା। ଏହି ଶିବିରରେ ମୋଟ ୧୭ ୟୁନିଟ ରକ୍ତ ସଂଗ୍ରହ ହୋଇଥିବା ସୂଚନା ମିଳିଛି।ତେବେ ପ୍ରତ୍ୟେକ ସଂଗଠନ ଆଗଭର ହୋଇ ରକ୍ତଦାନ ଶିବିର ଆୟୋଜନ କରନ୍ତୁ ଏବଂ ନୟାଗଡ଼ ଜିଲ୍ଲାରୁ ରକ୍ତ ଅଭାବ ଦୂର କରନ୍ତୁ ବୋଲି ନୟାଗଡ଼ ଏସଡିପିଓ ଆହ୍ବାନ ଦେଇଛନ୍ତି ।
