ନୟାଗଡ଼ ଉପକାରଗାରରେ ଦୁଇ ଗୋଷ୍ଠୀ ସଂଘର୍ଷ:୨୨ ଜଣ କଏଦୀଙ୍କ ନାମରେ ମାମଲା:ମୁଖ୍ୟ ଖଳନାୟକ କିଏ ତଦନ୍ତ କରୁଛି ପୋଲିସ

ନୟାଗଡ଼,(ଓଡ଼ିଶା ଲେଖା): ନୟାଗଡ଼ ଜିଲ୍ଲାର ପ୍ରଥମ ଘଟଣା । କଏଦୀ କଏଦୀ ମଧ୍ୟରେ ଘମାଘୋଟ ଲଢ଼େଇ । ଲଢ଼େଇରେ ୨୨ରୁ ଉର୍ଦ୍ଧ୍ବ କଏଦୀ ଆହାତ ହୋଇଥିବା ବେଳେ ମୁଖ୍ୟ ଖଳନାୟକ କିଏ ତାହାର ତଦନ୍ତ ଆରମ୍ଭ କରିଛି ସଦର ଥାନା ପୋଲିସ । ନୟାଗଡ଼ ଜିଲ୍ଲା ସଦରଥାନା ଅନ୍ତର୍ଗତ ଉପକାରାଗାରରେ ସାଂଘାତିକ ସ୍ଥିତି ସୃଷ୍ଟି ହୋଇଛି । କର୍ମଚାରୀଙ୍କୁ ମାଡ଼ ମରାଯିବା ସହ କଏଦୀଙ୍କ ମଧ୍ୟରେ ଗୋଷ୍ଠୀ ସଂଘର୍ଷ ହୋଇଛି । ଏହି ଗୋଷ୍ଠୀ ସଂଘର୍ଷରେ ଅନେକ କଏଦୀ ଓ କର୍ମଚାରୀ ଆହାତ ହୋଇଛନ୍ତି । ନୟାଗଡ଼ ଉପକାରାଗାରରେ ବିଭିନ୍ନ କାରଣକୁ ନେଇ କଏଦୀଙ୍କ ମଧ୍ୟରେ ଅସନ୍ତୋଷ ଲାଗି ରହିଥିଲା । କୁହୁଳୁଥିବା ଅସନ୍ତୋଷ ଆଜି ସାଂଘାତିକ ସ୍ଥିତି ସୃଷ୍ଟି କରିଛି । ଗତକାଲି ସଂନ୍ଧ୍ୟାରେ କଏଦୀମାନେ କାରାଗାର ସେଲ ଚାବି ପଡ଼ିବା ସମୟରେ ହୋହାଲ୍ଲା କରିଥିଲେ । ଉପକାରାଗାର ଅଧିକ୍ଷକ ସମସ୍ତଙ୍କୁ ବୁଝାଶୁଝା କରିଥିଲେ । ଆଜି ସକାଳୁ ୫୦ରୁ ଉର୍ଦ୍ଧ୍ୱ କଏଦୀ ଏକତ୍ରିତ ହୋଇ ବିରୋଧ କରିବା ସହ ୩ ଜଣ କର୍ମଚାରୀଙ୍କୁ ନିର୍ଦ୍ଧୁମ ମାଡ଼ ମାରିଥିଲେ । ପରେ ସେମାନଙ୍କ ମଧ୍ୟରେ ଦୁଇ ଗୋଷ୍ଠୀ ହୋଇ ସାଂଘାତିକ ଗଣ୍ଡଗୋଳ ଲାଗିଥିଲେ । ଖବର ପାଇ ଜିଲ୍ଲା ପୁଲିସର ବରିଷ୍ଠ ଅଧିକାରୀ ସଦଳବଳେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଛନ୍ତି । ଏହି ଘଟଣାକୁ ନେଇ ଜେଲ୍ ଅଧିକ୍ଷକ ନୟାଗଡ଼ ସଦରଥାନାରେ ଲିଖିତ ଏତଲା ଦେଇଛନ୍ତି । ଏତଲା ଆଧାରରେ ୨୨ ଜଣ କଏଦୀଙ୍କ ନାମରେ ମାମଲା ରୁଜୁ ହୋଇଥିବା ସୂଚନା ମିଳିଛି । ୨୨ ଜଣଙ୍କ ମଧ୍ୟରୁ ମୁଖ୍ୟ ଅଭିଯୁକ୍ତ ବିଷ୍ଣୂପ୍ରସାଦ ସାହୁ ବୋଲି ସୂଚନା ମିଳିଛି । କଏଦୀ ଓ କର୍ମଚାରୀଙ୍କ ମଧ୍ୟରେ ସୃଷ୍ଟି ହୋଇଥିବା ଘଟଣାର ସୁତ୍ରଧର ଜଣେ ଠକ ବୋଲି ଜଣାପଡ଼ିଛି । ମୁଖ୍ୟମନ୍ତ୍ରୀଙ୍କ ନାମରେ ଠକେଇ ଅଭିଯୋଗରେ ଗିରଫ ମେଳାମ୍ବ ଗ୍ରାମର ମାନସ ଏଭଳି ପରିସ୍ଥିତି ସୃଷ୍ଟି କରାଇବା ପାଇଁ ଷଡ଼ଯନ୍ତ୍ର ରଚିଥିବା ସୂଚନା ମିଳିଛି । ଉପକାରାଗାରରେ ସୃଷ୍ଟି ହୋଇଥିବା ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଉଭୟ ପୁଲିସ ଓ ଜେଲ କର୍ତ୍ତୁପକ୍ଷ ଚେଷ୍ଟା ଚଳାଇଥିବା ଜଣାପଡ଼ିଛି । ଉପକାରାଗାରରେ ନିଅଣ୍ଟିଆ ଖାଦ୍ୟ ବଣ୍ଟନ, କାରାଗାର ମଧ୍ୟକୁ ବେଆଇନ ଭାବେ ନିଶା ଦ୍ରବ୍ୟ ଚାଲାଣକୁ ନେଇ ଏହି ବିବାଦର ଆରମ୍ଭ ହୋଇଥିବା ଜଣାପଡ଼ିଛି ।