ଓଡ଼ିଶା ଲେଖା ଅଫିସ: ରିଜର୍ଭ ବ୍ୟାଙ୍କରେ ପୁଣି ଜଣେ ଓଡ଼ିଆ ପୁଅକୁ ନିଯୁକ୍ତି ମିଳିଛି। ଭାରତୀୟ ରିଜର୍ଭ ବ୍ୟାଙ୍କର ଡେପୁଟି ଗଭର୍ଣ୍ଣର ଭାବେ ଓଡ଼ିଆ ପୁଅ ଶିରୀଶ ଚନ୍ଦ୍ର ମୁର୍ମୁଙ୍କୁ ନିଯୁକ୍ତ କରାଯାଇଛି। ଆସନ୍ତା ଅକ୍ଟୋବର ୯ତାରିଖରେ ସେ ଦାୟୀତ୍ୱ ଗ୍ରହଣ କରିବାର କାର୍ଯ୍ୟକ୍ରମ ରହିଛି। ସେ ଏହି ପଦବୀରେ ୩ବର୍ଷ ପାଇଁ କାର୍ଯ୍ୟ କରିବେ। ଶିରୀଶ ଚନ୍ଦ୍ର ମୁର୍ମୁଙ୍କ ଏହି ନିଯୁକ୍ତି ଉପରେ କେନ୍ଦ୍ର କ୍ୟାବିନେଟର ନିଯୁକ୍ତି କମିଟି ଅନୁମୋଦନ କରିଛି। ଶିରୀଶଙ୍କ ଘର ମୟୁରଭଞ୍ଜ ଜିଲ୍ଲା ବେତନଟୀ ଅଞ୍ଚଳରେ ହୋଇଥିବା ବେଳେ, ସେ ବର୍ତ୍ତମାନ ରିଜର୍ଭ ବ୍ୟାଙ୍କର ଏକ୍ଜିକ୍ୟୁଟିଭ୍ ଡାଇରେକ୍ଟର ଭାବେ କାର୍ଯ୍ୟ କରୁଥିଲେ। ବର୍ତ୍ତମାନର ଡେପୁଟି ଗଭର୍ଣ୍ଣର ଥିବା ରାଜେଶ୍ୱର ରାଓଙ୍କ କାର୍ଯ୍ୟକାଳ ଅକ୍ଟୋବର ୮ରେ ସରୁଥିବା ବେଳେ କେନ୍ଦ୍ର କ୍ୟାବିନେଟ ନିଯୁକ୍ତି କମିଟି ଏଭଳି ନିଷ୍ପତ୍ତି ନେଇଛି। ଶିରୀଶଙ୍କ ନୂତନ ନିଯୁକ୍ତି ଘୋଷଣା ହେବା ପରେ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି।
